ރާއްޖޭގެ ފަތުރުވެރިކަމުގެ ތާރީޙު ދައްކުވައިދޭ ސްޓޭމްޕްތަކެއް ފަތުރުވެރިކަމުގެ ރަން އަހަރާއި ގުޅުވައި މޯލްޑިވްސް ޕޯސްޓް ލިމިޓެޑްއިން ނެރެފިއެވެ.
ސްޓޭމްޕް ތައާރަފްކޮށްދެއްވީ ރާއްޖޭގެ ފުރަތަމަ ޓޫރިޒަމް މިނިސްޓަރު އަހްމަދު މުޖުތަބާ އާއި، ރާއްޖެއަށް ފަތުރުވެރިކަން ތައާރަފްކޮށްދެއްވި ޔުނިވާސަލް ގުރޫޕްގެ ޗެއާމަން މުހައްމަދު އުމަރު މަނިކާއި، ޗަމްޕާ ގުރޫޕްގެ އެއް ހިއްސާދާރު ހުސައިން އަފީފާއި، މިހާރުގެ ހެލްތު މިނިސްޓަރު އަހްމަދު ނަސީމާއި، ޖޯޖް ކޯބިންއެވެ.
ރާއްޖޭގެ ފަތުރުވެރިކަމުގެ ތާރީޙު ދައްކުވައިދޭ ސްޓޭމްޕްތައް ނެރުމުގެ ރަސްމީއްޔާތުގައި ތެރެއިން މި ބޭފުޅުން ވަނީ ސްޓޭމް ކަލެކްޝަން އިޝޫގައި ސޮއިކޮށްދެއްވާފައެވެ.
މިރަސްމިއްޔާތުގައި ވާހަކަދައްކަވަމުން ޓުއަރިޒަމް މިނިސްޓަރ ޑރ. އަބްދުﷲ މައުސޫމް ވަނީ ޕޯސްޓް ލިމިޓެޑާއި ގުޅިގެން ތަޢާރަފު ކުރެވުނު މި ސްޓޭމްޕްތަކަކީ މިއަހަރަށް މިނިސްޓްރީން ރާވާފައިވާ މުހިންމު ހަރަކާތްތަކުގެ ތެރޭގައި ހިމެނޭ ހަރަކާތެއްކަން ފާހަގަކުރައްވާފައެވެ. އަދި މިއަހަރު އިތުރު ހަރަކާތްތައްވެސް ހުރިކަން މިނިސްޓަރ ފާހަގަކުރެއްވިއެވެ.
ރާއްޖޭގައި ފުރަތަމަ ފަހަރަށް ރިސޯޓެއް ހުޅުވީ އޮކްޓޫބަރު 3، 1972 ގައި ވިހަމަނާފުށީގަ އެވެ. މިހާރުގެ ގޮތުންނަމަ އެއީ ކުރުނބާ މޯލްޑިވްސް އެވެ.
މިރަސްމިއްޔާތުގައި ރާއްޖޭގެ ފަތުރުވެރިކަމުގެ 50 އަހަރު ރަމްޒުކޮށްދޭ 6 ސްޓޭމްޕެއް ޕޯސްޓު ލިމިޓެޑުން ވަނީ ނެރެފައެވެ. އެއީ ފަތުރުވެރިކަން ރާއްޖޭގައި ފެށުނު 1972 ވަނަ އަހަރު ރަމްޒު ކޮށްދޭ ސްޓޭމްޕަކާއި، 1986 ގައި ވޯޓާ ވިލާ ރާއްޖެއަށް ތަޢާރަފުވުން ރަމްޒުކޮށްދޭ ސްޓޭމްޕަކާއި، 1987 ވަނަ އަހަރު ހޮސްޕިޓަލިޓީ ޓްރެއިނިންގ އިންސްޓިޓިއުޓް އިފްތިތާޙްކުރެވުން ރަމްޒުކޮށްދޭ ސްޓޭމްޕެއް ހިމެނެއެވެ.
މީގެއިތުރުން 1993 އަހަރު ސީޕްލޭން ޙިދުމަތް ރާއްޖޭގައި ފެށުން ރަމްޒުކޮށްދޭ ސްޓޭމްޕެއްވެސް ވަނީ ތަޢާރަފް ކޮށްފައެވެ. ދެން ތަޢާރަފުކޮށްފައިވަނީ 2010 ވަނަ އަހަރު ގެސްޓް ހައުސް ވިޔަފާރި ރާއްޖެއަށް ތަޢާރަފުވުމާއި ގުޅޭ ސްޓޭމްޕަކާއި، މިއަހަރު ފަތުރުވެރިކަމުގެ ރަން އަހަރު ފާހަގަކުރުމާއި ގުޅިގެން އެކަމަށް ހާއްސަކޮށް ފަރުމާކޮށްފައިވާ ސްޓޭމްޕެކެވެ.
