ޤާނޫނީ ހުސްކަމެއްގައި މިވަގުތު އޮތް އެންޓި-ކޮރަޕްޝަން ކޮމިޝަން (އޭސީސީ)އަށް މެމްބަރުން އައްޔަން ކުރުމަކީ ރައީސުލްޖުމްހޫރިއްޔާ ބޭނުންފުޅުވާ ދުވަހަކު ކުރައްވަން އޮންނަ ކަމެއް ނޫންކަމަށް ރައްޔިތުންގެ މަޖިލީހުގެ ވިލިމާލެ ދާއިރާގެ މެމްބަރު މުހައްމަދު އުޝާމް ވިދާޅުވެއްޖެއެވެ.
އޭސީސީގެ މެންބަރުކަމަށް ކުރިމަތިލާފައިވާ މެމްބަރުންގެ ނަންތައް ރައްޔިތުންގެ މަޖިލީހަށް ފޮނުވޭނެ ދުވަހެއް ދަންނަވަން ނޭގޭކަމުގައި ރައީސުލްޖުމްހޫރޮއްޔާގެ އޮފީހުން ވަނީ މިއަދު ބުނެފައެވެ.
ރައީސް އޮފީހުން ބުނެފައިވަނީ ހުށަހެޅިފައިވާ ނަންތަކުގެ ތެރެއިން މަޖިލީހަށް ފޮނުވާ ނަންތައް ފައިނަލް ކުރުމުގެ މަސައްކަތް ކުރަމުންދާކަމަށެވެ. ނަމަވެސް މިމަސައްކަތް ނިމި، މަޖިލީހަށް ނަންތައް ފޮނުވޭނެ ވަކި ދުވަހެއް އަދި ދަންނަވަން ދަތިކަމަށް ރައީސް އޮފީހުން ވަނީ ބުނެފައެވެ.
ރައީސް އޮފީހުގެ މިވާހަތަކާއި ގުޅިގެން މެމްބަރު އުޝާމް ވިދާޅުވީ، އޭސީއަށް މެމްބަރުން އައްޔަން ކުރުމަށް ޤާނޫނުގައި ވަކި މުއްދަތެއް ދީފައިވާކަމަށެވެ. މުއްދަތު ފަހަނަ އަޅާ ގޮސްފައިވާއިރުވެސް މިކަމަށް މާބޮޑު ސަމާލުކަމެއް ނުދެއްވައި، ކުރަން ބޭނުންހާ ދުވަހަކު ކުރުމަށް މިމަސައްކަތް ފަސްކުމަކީ ޤާނޫނާއި އެއްގޮތަށް ކަންކަން ކުރަން ބޭނުން ނުވާކަން ހާމަވާކަމެއްކަމަށް އުޝާމް ވިދާޅުވިއެވެ.
އޭސީސީއަށް މެންބަރުން އައްޔަންކުރުމަށް ގާނޫނުގަ މުއްދަތުތަކެއް ކަނޑައަޅާފައިވަނީ ސަބަބެއް އޮވެގެން. ރައީސުލްޖުމްހޫރިއްޔާ ބޭނުންވާހާ ދުވަހެއްގައި ކުރަން އޮންނަ ކަމެއް ނޫންއެއީ. މިކަމުންވެސް އެނގެނީ ގާނޫނާ އެއްގޮތަށް ކަންކަން ކުރުމުގެ ހެޔޮ ނިޔަތެއް ރައީސުލްޖުމްހޫރިއްޔާގެ ނެތްކަން.
– އުޝާމް ވިދާޅުވިއެވެ.
އޭސީސީއަށް 2 ފަހަރެއްގެ މަތީން ހުޅުވާލުމުން 30 އަށްވުރެ ގިނަ މީހުންވަނީ ކުރިމަތިލާފައެވެ. މިއަހަރުގެ ރިޔާސީ ބަޔާން އިއްވުމަށް ބޭއްވުނު ޖަލްސާގައިވެސް ރައީސުލްޖުމްހޫރިއްޔާވަނީ އޭސީސީއަށް ވީހާވެސް އަވަހަކަށް މެމްބަރުން އައްޔަން ކުރެވިގެންދާނެކަމަށް ވިދާޅުވެފައެވެ. ނަމަވެސް މަޖިލީހުގެ މިހަފްތާގެ ޖަލްސާތައް ނިމިގެންދިޔަ އިރުވެސް މަޖިލީހަށް ނަންތައް ފޮނުވާފައި ނުވެއެވެ.
އޭސީސީގެ މެމްބަރު ކަމަށް ކުރިމަތިލުމުގެ މުއްދަތު އިތުރުކޮށްގެން މުއްދަތު ހަމަވިއިރު މިހާތަނަށް 30އަށްވުރެ ގިނަމީހުން ކުރިމަތިލާފައިވާއިރު އޭގެތެރޭގައި، ޓެންޑަރބޯޑުގެ ކުރީގެ ޗެއަރމަން އިސްމާޢީލް ޒަރިޔަންދުވެސް ހިމެނިވަޑައިގަންނަވައެވެ. އަދި އިލެކްޝަންސް ކޮމިޝަންގެ ކުރީގެ މެންބަރު އަމްޖަދު މުސްތަފާއާއި، އޭސީސީގައި އިންވެސްޓިގޭޓަރުންގެ ގޮތުގައި މަސައްކަތްކުރެއްވި ބޭފުޅުންވެސް ހިމެނިވަޑައިގަންނަވައެވެ.
އޭސީސީގެ މެމްބަރުން އިސްތިއުފާ ދެއްވާފައިވަނީ އޭސީސީ މެމްބަރުންގެ ޕާފޯމަންސް އޮޑިޓާއި ގުޅިގެން ރައްޔިތުންގެ މަޖިލީހުގެ މިނިވަން މުވައްސަސާތަކާއި ބެހޭ ކޮމެޓީން އޭސީސީގެ މެމްބަރުން ވަކި ކުރުމަށް ނިންމުމާއި ގުޅިގެންނެވެ. އޭސީސީ މެމްބަރުންގެ ޕާފޯމަންސް އޮޑިޓާއި ގުޅިގެން އެކޮމިޝަނުގެ މެމްބަރުކަމުން އިސްތިއުފާ ދެއްވުމުގެ ކުރިން ވަނީ ބަޔާނެއްވެސް ނެރެފައެވެ. އެބަޔާނުގައި ވަނީ ކޮމިޝަނުން ބޮޑެތި ގޮންޖެހުންތަކާއެކު ގިނަ މަސައްކަތްތަކެއް ކުރި ނަމަވެސް ރިޕޯޓުގައި އެކަން ފާހަގަކޮށްފައި ނުވާކަމަށެވެ.
