މާލޭ ސިޓީ ކައުންސިލުން މާލޭގެ ރައްޔިތުންނަށްޓަކައި ކުރުމަށް އެދޭ ކަންކަމަށް މަގުފަހިކޮށްދިނުމުން ސަރުކާރަށް ވާނީ ފައިދާ ކަމަށް މާލޭ ސިޓީގެ މޭޔަރު ޑރ. މުޙައްމަދު މުޢިއްޒު ވިދާޅުވެއްޖެއެވެ.

މޭޔަރު މިހެން ވިދާޅުވީ މާލޭ ސިޓީ ކައުންސިލުގެ 4 ވަނަ ދައުރުގެ 37 ވަނަ ޖަލްސާގައި ވާހަކަފުޅު ދައްކަވަމުންނެވެ.

އެމަނިކުފާނު ވިދާޅުވީ މާލޭ ރައްޔިތުންނަށް ދިމާވެފައިވާ އެންމެ ބޮޑު މައްސަލައަކީ ގެދޮރުގެ މައްސަލަ ކަމަށެވެ. އެހެންކަމުން ސިޓީ ކައުންސިލުން އެކި ޕްލޭންތައް ހަދައިގެން އެ މައްސަލަ ޙައްލުކުރުމަށް މަސައްކަތް ކުރަމުންދާ ކަމަށެވެ. މިގޮތުން ވިލިމާލޭގައާއި މާލޭގައި ހައުސިންގ ޔުނިޓުތަކެއް އެޅުމަށް ސްޓްރެޓެޖިކް އެކްޝަން ޕްލޭނުގައި ހިމަނާފައިވާކަން ފާހަގަކުރެއްވިއެވެ.

ސެޕްގައި ހިމެނޭ ވިލިމާލޭގައި 500 ހައުސިންގ ޔުނިޓު އެޅުމަށް. އަދި މާލޭގައި 2،000 ހައުސިންގ ޔުނިޓު އެޅުމަށް. އެއީ ސަރުކާރުން ހުއްދަ ދެއްވައިފިނަމަ ކައުންސިލުން އެ ހައުސިންގ ޔުނިޓުތައް އަޅަން. އޭގެ އެންމެ މުހިންމު އެއް މަސައްކަތަކީ ލޭންޑް ޔޫޒް ޕްލޭނުގައި އެ ބިންތައް ފާހަގަކުރުން. އަޅުގަނޑުމެން ކުރި ވަރަށް ބުރަ މަސައްކަތެއް އެއީ މާލޭ ރައްޔިތުންނާ އެކީގައި. އެ ޕްލޭން ހަދާފައި އަޅުގަނޑުމެން ވާނީ ރަސްމީކޮށް ހުށަހަޅާފައި ސަރުކާރަށް. މަހެއްހާ ދުވަސް ވެދާނެ. ސަރުކާރުން ހުއްދަ ލިބިގެން ފްލެޓުތައް އެޅޭނީ.

– މާލޭ ސިޓީގެ މޭޔަރު ޑރ. މުޙައްމަދު މުޢިއްޒު

މޭޔަރު ވިދާޅުވީ މި 2،500 ހައުސިންގ ޔުނިޓު އެޅުމަށް ނިންމައި މާލޭގެ ލޭންޑް ޔޫސް ޕްލޭނުގައި ވަނީ އެކަމަށް ބިންތައް ވެސް ފާހަގަކޮށްފައި ކަމަށެވެ. ފްލެޓުތައް އެޅުމުގެ މަސައްކަތް ކުރެވޭނީ ސަރުކާރުން ހުއްދަ ލިބިގެން ކަމަށާއި ނަމަވެސް މިއަދާ ހަމައަށްވެސް އެ ހުއްދަ ނުލިބޭ ކަމަށެވެ.

މީގެ އިތުރުން މޭޔަރު ވިދާޅުވީ ފްލެޓު އެޅުމަށް ފައިނޭންސް ހޯދުމަށްޓަކައި އެންމެ މުހިންމު ވަޞީލަތަކީ ވިޔަފާރި އުޞޫލުން ހިންގޭ ކުންފުންޏެއް އޮތުން ކަމަށެވެ. އެހެންކަމުން މާލޭ ސިޓީ ކައުންސިލުގެ ލޯކަލް އޮތޯރިޓީ ކޮމްޕެނީ ރަޖިސްޓަރީ ކުރުމަށް އިކޮނޮމިކް މިނިސްޓްރީއަށް ހުށަހަޅާފައިވާ ކަމަށެވެ. މިިނިސްޓްރީގައި މިކަމުގައި އެދުނުތާ ތިންމަސް ވެފައިވާއިރު އަދިވެސް އެކަންވެސް ހަމަނުޖެހޭ ކަމަށް މޭޔަރު ވިދާޅުވިއެވެ.

ހަމަޖެހިފައި އޮންނަ ޤަވާޢިދުގެ ތެރެއިން މިތަނުން ފާސްކޮށްގެން އަޅުގަނޑުމެން ފޮނުވިން އިކޮނޮމިކް މިނިސްޓްރީއަށް މާލޭ ސިޓީ ކައުންސިލުގެ ލޯކަލް އޮތޯރިޓީ ކޮމްޕެނީ ރަޖިސްޓަރ ކޮށްދެއްވުމަށް. އަޅުގަނޑުމެން ފޮނުވީ ޤަވާޢިދުގައި ހުންނަ ހުރިހާ ކަމެއް ފުރިހަމަކޮށްފައި ޑޮކިއުމަންޓު އެކުލަވާލާފައި. މިހާރު ގާތްގަނޑަކަށް ތިންމަސް ވެއްޖެ. އަދި ކުންފުނި ރަޖިސްޓަރީ ކޮށްދެއްވުމުގެ އެއްވެސް ކަމެއް ކޮށްނުދެއްވާ.

– މާލޭ ސިޓީގެ މޭޔަރު ޑރ. މުޙައްމަދު މުޢިއްޒު

ކުންފުނި ރަޖިސްޓަރީކޮށްނުދޭ ކަމާއި ލޭންޑް ޔޫސް ޕްލޭން ވެސް ފާސްކޮށްނުދޭކަން ފާހަގަކުރައްވައި މޭޔަރު ވިދާޅުވީ ސިޓީ ކައުންސިލުން ކުރިއަށް ޖެހިލާނެ އެއްވެސް މަގެއް ސަރުކާރުން ނުދައްކާ ކަމަށެވެ. ކައުންސިލުން ސަރުކާރުގައި އެދެމުންދާ ކަންކަމަކީ ސަރުކާރަށް ގެއްލުމެއް ވާނެ ކަންކަމެއް ނޫން ކަމަށާއި އެ ކަންކަމަށް ހުއްދަދީ، މަގުފަހިކޮށްދީގެން ސަރުކާރާއި މާލޭ ރައްޔިތުންނަށް ވާނީ ފައިދާ ކަމަށް ވިދާޅުވިއެވެ. އަދި މިކަންކަން ސަރުކާރުން ހަމަޖައްސައިދޭނެ ކަމަށް އަދިވެސް އުންމީދު ކުރައްވާ ކަމަށް އެމަނިކުފާނު ވިދާޅުވިއެވެ.