ރާއްޖޭގެއެކި ރަށްތަކުގައި ދިރިއުޅެމުންދިޔަ ރައްޔިތުންނަށް ބޭނުންވާ އެންމެ އަސާސީ އެއް ޚިދުމަތުގެ ތެރޭގައި ހިމެނޭ ފެނާއި، ނަރުދަމާގެ ނިޒާމަށް ސަލާންޖަހަން ޖެހުން ނިމުމަށް ގެނެސް، މިސަރުކާރުން ވެފައިވާ ވައުދު ރަނުން ރަނަށް ފުއްދައިދޭނެ ކަމުގެ ޔަގީންކަން ދެއްވައިފިއެވެ.

މި ވެރިކަން ފެށުނުއިރު ނަރުދަމާގެ ނިޒާމް ގާއިމްކުރެވިފައި އޮތީ އެންމެ 20 ޕަސެންޓް ރަށުގައެވެ. ފެނުގެ ނިޒާމް ގާއިމްވެފައި އޮތީ 37 ޕަސެންޓު ރަށުގައެވެ. ނަމަވެސް ސަރުކާރުން ވެރިކަމަށް އައުމުގެ ކުރިންނާއި ވެރިކަމަށް ވަޑައިގަތުމަށް ފަހުވެސް ވައުދުވަމުންދިޔައީ ތަރައްޤީގެ ވާހަކަ ދައްކަން ފަށަން ޖެހެނީވެސް ގައިން ތާހިރުވެގެން ކަމަށެވެ. ރައީސް ވަނީ މިއަދުވެސް އެކަން ތަކުރާރު ކުރައްވައި ގައިން ތާހިރުވެގެން ނޫނީ އެހެން އެއްވެސް ވާހަކައެއް ނުދެއްކޭނެކަމަށް ވިދާޅުވެފައެވެ.

މީހުން ދިރިއުޅޭ ހުރިހާ ރަށެއްގައި ފެނާއި ނަރުދަމާ އެޅުމަށް ވެވަޑައިގެންނެވި ވަޢުދުގެ ދަށުން މިހާރު މިމަސައްކަތް ނުފެށިވާ 16 ރަށެއްގެ ނަރުދަމާ އާއި 23 ރަށެއްގެ ފެނުގެ ނިޒާމް ޤާއިމް ކުރުމުގެ މަސައްކަތުގެ އެއްބަސްވުންތަކުގައި ސޮއިކުރުމަށް ބޭއްވި ރަސްމިއްޔާތުގައި ވާހަކަފުޅު ދައްކަވަމުން ރައީސް ވިދާޅުވީ މީހުން ދިރިއުޅޭ ރާއްޖޭގެ ހުރިހާ ރަށެއްގައި ފެނާއި ނަރުދަމާ ގާއިމުކުރުމުގެ މަސައްކަތް ސަރުކާރުގެ ފުރަތަމަ ދުވަހު ފެށި ކަމަށާއި، މަޝްރޫޢުތައް ޙަވާލު ކުރަމުން، މަސައްކަތް ނިންމާ ޚިދުމަތް ދިނުމުގައި އަވަދިނެތި ސަރުކާރު ދެމިއޮތް ކަމަށެވެ. އަދި މިކަމުގައި ސައިޒުން ކުޑަޔަސް، ނުވަތަ ބޮޑަސް، އަދި މީހުން މަދަސް، ނޫނީ ގިނަޔަސް – ސަރުކާރުން މިކަމުގައި އެއްވެސް ރަށެއް، ކުރި ފަރަގެއް، ތަފާތެއް، ނޯންނާނެ ކަމަށް ރައީސުލްޖުމްހޫރިއްޔާ ވިދާޅުވިއެވެ.

މިއަދުގެ މިޙަފްލާ އަށްފަހު ދިވެހިރާއްޖެ ފުރޮޅި އިންގިލާބް ވެގެން އެދަނީ ތަރައްގީގެ، މުޅިން އެހެން މަރުޙަލާ އަކަށް. ސައިޒުން ކުޑަޔަސް، ނުވަތަ ބޮޑަސް، އަދި މީހުން މަދަސް، ނޫނީ ގިނަޔަސް – ސަރުކާރުން މިކަމުގައި އެއްވެސް ރަށެއް، ކުރި ފަރަގެއް، ތަފާތެއް، އިރާދަކުރެއްވިއްޔާ ނޯންނާނެ. އެހެންކަމުން މިއަދަށް ފަހު ފެނާ ނަރުދަމާގެ މަސައްކަތް ޙަވާލު ނުކުރެވޭ، މީހުން ދިރިއުޅޭ އެއްވެސް ރަށެއް ދިވެހިރާއްޖެއަކު ނޯންނާނެ. ވެފައިވެސް – ދެންވާން އޮންނާނީ ހަމަ އެންމެ ގޮތެއް. އެއީ ކަމަށް ބޭނުންވާ ޢިމާރާތްތަށް އުފުލި، މެޝިނަރީ ގެނެވި، ހޮޅިތަށް ވަޅުލެވި، ތަރައްގީގެ ވާހަކަ ދައްކަން ފަށާ ހިސާބުގައި ގައިންތާހިރު ވުމުގެ ފެން މުޅިރާއްޖެ، އެކުއެކީ ހިނގާން ފެށުން.

– ރައީސުލްޖުމްހޫރިއްޔާ ވިދާޅުވިއެވެ.

President @ibusolih attends the signing of water and sewerage projects for 23 islands that previously lacked these services. pic.twitter.com/pbxhgt26ZG

— The President's Office (@presidencymv) December 29, 2021

ރައީސުލްޖުމްހޫރިއްޔާ ވިދާޅުވީ އެމަނިކުފާނު އެންމެ ފުރަތަމަ ދެއްކި ވާހަކައަކީ، އަދިވީ ވަޢުދަކީ ވެސް މިއީ ކަމަށާއި މިއަދަކީ އެވައުދު ފުއްދުމުގެ މަންޒިލަށް ބަނދަރު ކުރުމަށްޓަކާ މިގައުމުގެ ރިޔާ ތަންމިނަށް ހުޅުވާލާ، ކަންކަށިން ފޮނުފޮޅާލާ ދުވެލި ހަރުކުރި ދުވަސް ކަމަށެވެ. ރައީސުލްޖުމްހޫރިއްޔާ ވިދާޅުވީ ތަރައްގީގެ ވާހަކަ ދައްކަން ފަށަންވާނީ ވެސް ގައިންތާހިރުވެ ތިބެ ކަމަށް ބުނީ ޚުދު އެމަނިކުފާނު ކަމަށެވެ.

ތަރައްގީގެ ވާހަކަ ދައްކަން ފަށަންވާނީ ވެސް ގައިންތާހިރުވެ ތިބެ ކަމަށް ބުނީ އަޅުގަނޑު. މިހިނގާ ރިޔާސީ ދައުރަކީ، ދިވެހި ޖުމްހޫރިއްޔާގެ ޙަޔާތުން އައި އެންމެ ސާފުތާހިރު 5 އަހަރު ކަމުގައި ދެންނެވީ އަޅުގަނޑު. އަޅުގަނޑުމެންގެ ރިޔާސީ ދައުރުގައި ރާއްޖޭގައި މީހުން ދިރިއުޅޭ ހުރިހާ ރަށެއްގައި ފެނާ ނަރުދަމާ އަޅާނެ ކަމުގެ ވަޢުދުވީ ވެސް ހަމަ އަޅުގަނޑު. ސާފުތާހިރު ކަމަކީ އީމާން ކަމުގެ އެއްބައިކަމުގައި ބުނާ ދުރޫސުލް އަޚްލާގްގެ ފިލާވަޅު އަދިވެސް އަޅުގަނޑުގެ ހަނދާނުގައި ހުރޭ. އެއީ އޭގެ ޒާތުގައި މައުނަވީ ވާޖިބެއް. ނުވާނެކަމުގެ ފާޑުކިއުމާ، އަދި އިތުރަށް ވިސްނާލުމުގެ ނަޞޭޙަތާ މަޝްވަރާ އެތައް ގޮތަކުން އަޅުގަނޑަށް ލިބުނު. އެހެން ނަމަވެސް ވާޖިބަކަށް ވަޢުދުނުވެ ހުންނާކަށް އަޅުގަނޑުގެ ޒަމީރު ޖާގައެއް ނުދިން.

– ރައީސުލްޖުމްހޫރިއްޔާ ވިދާޅުވިއެވެ.

ސަރުކާރުން މިހާރުވެސް ކުންފުނިތަކާ ހަވާލުކުރެވުނު މަޝްރޫއުތަކުގެ ތެރެއިން 48 ރަށެއްގައި ނަރުދާމާގެ މަސައްކަތް ކުރިއަށް އެބަދެއެވެ. އަދި ފެނުގެ ހިދުމަތް ގާއިމްކުރުން 60 ރަށެއްގައި ހިނގަމުން އެބަދެއެވެ.