ރައްޔިތުންގެ މަޖިލީހުގެ ނޮޅިވަރަމް ދާއިރާގެ މެމްބަރު މުހައްމަދު ނަޝީދު (މޮސްޓަރ) އިދިކޮޅު ޕީޕީއެމްއާއި ގުޅޭގެކަމުގެ އިޝާރާތެއް ދެއްވައިފިއެވެ.

މިރޭ އިދިކޮޅު ކޯލިޝަނުން ބޭއްވި ޖަލްސާގައި ވާހަހަކަ ދައްކަވަމުން ނަޝީދު ވަނީ އޭނާގެ ގިނަ ޝުއޫރުތަކެއް ބަންޑުންކޮށްލާފައެވެ. ނަޝީދު ވިދާޅުވީ ސިޔާސީ ގޮތުން ކުރަންޖެހޭ ކޮންމެ މަސައްކަތެއްގައި ހުންނާނީ ޕީޕީއެމްއާއި އެކުގައިކަމަށެވެ. މަޖިލިސް އިންތިޚާބަށް މިނިވަން ކެނޑިޑޭޓެއްގެ ގޮތުގައި ނިކުންނެވި ނަމަވެސް އަބަދުވެސް ވިސްނުމާއި ފިކުރަކީ ޕީޕީއެމްގެ ވިސްނުމާއި ފިކުރުކަމަށް އޭނާ ވިދާޅުވިއެވެ.

ނަޝީދު ވިދާޅުވީ ކުރިއަށް އޮތް ތަނުގައި ޕީޕީއެމްއާއި ވަރަށް ގާތުން މަސައްކަތް ކުރުމުގެ ފުރުސަތު ބޮޑު ކަމަށެވެ. ޚާއްސަކޮށް ރައީސް ޔާމީން ތިލަދުން މައްޗަށް އަދި މެމްބަރު ނަޝީދު ނިސްބަތްވާ ނޮޅިވަރަމް ދާއިރާއަށް ވަޑައޮގެން ބޮޑު ޖަލްސާއެއް ބޭއްވުމަށް އޭނާ ވަނީ އެދިފައެވެ. އަދި އެޖަލްސާގައި ރައީސް ޔާމީނާއި، ޕީޕީއެމްގެ މެމްބަރުން އުފާވެރި އެތައް ޚަބަރެއް ލިބިގެންދާނެކަމަށް އޭނާ ވިދާޅުވިއެވެ.

އަޅުގަނޑު ދުވަހަކުވެސް ޕީޕީއެމްއާއި، ދުރަކަށް ނުދާނަން. ވަރަށް ކައިރި މުސްތަގުބަލެއްގައި ފެންނާނެ. ރައީސް ޔާމީން ވީހާވެސް އަވަހަށް ނޮޅިވަރަމް ދާއިރާއަށް ވަޑައިގަތުމަށް އަޅުގަނޑު އެދެން. އެޖަލްސާގައި ތިޔަބޭފުޅުން އަދި ރައީސް ޔާމީން އުފާވާނެ ކަންތައްތަކެއް ފެނިގެންދާނެ.

– މެމްބަރު ނަޝީދު ވިދާޅުވިއެވެ.

ނަޝީދު ވިދާޅުވީ އޭނާ މަޖިލީހުގައި މިނިވަން މެމްބަރެއްގެ ގޮތުގައި މަސައްކަތް ކުރެއްވި ނަމަވެސް އަބަދުވެސް ކަންކަމުގައި މަޝްވަރާކޮށް ގޮތް ނިންމަމުންދަނީ ޕީޕީއެމްގެ ވިސްނުމާއި އެއްގޮތަށް ކަމަށެވެ. އަދި މިދޭތެރެއިން އެހެން ސިޔާސީ ވިސްނުމަކާއިއެކު ލިބުނު ދައުވަތެއްގައި ކުރިއަށް ދިއުމަށް މަސައްކަތް ކުރި ނަމަވެސް އެކަން ކުރަން އުދަގޫވި ކަމަށާއި، އަދި އެއީ ދުވަހަކުވެސް ވާނެ ކަމެއް ނޫންކަމަށެވެ.

މެމްބަރު ނަޝީދުވަނީ އިދިކޮޅުން ހިންގާ މުޒާހަރާ ތަކާއި، އެއްވުންތަކުގައިވެސް ބައިވެރިވަމުންނެވެ. އަދި އޭނާއަކީ ރައީސް ޔާމީނަށް ވަރަށް ބޮޑަށް ތާއީދު ކުރައްވާ ޕީޕީއެމްގެ މެމްބަރުންގެ ސަޕޯޓްވެސް އޮތް ބޭފުޅެކެވެ.