މިއަދު ސަރުކާރުގެ އަމަލުތައް ހުރި ގޮތުން މިވަނީ ޤައުމީ ޔުނިވާސިޓީގައި ރައްކާކުރެވިފައިވާ ފައިސާ ކޮޅުގެ ދިފާއުގައި ރައްޔިތުން ތެދުވާންޖެހިފައި ކަމުގައި އިދިކޮޅު ޕީއެންސީގެ ނައިބް ރައީސް އަދި ކުރީގެ އިކޮނޮމިކް މިނިސްޓަރ މުހައްމަދު ސައީދު ވިދާޅުވެއްޖެއެވެ.
ސައީދު މިހެން ވިދާޅުވީ ގައުމީ ޔުނިވަސިޓީ (އެމްއެންޔޫ)އަށް ލިބޭ އާމްދަނީން ރައްކާކޮށްފައި ހުރި ފައިސާގެ ތެރެއިން 150 މިލިއަން ރުފިޔާ ސަރުކާރުގެ ޓީބިލް ގަންނަން އިންވެސްޓް ކޮށްފައިވާ ކަމަށް އެ ޔުނިވަސިޓީން ވިދާޅުވުމުން އެކަމާއި ކަންބޮޑުވުން ފާޅުކުރައްވައި ކުރެއްވި ޓްވީޓުގައެވެ. ސައީދު ވިދާޅުވީ ދައުލަތަށް އާމްދަނީ ލިބޭނެ ގޮތް ހުސްވެ ދައުލަތުގެ މާލިއްޔާ އެކީ ހުސްކުރަމުންދާކަމީ ފެންނަމުންދާ މަންޒަރުކަމަށެވެ.
މީގެ ކުރިން އެމްޑީޕީން ވަނީ ރ.ކ.އ ކޮމެޓީތަކުގައި ހުރި ފައިސާތައްވެސް ހުސްކޮށްފައި ކަމަށާއި، ޚަރަދަށް ޒިންމާވާ ޤާނޫނު 3 އަހަރު ސަސްޕެންޑުކޮށްގެން ފައިސާ ޗާޕުކޮށް، ދައުލަތް ދަރަނިވެރިކޮށްފައިވާކަމަށެވެ. އަންނަ އަހަރަށް ސަރުކާރުން ހުށަހަޅާފައިވާ ބަޖެޓުގައި ފައިސާ ހޯދަން ވިއްކާނެ ކުންފުނިތަކާއި، އެނޫންވެސް ތަންތަން ހިތައްވެސް ގެންނަން އަދި ނޭގޭކަމަށާއި، ރައްޔިތުން މިއަދު ވަނީ މުހުރިހާ ކަމަކާއި ދެކޮޅަށް ތެދުވާން ޖެހިފައިކަމަށް ސައީދު ވިދާޅުވިއެވެ.
މީގެކުރީންވެސް ވަނީ ރކއ ކޮމެޓީތަކުގައި ހުރި ފައިސާކޮޅުވެސް ހުސްކޮށްފަ. ހަރަދަށް ޒިންމާވާ ޤާނޫނު ސަސްޕެންޑު ކުރުމަށްފަހު، ޖެހިޖެހިގެން 3 ވަނަ އަހަރަށް ފައިސާ ޗާޕު ކުރުންކުރިއަށް. މިއަހަރުގެ ބަޖެޓުގައި 771 މިލިއަން ރުފިޔާ ހޯދަން ހަމަޖެހިފައިވަނީ ސަރުކާރުގެ ކުންފުނިތައް ބޭރުގެ ފަރާތްތަކަށް ވިއްކައިގެން! ވިއްކާ ކުންފުންޏެއް، ފަރާތެއްގެ މިންވަރުވެސް އެނގޭކަށްނެތް! މިހާރުމިވަނީ ޔުނިވާސިޓީގައި ރައްކާކުރެވިފައިވާ ފައިސާ ކޮޅުގެ ދިފާއުގައި ރައްޔިތުންތެދުވާންޖެހިފަ.
– ސައީދު ވިދާޅުވިއެވެ.
ރައްޔިތުންގެ މަޖިލީހުގެ ބަޖެޓް ކޮމިޓީއަށް އިއްޔެ ހާޒިރުވެވަޑައިގެން، މެންބަރަކު ކުރެއްވި ސުވާލަކާ ގުޅިގެން އެ ޔުނިވާސިޓީގެ ޗާންސެލަރު ޑރ. ހަސަން ހަމީދު ވިދާޅުވީ، ޔުނިވަސިޓީއަށް އާމްދަނީގެ ގޮތުގައި އެކި ކަންކަމުން އަހަރަކު 60 މިލިއަނެއްހާ ރުފިޔާ ލިބޭ ކަމަށެވެ. އޭގެ ތެރެއިން ހިންގުމުގެ ހަރަދަށް 21 މިލިއަން ރުފިޔާ ހަރަދުކުރާ ކަމަށްވެސް ވިދާޅުވިއެވެ.
އެކަމާ ގުޅޭ ތަފުސީލު ދެއްވަމުން ވައިސް ޗާންސެލަރު މުހައްމަދު ޝަރީފު ވިދާޅުވީ، ޔުނިވަސިޓީ އަމިއްލައަށް އޮޕަރޭޓް ކުރެވޭ ވަރަށް ފައިސާ ހުރުމަކީ މުހިންމު ކަމެއް ކަމަށެވެ. އެގޮތުން އާމްދަނީގެ ގޮތުގައި ލިބޭ ފައިސާ ހަރަދު ކުރާނެ ގޮތެއް ނިންމަނީ ޔުނިވާސިޓީގެ ކައުންސިލުން ކަމަށާއި މިއަހަރުވެސް 25 ވަަރަކަށް މިލިއަން ރުފިޔާ އެކި ކަންކަމަށް ހަރަދުކޮށްފައިވާ ކަމަށް އޭނާ ވިދާޅުވިއެވެ.
އޭގެ ތެރެއިން ބާވެ ހަލާކުވެފައިވާ ޔުނިވަސިޓީގެ "ސޮލާހުއްދީން" އިމާރާތް ކުރަން 10 މިލިއަން، މުވައްޒަފުންގެ ދިރާސާތަކަށް ފަސް މިލިއަން އަދި ފޮތް ލިޔާ މީހުންނަށް ފަސް މިލިއަން ރުފިޔާ ދީފައިވާ ކަމަށް ވިދާޅުވިއެވެ.
