ކޯވިޑް-19އަށް ޕޮޒިޓިވްވި މީހަކާއި ސިދާ ދިމާވެގެން ދުނިޔޭގެ ޞިއްޙަތު ޖަމުޢިއްޔާ، ޑަބްލިއުއެޗުއޯގެ ޑިރެކްޓަރ ޖެނެރަލް ޓެޑްރޮސް އަދަނަމް ގެބްރިއޭސުސް ކަރަންޓީނުވެ ވަޑައިގެންފިއެވެ.
އެކަން ހާމަކުރައްވާ ޓެޑްރޮސް ކުރެއްވި ޓްވީޓެއްގައި ވިދާޅުވެފައިވަނީ ކޯވިޑް-19އަށް ޕޮޒިޓިވްވި މީހަކާއި ބައްދަލުވެފައިވާ މީހުންގެ ކޮންޓެކްޓް ލިސްޓުގައި އޭނާ ހިމެނިވަޑައިގެންފައި ވާކަމަށާއި، މިއާއިއެކު އަމިއްލަފުޅަށް ކަރަންޓީނަށް ވަޑައިގެންފައިވާކަމަށެވެ.
ބަލިމީހަކާއި ދިމާވެ ޑައިރެކްޓް ކޮންޓެކްޓެއްގެ ގޮތުގައި ހުންނެވިނަމަވެސް ބަލީގެ އެއްވެސް ޢަލާމާތެއް ނުފެންނަކަމަށާއި، ހާލުކޮޅުވެސް ރަނގަޅުކަމަށް ޓެޑްރޮސް ހާމަކުރައްވާފައިވެއެވެ. އަދި ޑަބްލިއުއެޗްއޯގެ އުސޫލަތަކާއި އެއްގޮތަށް ވަޒީފާގެ ޒިންމާތައް މިވަގުތު އަދާކުރައްވާނީ އަމިއްލަފުޅު ގޭގައި ހުންވައިގެންކަމަށްވެސް ޓެޑްރޮސްވަނީ ވިދާޅުވެފައެވެ.
I have been identified as a contact of someone who has tested positive for #COVID19. I am well and without symptoms but will self-quarantine over the coming days, in line with @WHO protocols, and work from home.
— Tedros Adhanom Ghebreyesus (@DrTedros) November 1, 2020
ކޯވިޑް-19 މިދޔަ އަހަރުގެ ފަހުކޮޅު އެންމެ ފުރަތަމަ ޗައިނާއިން ފެނުނު ހިސާބުން ފެށިގެން މިހާތަނަށް މިބައްޔަށް ޢާންމުން ހޭލުންތެރިކުރުވުމަށް ޓެޑްރޮސް ވަނީ ގިނަ މަސައްކަތްތަކެއް ކުރައްވާފައެވެ. އެގޮތުން ސިލްސިލާ ނޫސްވެރިންގެ ބައްދަލުވުންތައް ބާއްވާފައިވާ ބަލީގެ ނުރައްކާތެރިކަން މީހުންގެ ސަމާލުކަމަށް ގެނެސް ބަލީގެ މައުލޫމާތު ދެއްވެމުގައި ބުރަ މަސައްކަތްތަކެއް ކުރައްވާފައިވާ އެއްބޭފުޅަކީވެސް ޓެޑްރޮސްއެވެ. އަދި މިބަލިން ރައްކާތެރިވުމަށް ޤައުމުތައް ގުޅިގެން ފިޔަވަޅުތައް އެޅުމަށްވެސް ޓެޑްރޮސް ގެންދަވަނ ތަކުރާރުކޮށް ގޮވާލައްވަމުންނެވެ.
ކޯވިޑް-19އަކީ ނުރައްކާތެރި ބައްޔެއްކަމާއި، މިއީ ބޮޑު ޕެންޑަމިކެއްކަން ޑަބްލިއުއެޗްއޯ އިން ކަނޑައެޅީ މިއަހަރުގެ މާރޗު މަހުގެ ތެރޭގައެވެ. މުޅު ދުނޔެއިން މިހާތަނަށް 46.8 މިލިއަނަށްވުރެ ގިނަ މީހުންނަށް މިބަލި ޖެހިފައިވެއެވެ.
