މަޝްހޫރުކަން ހޯދަމުން އަންނަ އެކްޓަރެސް ރަކުލް ޕްރީތު ސިންގްގެ 31 ވަނަ އުފަންދުވަހުގެ ތަހުނިޔާއާއި އެކު އޭނާގެ ލޯބިވެރިޔާ ޖެކީ ބަގްނާނީ އެދެމީހުންގެ ލޯބީގެ ގުޅުން ފޭނުންނާ ހިއްސާކޮށްފިއެވެ.
މިދިޔަ އާދިއްތަ ދުވަހު ރަކުލްއަށް އުފަންދުވަހުގެ ތަހުނިޔާ ފޮނުވުމަށް އިންސްޓަގުރާމުގައި ބަގްނާނީ ވަނީ އެދެމީހުން އަތުގައި ހިފާލައިގެން ހިގާފައިދާ ފޮޓޯއެއްވެސް ހިއްސާކޮށްފައެވެ.
ފޮޓޯއާއި އެކު ބަގްނާނީ ލިޔެފައިވަނީ ރަކުލް ނެތްނަމަ އޭނާގެ އެއްވެސް ދުވަހެއް ދުވަހަކަށް ނުވާކަމަށާއި ކިތަންމެ މީރު އެއްޗެއް ކެޔަސްއެ ހިތްހަމަޖެހުން ނުލިބޭކަމަށެވެ.
މިފަދަ ގޮތަކަށް ލޯބީ ހާމަކޮށްދީފައިވާއިރު ރަކުލްވެސް ވަނީ ހަމަ އެފޮޓޯ ހިއްސާކޮށް ޝުކުރުއަދާކޮށްފައެވެ. އަދި މިއަހަރުގެ ތެރޭގައި ލިބުނު އެންމެ ބޮޑު ހަދިޔާއަކީ ލޯބިވެރިޔާ ބަގްނާނީ ކަމަށް ރަކުލް އޭނާގެ ޕޯސްޓްގައި ބުނެފައިވެއެވެ.
View this post on Instagram
ރަކުލް ޕްރީތު ސިންގް އަކީ ބޮލީވުޑްގައި މިހާރު ކުރިއަރަމުންއަންނަ ތަރިއެކެވެ. މީގެއިތުރުން ސައުތު އިންޑިއާގެ ގިނަ ފިލްމުތަކަކުންވެސް އޭނާ ވަނީ ފެނިގެން ގޮސްފައެވެ.
ރަކުލް ޕްރީތުގެ ކުރިއަށް އޮތް ފިލްމީ މަސައްކަތަކީވެސް ބަގްނާނީ ޕްރޮޑަކްޝަން ހައުސްގެ ފިލްމެކެވެ. މިފިލްމުގައި ރަކުލް ފެނިގެންދާނީ މަޝްހޫރު އެކްޓަރ އަކްޝޭ ކުމާރާއެކުގައެވެ.
