ސާފް ޗެމްޕިއަންޝިޕް ފުޓްބޯޅަ މުބާރާތައް ތައްޔާރުވާން ގައުމީ ފުޓްބޯޅަ ޓީމު ޓްރެއިނިން ކޭމްޕަކަށް ގަތަރުގައި ކޭމްޕްކޮށްފިއެވެ.
މިއަދު ހެނދުނު ގައުމީ ފުޓްބޯޅަ ޓީމު ގަތަރަށް ފުރާފައިވަނީ 30 ކުޅުންތެރިންގެ ސްކޮޑަކާއެކުއެވެ. މި ޓްރެއިނިން ކޭމްޕަށް ފަހު ގައުމީ ޓީމު އެނބުރި ރާއްޖެ އަންނާނީ ސީދާ ސާފް ޗެމްޕިއަންޝިޕް ފުޓްބޯޅަ މުބާރާތަށެވެ. އެއީ މިމަހުގެ 28 ވަނަ ދުވަހުއެވެ.
ގައުމީ ޓީމު ޓްރެއިނިން ކޭމްޕަށް ގަތަރަށް ފުރާފައިވަނީ ކޯޗު ޢަލީ ސުޒެއިން އާއި ނުލައެވެ. ކޭމްޕަށް ފުރުމުގެ ކުރިން ހުރިހާ ކުޅުންތެރިންނާއި އޮފިޝަލުން ހެދި ޕީސީއާރު ޓެސްޓުން ކޯޗު ވަނީ ކޮވިޑަށް ޕޮޒިޓިވްވެފައެވެ. އެހެންކަމުން ކޯޗު ކޭމްޕްގައި ބައިވެރިވާނީ 14 ދުވަހުގެ ކަރަންޓީން މުއްދަތު ހަމަކޮށްފައެވެ.
މިފަހަރުގެ ސާފް ޗެމްޕިއަންޝިޕް ފުޓްބޯޅަ މުބާރާތް ކުރިޔަށްދާނީ ލީގު އުސޫލުންނެވެ. އެއީ 5 ގައުމު ވާދަކުރާތީއެވެ. އެހެންކަމުން ފައިނަލަށް ދަތުރުކުރާނީ ކޮންމެ ޓީމެއް ކޮންމެ ޓީމަކާއި ކުޅުމަށްފަހު އެންމެ ގިނަ ޕޮއިންޓް ހޯދާ ދެ ޓީމެއެވެ. މިއަހަރުގެ ސާފް ޗެމްޕިއަންޝިޕް ފުޓްބޯޅަ މުބާރާތް އޮންނާނީ އަންނަ މަހުގެ 1 އިން 16 އަށް ރާއްޖޭގައެވެ.
މުބާރާތުގައި ރާއްޖޭ ކުޅޭ ފުރަތަމަ މެޗުގައި އޮކްޓޯބަރ މަހުގެ ފުރަތަމަ ދުވަހުގެ ރޭ ނުކުންނާނީ ނޭޕާލް އާއި ދެކޮޅަށެވެ. އަދި އޮކްޓޯބަރ މަހުގެ 7 ވަނަ ދުވަހުގެ ރޭ ބަންގްލަދޭޝް އާއި ދެކޮޅަށް ނުކުންނައިރު، ތިންވަނަ މެޗުގައި ލަންކާ އާއި ދެކޮޅަށް ނުކުންނާނީ 10 އޮކްޓޯބަރ ގައެވެ. އަދި އިންޑިއާ އާއި ދެކޮޅަށް ކުޅޭ މެޗު އޮންނާނީ 13 އޮކްޓޯބަރ ގައެވެ.
