ބަޖެޓުގައި ޖަހާފައިވާ ތަރައްޤީގެ މަޝްރޫޢުތައްވެސް ދާއިރާގައި ހިނގަމުން ނުދާތީ ކުޅުދުއްފުށީ އުތުރު ދާއިރާގެ މެންބަރު ޔާސިރު ޢަބްދުއްލަޠީފް ކަންބޮޑުވުން ފާޅުކުރައްވައިފިއެވެ. ދިވެހިޜާއްޖޭގެ ބިމާއި ބެހޭ ޤާނޫނަށް ހުށައަޅަފައިވާ އިޞްލާހަށް ވާހަކަފުޅު ދައްކަވަމުން ޔާސިރު ވިދާޅުވީ، އަތޮޅުގެ ރަށްތައް އެކި ކަންކަމަށް ދޫކުރުމުގައި ރައްޔިތުންގެ ބަހެއް ހޯދަންޖެހޭނެކަމަށެވެ. ރައްޔިތުން ބޭނުންވަނީ ރާއްޖޭގެ ހުރިހާ ރަށެއްވެސް ލާމަރުކަޒީކޮށްގެން ހިންގަންކަމަށާއި، ނަމަވެސް ބައެއް އުނދަގޫ ކަންކަން ކުރިމަތިވާކަމަށެވެ.
އަޅުގަނޑުމެން ޤާނޫނުތަކެއް ހަދާފަ ޤަވާއިދުތަކެއް ހަދަން ހަވާލުކުރީމަ އަދިވެސް އަނެއްކާ ހުރިހާ ވަޒީރުން ހިފަހައްޓައިގެން އުޅޭކަން އަޅުގަނޑުމެންނަށް ފެންނަމުން އެބަދޭ. އަނެއްކާވެސް ކޮންމެ ކަމެއް ކުރަން ވަޒީރުންގެ ކައިރިއަށް އަންނަންޖެހޭތަން ފެންނަމުން އެބަދޭ އިއްޒަތްތެރި ރައީސް. އަޅުގަނޑުމެން ޤަބޫލުކުރަންޖެހޭ ހަގީގަތަކީ ރާއްޖޭގެ ރައްޔިތުން ގުޅަނީ ވަޒީރުންނަކަށް ނޫން. ޕްރޮޖެކްޓް ނުހިނގިޔަސް އެނޫންކަމެއް ނުހިނގިޔަސް ގުޅަނީ ދާއިރާގެ މެންބަރުންނަށް. އަޅުގަނޑުމެން ހުރިހާ އެންމެން އަނެއްކާވެސް ވަޒީރުން ފޫބުޑުން ދުވަންޖެހޭ ގޮތް އެބަހަދާ.
– ޔާސިރު ޢަބްދުއްލަޠީފް
އިދާރީއީ ދާއިރާތައް ލާމަރުކަޒީ އުސުލުން ހިންގަމުންދާއިރު ވަޒީރުންނަށް ފެނިވަޑައިގަންނަވާ ދިމަދިމާލުގައި މަޝްރޫޢު ހިންގާ އަދި ފެނިވަޑައި ނުގަންނަވަ ދިމާލުގައި މަޝްރޫޢު ދޫކޮށްލާ މަންޒަރުވެސް ފެންނަމުންދާކަމަށް ޔާސިރު ވިދާޅުވިއެވެ.
ވަޒީރުން ނުނަގާ ފޯނެއް ރައްޔިތުން ގުޅައިގެންނެއް. މިއަދު އަޅުގަނޑުމެން އެބަޖެހޭ ވިސްނަން ކުރިއަށް އޮތްތަނުގައި ކަންކުރަންވީ ކިހިނެއްކަން.
– ޔާސިރު ޢަބްދުއްލަޠީފް
ކުލުދުއްފުށީގައި ޕީއެސްއައިޕީގެ އެތައް މިލިއަން ރުފިޔާގެ މަޝްރޫޢުތައް ބަޖެޓްގައި އެބައޮތްކަމަށާއި، ނަމަވެސް މިއަހަރު ހިނގީ ކޮންކަމެއްތޯ ޔާސިރު ސުވާލުކުރެއްވިއެވެ.
ވަޒީރަކު ބޭނުންވާ ކަންކަން ރުއްސައިގެންތޯ އަޅުގަނޑުމެންގެ ދާއިރާގެ ކަންކަން ކުރަންވީ؟ ނޫން އަޅުގަނޑު ގަބުލެއް ނުކުރަން އެހެނެއް. މިއަދު އެބޭފުޅުންވެސް ޖަވާބުދަރީވާން ޖެހޭނެ. މިގޮތަށް ކަންކަން ދޫކޮށްލައިގެން ނުތިބެވޭނެ އިއްޒަތްތެރި ރައީސް.
– ޔާސިރު ޢަބްދުއްލަޠީފް
އިދާރީ ދާއިރާތައް ލާމަރުކަޒީ ނިޒާމުން ހިންގޭނެ ފަސޭހަ އުސޫލެއް ޤާއިމްވާންޖެހޭކަމަށް ޤަބުލުކުރައްވާކަމަށްވެސް ޔާސިރު ވިދާޅުވިއެވެ.
