އަތޮޅު ކައުންސިލްތަކުގެ ނާއިބުންގެ މުސާރަ 21،000ރ އަށް ބޮޑުކުރުމަށް މާލިއްޔަތު ކޮމިޓީން ފާސްކޮށްފިއެވެ.
ކައުންސިލްތަކުގެ ރައީސް ނެތް ޙާލަތުގައި ރައީސްގެ އެންމެހައި މަސްއޫލިއްޔަތުތައް އަދާކުރައްވަންޖެހެނީ ނައިބު ރައީސްކަމުން، އެހެން މެންބަރުންނާއި ނައިބު ރައީސްގެ މުސާރައާއި ޢިނާޔަތްތަކުގައި ފަރަޤެއް ހުންނަންޖެހޭނެކަމަށް ބަޔާންކުރައްވައި ލޯކަލް ގަވަރމަންޓް އޮތޯރިޓީން ވަނީ އަތޮޅު ކައުންސިލްގެ ނާއިބު ރައީސުންގެ މުސާރަ މުރާޖަޢާކުރުމަށް މަޖިލީހަށް ހުށައަޅުއްވާފައެވެ.
އެލްޖީއޭގެ މި ހުށައެޅުމާއި ގުޅިގެން އަތޮޅު ކައުންސިލްގެ ނައިބް ރައީސް ކަމަށް ހޮވޭ ބޭފުޅަކަށް 1000 (އެއްހާސް) ރުފިޔާގެ އެލަވަންސެއް ދެއްވުމަށް ހަނިމާދޫ ދާއިރާގެ މެންބަރު ޢަބްދުލްޣަފޫރު މޫސާ ހުށަހަޅުއްވައި، މަރަދޫ ދާއިރާގެ މެންބަރު އިބްރާހީމް ޝަރީފް ތަޢީދު ކުރައްވައި ކޮމިޓީގެ އަޤްލަބިއްޔަތުން ވަނީ އެގޮތަށް ފާސްކުރައްވާފައެވެ. މިއާއެކު އަތޮޅު ކައުންސިލްގެ ނާއިބުންނަށް މުސާރއާއި އިނާޔަތުގެ ގޮތުގައި 21،000 ރުފިޔާ ލިބޭނެއެވެ. އަތޮޅު ކައުންސިލްގެ ރައީސުންނަށް މުސާރައާއި އެލަވަންސްގެ ގޮތުގައި ލިބިވަޑައިގަންނަވަނީ 28،000 ރުފިޔާއެވެ.
މަޖިލީހުން ފާސްކޮށްފައިވާ މުސާރައިގެ އޮނިގަނޑުގައިވާގޮތުން މޭޔަރަށް މުސާރައިގެ ގޮތުގައި 30،000 ރުފިޔާ އަދި އެލަވަންސްގެ ގޮތުގައި 10،000 ރުފިޔާއާއެކު، ޖުމްލަ 40،000 ރުފިޔާގެ މުސާރައެއް ލިބިގެންދެއެވެ. ޑެޕިއުޓީ މޭޔަރަށް މުސާރައާއި އިނާޔަތުގެ ގޮތުގައި ލިބެނީ ޖުމްލަ 35000 ރުފިޔާއެވެ.. އަދި ސިޓީ ކައުންސިލް މެންބަރުންނަށް މުސާރައާއި އިނާޔަތުގެ ގޮތުގައި ލިބޭނީ 30000 ރުފިޔާއެވެ.
ރަށު ކައުންސިލްގެ ރައީސްގެ މުސާރައިގެ ގޮތުގައި 15،400 ރުފިޔާ އަދި އިނާޔަތުގެ ގޮތުގައި 4،600ރުފޮޔާއާއެކު ޖުމުލަ މުސާރަ 20،000 ރުފިޔާ ލިބެއެވެ. ކައުންސިލުގެ ނައިބު ރައީސްގެ މުސާރަ އަކީ 15،000 ރުފިޔާއެވެ. ކައުންސިލް މެންބަރުންގެ މުސާރަ އަކީ 13000 ރުފިޔާއެވެ.
ދިވެހިރާއްޖޭގެ އިދާރީ ދާއިރާތައް ލާމަރުކަޒީ އުޞޫލުން ހިންގުމުގެ ޤާނޫނަށް ގެނެވުނު އިސްލާހްގެ ދަށުން ކައުންސިލްތަކުގެ އޮނިގަނޑަށް އައިސްފައިވާ ބަދަލުގެ ސަބަބުން މުސާރައާއި ޢިނާޔަތުގެ ގޮތުގައި މަހަކަށް 13،508،000 ރުފިޔާ އަދި އަހަރަކަށް 162،096،000 ރުފިޔާ ޚަރަދުވާނެކަމަށް ކޮމިޓީން ވަނީ ލަފާކޮށްފައެވެ.
ދިވެހިރާއްޖޭގެ އިދާރީ ދާއިރާތައް ލާމަރުކަޒީ އުސޫލުން ހިންގުމުގެ ޤާނޫނަށް އެންމެ ފަހުން ގެނެސްފައިވާ އިޞްލާހުތަކާއެކު ކައުންސިލްތަކަށް ބޮޑެތި ބާރުތަކެއް ވަނީ ލިބިގެންގޮސްފައެވެ. އެގޮތުން ރަށުގެ އިޙްތިޞާސްގެ ތެރެއިން ވާކަންކަމުން އާމްދަނީ ހޯދުމާއި، ދައުލަތުގެ ބަޖެޓުން ކައުންސިލްތަކަށް ފައިސާ ދިނުމާއި، މުނިސިޕަލް ޚިދުމަތްތަކުން ލިބޭ އާމްދަނީ ކައުންސިލްތަކަށް ސީދާ ލިބޭގޮތަށް ވަނީ ކަނޑައަޅާފައެވެ. އަދި ޤާނޫނު އަސާސީއަށް ގެނައި އިޞްލާހާއެކު އައު ކައުންސިލްތަކުގެ ދައުރު ވަނީ ތިން އަހަރުން 5 އަހަރަށް އިތުރުކޮށްފައެވެ.
