ލާމަރުކަޒީ ނިޒާމުގެ ބައްޕައަކީ އެމްޑީޕީކަމަށާއި، ލާމަރުކަޒީ އުސޫލުން އިދާރީ ދާއިރާތައް ހިންގުމަށްޓަކައި، ޤާނޫނުން ދީފައިވާ ބާރުވެރިކަން ކައުންސިލްތަކަށް ދިނުމަށް ބިމާބެހޭ ޤާނޫނަށް ހުށަހެޅުނު އިސްލާހުތަކަކީ، ރަށްރަށުގެ ބިމުގެ މިލްކުވެރިކަން ރަށްރަށުގެ ރައްޔިތުންނަށް ދިނުމަށް ހުށަހެޅުނު މުހިންމު އިސްލާހެއް ކަމުގައި ބިލު ހުށަހެޅުއްވި މަތިވެރި ދާއިރާގެ މެމްބަރު ހަސަން ޒަރީރު ވިދާޅުވެއްޖެއެވެ.
ބިލް ހުށަހެޅުއްވުމަށްފަހު ވާހަކަ ދައްކަވަމުން ބިލް ހުށަހެޅުއްވި މެމްބަރު ހަސަން ޒަރީރު ވިދާޅުވީ ބިމާއިބެހޭ ޤާނޫނަށް ހުށަހެޅުނު އިސްލާހަކީ ކައުންސިލްތަކަށް މާލީ ބާރުވެރިކަން ލިބިދިނުމަށް ސަރުކާރުން ތަނަވަސްކޮށްދޭ އެންމެ ފަހި ފުރުސަތުކަމަށެވެ. ނިމިދިޔަ ވެރިކަން ތަކުގައި ބިންތަކާއި، ބިމުގެ މިލްކުވެރިކަމަކީ ރައީސުލްޖުމްހޫރިއްޔާ އޮފީހުން ނިންމަމުންދިޔަ ކަންތައްތަކެއް ކަމަށް ވީނަމަވެސް މިސަރުކާރުން އެކަން ބަދަލުކޮށްލަނީ އަތޮޅުތެރޭގެ ރަށްރަށުގެ ކައުންސިލްތަކަށް ކަމަށެވެ.
"އަޅުގަނޑު ކޮށްލަން ބޭނުންވާ ސުވާލަކީ ކޮންކަމެއް ތިޔަބޭފުޅުންގެ ވެރިކަމުގައި ކޮށްދެވިގެންތޯ 2023 ތިޔަބޭފުޅުންނަށް ކަށަވަރުވެގެން ތިޔަ އުޅެނީ. އަޅުގަނޑުމެންނަށް ކަންކަންވީގޮތް ފެނުނު. މާލެ ސިޓީ ކައުންސިލް އުޅުނު ހާލު ފެނުނު. ލާމަރުކަޒީ ޤާނޫނުންނައި، ޤާނޫނު އަސާސީން ލިބިދީފައިވާ ބާރުތައް ނިގުޅައިގަނެ ކުޑަމިނިން އޮފީހުންވެސް ބޭރުކޮށް މަގުމަތިކޮށްލި. މާލަރުކަޒީ ނިޒާމަކީ އެމްޑީޕީގެ ފިކުރެއް. މިނިޒާމުގެ ބައްޕައަކީވެސް އެމްޑީޕީ." ޒަރީރު ވިދާޅުވިއެވެ.
ބިމާއިބެހޭ ޤާނޫނަށް ހުށަހެޅި އިސްލާހުތަކުގެ އިބްތިދާޢީ ބަހުސްގެ މަރުހަލާ މިއަދު ވަނީ ފަށާފައެވެ. ޤާނޫނަށް ހުށަހެޅި އިސްލާހުތަކުގެ ތެރޭގައި، ކައުންސިލްތަކުގެ މިލްކުވެރިކަމުގެ ދަށުގައިވާ ބިން އެ ކައުންސިލުތަކުން ދޫކޮށް، ކުއްޔަށްދީ، ހެދުމުގެ ބާރުގެވެސް ދީފައިވެއެވެ. ރަށްރަށުގެ ބިންތަކުގެ ތެރެއިން ދިރިއުޅެންނޫން ބޭނުންތަކަށްވެސް ބިންތައް އެކިބޭނުންތަކަށް، ދޫކުރުމުގެ ބާރުވެސް ކައުންސލްތަކަށް ލިބިދެއެވެ.
ބިމުގެ މިލްކުވެރިކަން ކައުންސިލްތަކަށް ލިބިގެންދާއިރު، ކައުންސިލުތަކުގެ މިލްކުވެރިކަމުގެ ދަށުގައިވާ ބިންތައް ބޭނުންކުރަންވާނީ އަދި އެކި ފަރާތްތަކަށް ދޫކުރަންވާނީ، ނުވަތަ ކުއްޔަށް ދޭންވާނީ، އެ ބިން އޮތް ރަށެއް ނުވަތަ ސިޓީއަކަށް ކަމާބެހޭ ޤާނޫނުގައިވާ ގޮތުގެމަތިން ކަނޑައެޅިފައިވާ ލޭންޑް ޔޫސް ޕްލޭނާ އެއްގޮތްވާ ގޮތުގެމަތިންކަމަށް ވަނީ ބުނެފައެވެ.
