ރާއްޖޭގެ އެކި ރަށްތަކުގައި، ލޯކަލް ކައުންސިލްތަކަށް އަލަށް އިންތިހާބުވި ކައުންސިލަރުން މަގާމުގެ ހުވާ ކުރައްވައިފި އެވެ.
މިއަދު ގިނަ ކައުންސިލަރުން މަގާމްގެ ހުވާ ކުރައްވާފައިވަނީ، އޮންލައިންކޮށް ބޭއްވުނު ރަސްމިއްޔާތުތަކުގައެވެ. އެހެންނަމަވެސް، މަދު ރަށްތަކެއްގައި، އާންމު ރައްޔިތުންނަށް ވަނުން މަނާކޮށް، ކައުންސިލަރުން ހާޒިރުވެ ތިބެގެން، އެޗްޕީއޭގެ ގައިޑްލައިންތަކާ އެއްގޮތަށް އެޅިފައިވާ ފިޔަވަޅުތަކާއެކު، ބޭއްވުނު ރަސްމިއްޔާތު ތަކުގައިވެސް ބައެއް ކައުންސިލަރުން ހުވާ ކުރައްވާފައިވެއެވެ. ކައުންސިލަރުންގެ ހުވާ ލާ ދެއްވާފައިވަނީ ރަށްރަށުގެ މެޖިސްޓެރޭޓުންނެވެ.
އަދި މީގެ އިތުރުން، ރަށްރަށުގެ އަންހެނުންގެ ކޮމިޓިތަކަށް އިންތިޚާބުވި މެމްބަރުންނާ މިއަދު ވަނި މަގާމްގެ ލިޔުންވެސް ހަވާލު ކުރައްވާފައެވެ. ލޯކަލް ކައުންސިލްތައް ވުޖުދުވުމަށްފަހު، އިންތިޚާބުކޮށްގެން އަންހެނުންގެ ކޮމިޓީތައް އިންތިޚާބު ކުރި މިއީ ފުރަތަމަ ފަހަރެވެ. އަދި، މީގެ ކުރިން ކައިންސިލަރުން އިންތިޚާބު ކޮށްފައިވަނީ 3 އަހަރު ދުވަހުގެ މުއްދަތަށް ކަމުގައި ވި ނަމަވެސް، މި ފަހަރު އިންތިޚާބު ކުރި ކައުންސިލަރުންނާއި އަދި އަންހެނުންގެ ކޮމިޓީތަކުގެ މެމްބަރުންނަށްވެސް ފުރަތަމަ ފަހަރަށް 5 އަހަރު ދައުރެއް ލިބިގެން ދާނެއެވެ.
ލޯކަލް ގަވަރުމަންޓް އޮތޯރިޓީން ކައުންސިލަރުން ހުވާކުރުމުގެ ރަސްމިއްޔާތު އޮންލައިން ކޮށް ބޭއްވުމަށް ނިންމާފައިވަނީ، ކޮވިޑް 19ގެ ނުރައްކާ މާލެއާއި މުޅި ރާއްޖެއަށް ފެތުރި، ގިނަ ރައްތަށް މޮނިޓަރިންގަ ވާތީއެވެ.
އާ ދައުރަކަށް ކައުންސިލަރުން މިއަދު ހުވާ ކުރެއްވިއިރު، މި ސަރުކާރު ވެރިކަމަށް އައުމަށްފަހު، ކައުންސިލްތަކުގެ ގާނޫނަށް ވަނީ ބޮޑެތި ބަދަލުތަކެއް ގެނެސް، ކައުންސިލްތަކަށް އިތުރު ބާރުތަކެއް ދީފައެވެ. މީގެތެރޭގައި، ކައުންސިލްތަކަށް ކުންފުނި އުފައްދައިގެން ވިޔަފާރިކޮށް އާމްދަނީ ހޯދޭނެ ފުރުސަތު ދިނުންވެސް ހިމެނެއެވެ.
މިއަދު ހެނދުނު ގިނަ ކައުންސިލަރުން ހުވާ ހުވާ ކުރައްވާފައި ވިނަމަވެސް، ހައިކޯޓަށް ހުށަހަޅާފައިވާ އިންތިހާބީ ޝަކުވާތަކަކާ ގުޅިގެން ބައެއް ރަށްތަކުގެ ބައެއް ކައުންސިލަރުން މިއަދު ހުވާކުރައްވާފައެއް ނުވެ އެވެ. މިގޮތުން، ހއ. ފިއްލަދޫ، ށ. ބިލަތްފަހި، ކ. ތުލުސްދޫ، ތ. ކަނޑޫދޫ، ލ. މާބައިދޫ އަދި ގއ. ކޮނޑޭގެ ބައެއް ކައުންސިލަރުން މިއަދު ހުވާކުރައްވާފައެއް ނުވެއެވެ.
