އެމެރިކާގެ ކުރީގެ ރައީސް ޑޮނަލްޑް ޓްރަމްޕް މުޅިން އާ ވެބްސައިޓެއް ލޯންޗް ކޮށްފިއެވެ. މި ވެބްސައިޓުގައި ބުނާގޮތުން، މި ޕްލެޓްފޯމަށް މައުލޫމާތާއި ޚަބަރުތައް އަންނާނީ ސީދާ ޓްރަމްޕްގެ ޑެސްކުންނެވެ.

ޓްރަމްޕްގެ ވެރިކަން ނިމެމުން ދަނިކޮށް، އޭނާ ހިތްވަރުދީގެން އެމެރިކާގެ ގާނޫނު ހަދާ މަޖިލީހަށް އޭނާގެ ސަޕޯޓަރުން ހަމަލާ ދިނުމާއި ގުޅިގެން، ޓުވިޓައާއި ފޭސްބުކް އަދި ޔޫ ޓިއުބުންވެސް ޓްރަމްވަނީ 'ބޭން' ކޮށްފައެވެ.

އެއަށްފަހު ޓްރަމްޕް ސްޓޭޓްމަންޓަތައް އާންމު ކުރަމުން އައިސްފައިވަނީ، ޕްރެސް ރިލީސްތަކުގެ ގޮތުގައެވެ. އެހެންނަމަވެސް މި ހުރިހާ ޕްރެސް ރިލީސްތަކެއްވެސް ދެން އާންމު ކުރެވިގެންދާނީ، ޓްރަމްޕް ލޯންޗްކުރި މި އާ ޕްލެޓްފޯމްގައެވެ.

މި އާ ޕްލެޓްފޯމް ޑިޒައިން ކޮށްފައިވަނީ، ކިޔުންތެރިންނަށް ޕޯސްޓްތަކަށް 'ލައިކް' ދެވޭގޮތަށާއި އަދި މީގެ އިތުރުން ޓުވިޓަރ އަދި ފޭސްބުކް އެކައުންޓްތަކުގައި ޝެއަރވެސް ކުރެވޭ ގޮތަށެވެ.

ޓްރަމްޕްގެ މައުލޫމާތު ފޯރުކޮށްދޭ އާ ޕްލެޓްފޯމު ލޯންޗް ކޮށްފައި މިވަނީ، ފޭސްބުކްގެ އޯވަރސައިޓް ބޯރޑުން، ދާއިމީކޮށް ޓްރަމްޕް 'ބޭން' ކުރުމާމެދު ގޮތެއް ނިންމުމަށް އެންމެ ދުވަހަކަށް ވެފައި ވަނިކޮށެވެ.

ޓްރަމްޕްގެ ސީނިއަރ އެޑްވައިޒަރ ޖެސަން މިލަރ މި އަހަރުގެ މާރޗްމަހު ވިދާޅުވެފައިވަނީ، ޓްރަމްޕްގެ ސޯޝަލް މީޑިއާ ޕްލެޓްފޯމް އޭނާ ވަރަަށް އަވަހަށް ލޯންޗު ކުރައްވާނެ ކަމަށެވެ. އަދި އޭނާ ވިދާޅުވެފައިވަނީ، މިޕްލެޓްފޯމު ވެގެންދާނީ ވަރަށް ވަރުގަދަ ޕްލެޓްފޯމަށް ކަމަށެވެ. އެހެންނަމަވެސް މިލަރ އަންގާރަ ދުވަހު ޓުވީޓު ކޮށްފައި ވާގޮތުގައި، މި އިފްތިތާހު ކުރެވިގެންދިޔަ މި ވެބްސައިޓަކީ ކުރިން އޭނާ ވިދާޅުވި ސޯޝަލްމީޑިއާ ޕްލެޓްފޯމު ނޫން ކަމުގައެވެ.

"އެ ޕްލެޓްފޯމާ ގުޅޭ މައުލޫމާތު އަހަރެމެން ވަރަށް އަވަހަށް ފޯރު ކޮށްދޭނަން،" މިލަރ ޓްވީޓް ކުރައްވާފައި ވެއެވެ.

ޓްރަމްޕްގެ މައުލޫމާޓު ފޯރުކޮށްދޭ މި ވެބްސައިޓް ޑިޒައިން ކޮށްފައިވަނީ، ޓްރަމްޕްގެ ކުރީގެ ކެމްޕޭން މެނޭޖަރ ބްރެޑް ޕާރސްކޭލްގެ ކެމްޕެއިން ނިއުކުލިއަސް ކުންފުނިންނެވެ.

އަލަށް މި އިފްތިތާހު ކުރެވުނު ވެބްސައިޓުގައި މިހާރުވެސް ވަނީ، އެމެރިކާގެ ނިމިދިޔަ ރިޔާސީ އިންތިޚާބު އޮޅުވާލާފައިވާ ކަމަށް ޓްރަމްޕް ކޮށްފައިވާ އެތަކެއް ތުހުމަތުތަކެއް ތަކުރާރުކޮށް ޝާޢިއު ކޮށްފައެވެ.

ޓްރަމް ދާއިމީ ގޮތެއްގައި ފޭސްބުކު އިން 'ބޭން' ކުރުމާމެދު ފެސްބުކް އޯވަރ ސައިޓް ބޯޑުން މިއަދު ގޮތެއް ނިންމުމަށް ވަނީ ހަމަޖެހިފައެވެ. އަދި ޓްރަމްޕަށް ފޭސްބުކު ބޭނުން ކުރުމުގެ ފުރުސަތު ދިނުމަށް ބޯޑުން ނިންމައިފި ނަމަ، ޓްރަމްޕްގެ އެކައުންޓް އަލުން އެކްޓިވޭޓް ކުރުމަށް 7 ދުވަހުގެ ފުރުސަތެއް ލިބިގެން ދާނެއެވެ.

ޔޫ ޓިއުބުން ބުނެފައިވަނީ، އެ ޗެނަލުން އަލުން ޓްރަމްޕަށް ފުރުސަތު ދޭނީ "ހިގަމުންދާ ހަމަ ނުޖެހުންތަކަށް ލުއެއް ލިބުމުން،" ކަމުގައެވެ.

88 މިލިއަން މީހުން ފޮލޯ ކުރަމުންދިޔަ ޓްރަމްޕްގެ ޓުވިޓަރ އެކައުންޓް ޓުވިޓަރއިން ވަނީ ދާއިމީކޮށް 'ބޭން' ކޮށްފައެވެ.