ކަންގަނާ ރަނާވަތުގެ ނަން ބުނުމުން އެންމެ އަވަހަށް ހިތަށް އަންނަނީ "ޗަޕްލޫސީ" މި ބަސް ކަމަށް ޒުވާން ތަރި އަލާޔާ އެފް ވަނީ ބުނެފައެވެ. ބޮލީވުޑްގެ ބަތަލާ މިހެން ބުނެފައިވަނީ ޗެޓް ޝޯވއެއްގައި އޭނާއާ ކުރި ސުވާލަކަށް ޖަވާބު ދެމުންނެވެ.
މި ޝޯވގައި އަލާޔާ އާ ކުރި ސުވާލަކީ ފިލްމީ ތަރިންގެ ނަން އަޑު އިވުމުން އެންމެ ފުރަތަމަ ހިތަށް އަރަނީ ކޯއްޗެތޯއެވެ. އެގޮތުން އާލިއާ ބަޓް، ކާތިކް އާރިޔަން، ސާރާ އަަލީ ޚާން އަދި ކަންގަނާގެ ނަން މިސުވާލާ އެކު، އޭނާ ކައިރީ އަހާފައި ވެއެވެ.
އާލިއާ އޭ ބުނުމުން އެންމެ ފުރަތަމަ ހިތަށް އަރަނީ ގަންގޫބާއިގެ ޓްރެއިލާ ކަމަށް އަލާޔާ ވަނީ ބުނެފައެވެ. އަދި އޭނާއަށް މި ޓްރެއިލާއިން އާލިޔާގެ އެކްޓިން ވަރަށް ކަމުދިޔަ ކަމަށްވެސް ވަނީ ބުނެފައެވެ. ސާރާ އޭ ބުނުމުން ހިތަށް އަރަނީ "ސަންސްކާރީ" ކަމަށާއި، ކާތިކް އޭ ބުނުމުން އެންމެ ފުރަތަމަ ވިސްނެނީ އޭނާގެ ކުރިއަށް އޮތް ފިލްމު "ދަމާކާ" އާމެދު ކަމަށް އަލާޔާ ވަނީ ބުނެފައެވެ.
މީގެ އިތުރުން ކަންގަނާއޭ ބުނުމުން "ޗަޕްލޫސީ" ހިތަށް އަރަނީ މިއީ ކަންގަނާ ވަރަށް ގިނައިން ބޭނުން ކުރާ ބަހަކަށް ވާތީކަމަށް ވެސް އަލާޔާ ވަނީ ބުނެފައެވެ.
View this post on Instagram
ބޮލީވުޑްގެ މަޝްހޫރު ތަރި ކަބީރް ބޭދީގެ ކާފަދަރިފުޅު އަލާޔާ އެފް، ފިލްމީ ދާއިރާއަށް ތައާރަފްވީ މިއަހަރު ކުރީކޮޅު ނެރުނު ފިލްމު "ޖަވާނި ޖާނެމަން" އިންނެވެ. އެ ފިލްމުން އޭނާއަށް ވަނީ ފިލްމުފެއަރ އެވޯޑްސްގެ އެންމެމޮޅު ޑެބިއު އެކްޓްރެސްގެ އެވޯޑްވެސް ލިބިފައެވެ.
