މިހަފްތާގެ ހޮނިހިރު ދުވަހު އެކަނިވެސް އިންޑިއާގައި 346,786 މީހުން ކޯވިޑް19އަށް ޕޮޒިޓިވް، ރެކޯޑް އަދަދަކަށް އިންޑިއާގައި މީހުން ދަނީ މިބައްޔަށް ޕޮޒިޓިވް ވަމުންނެވެ.
އިންޑިއާ ސަރުކާރާއި އަދި ސައިޓިފިކް ގޮތުން މިބަލީގެ ހިސާބުތައް ބަލަހައްޓަމުންދާ ފަރާތްތަކުގެ ހިސާބުތައް ދައްކާގޮތުން، މިއީ، ކޯވިޑް19އަށް މީހުން ޕޮޒިޓިވް ވަމުންދާ ނިސްބަތް މުޅި ދުނިޔޭގެ ނިސްބަތުން ރެކޯޑު އަދަދަދެއްގައި އިންޑިއާގައި ދެމެހެއްޓެމުން ދާތާ 3 ވަނަ ދުވަހެހެވެ.
މީގެ އިތުރުން ކޯވިޑް19 އާއި ގުޅިހުންރި 2,624 މީހަކު ފާއިތުވެދިޔަ 24 ގަޑިއިރުގެ ތެރޭގައިވެސް އިންޑިއާގައިވަނީ މަރުވެފައެވެ. މިއީ މި ޕެންޑަމިކް ތެރޭގައި އެއްދުވަހެއްގައި އެންމެ ގިނަ އަދަދަކަށް އިންޑިއާގައި މީހުން މަރުވި ދުވަހެވެ.
މިހާތަނަށް އިންޑިއާގައި ޖުމްލަ 189,544 މީހުންވަނީ މިބަލީގައި މަރުވެފައެވެ.
އިންޑިއާގައި އާދަޔާ ޚިލާފަށް ގިނަ އަދަދަކަށް ކޯވިޑް19އަށް މީހުން ޕޮޒިޓިވްވާން ފަށާފައިވުމާއި ގުޅިގެން، އެގައުމުގެ ހޮސްޕިޓަޕްތައް ފުރި، ސިއްޙީ ފަރުވާ ފޯރުކޮށްދިނުމުގައި ވަނީ ބޮޑެތި ދަތިތަކާ ކުރިމަތި ލާން ޖެހިފައެވެ. މިގޮތުން، އައިސީޔީ އެދުތަކާއި، ބޭހާއި، ބޭނުންވާ އޮކްސިޖަނާއި އަދި ވެންޓިލޭޓަރުތައްވެސް ބޭނުންވާ ވަރަށް ފޯރު ކޮށްދިނުމުގައި ވަނީ ބޮޑެތި ދަތިތަކާ ކުރިމަތި ލާން ޖެހިފައެވެ.
އަދި މީގެ އިތުރުން، މަރުވާ މީހުގެ އަދަދު އިންތިހާއަށް މައްޗަށްގޮސް، އަންދާލަން ޖެހިފައިވާ ނުވަތަ ވަަޅުލާން ޖެހިފައިވާ މީހުންގެ ހަށިތަކުން މޯޗަރީތައްވެސް ވަނީ ފުރި ބާރުވެފައެވެ.
އިންޑިއާގެ ޖައިޕޫރު ގޯލްޑެން ހޮސްޕިޓަލްގެ މެޑިކަލް ޑައިރެކްޓްރ ޑރ. ޑީކޭ ބަލޫޖާއާއި ހަވާލާދީ ބައެއް މީޑިއާތަކުން ރިޕޯޓު ކޮށްފައިވާ ގޮތުގައި، އިންޑިއާގެ ވެރިރަށް ޑެލްހީގެ ހޮސްޕިޓަލެއްގައި އޮކްސިޖަން ސަޕްލައި ހުސްވެ، އޮކްސިޖަން ފޯރުކޮށް ނުދެވިގެން، އައިސޫގައި ފަރުވާ ދެމުންދިޔަ 20 ބަލި މީހަކު ހުކުރު ދުވަހުގެ ރޭ ވަނީ މަރުވެފައެވެ.
ކޯވިޑް ބަލީގައި އެޑްމިޓް ކުރަންޖެހޭ މީހުންގެ އަދަދު އިތުރުވެ، ފާއިތުވި ދެ ހަފްތާއެއްހާ ދުވަހުތެރޭގައި، ވެރިރަށް ޑެލްހީގެ ގިނަ ހޮސްޕިޓަލްތަކަށް ވަނީ ވަރަށް ބޮޑަށް އޮކްސިޖަންގެ ދަތިކަން ފޯރާފައެވެ.
އިންޑިއާގެ ވެރިރަށް ނިއު ޑެލްހީގައި އެކަނިވެސް، ހޮނިހިރު ދުވަހު 24,331 މީހުންވަނީ ކޯވިޑް19އަށް ޕޮޒިޓިވް ވެފައެވެ. އަދި 348 މީހަކުވަނީ މިބަލީގައި އެދުވަހު އެކަނިވެސް މަރުވެފައެވެ.
އިންޑިއާގެ ހެލްތު މިނިސްޓްރީން އާންމު ކޮށްފައިވާ ތަފާސް ހިސާބުތަކަށް ބަލާއިރު، ޕެންޑަމިކް ފެށުނުފަހުން އިންޑިއާގައި، 16.6 މިލިއަން މީހުން މިބައްޔަށް ޕޮޒިޓިވް ވެފައި ވެއެވެ.
ހޮނިހިރު ދުވަހު އިންޑިއާގައި ކޯވިޑް19 އަށް ޕޮޒިޓިވް ވެފައިވާ މީހުން އަދަދަކީ، ދުނިޔޭގައި މިހާތަނަށް އެއް ދުވަހެއްގައި މީހުން ކޯވިޑް19އަށް ޕޮޒިޓިވް ވުމުގައި ރެކޯޑް އަދަދެކެވެ.
އިންޑިއާއަކީ ދުނިޔޭގައި ދެވަނައަށް އެންމެ އާބާދީ ބޮޑު ގައުމެވެ. މިގޮތުން އެގައުމުގެ އާބާދީއަކީ، އެމެރިކާގެ އާބާދީގެ 4 ގުނައާއި އެއްވަރުގެ އަދަދެކެވެ. އެހެންނަމަވެސް، އާބާދީގެ ނިސްބަތުން އަދިވެސް އިންޑިއާ އުޅެނީ ޕޮޒިޓިވް ވާމީހުންގެ ނިސްބަތް އެމެރިކާއަށްވުރެ ފަހަތުގައެވެ. މިއީ ކޮންމެ މިލިއަނަކަށް، ކޯވިޑް19އަށް މީހުން ޕޮޒިޓިވް ވަމުންދާ މީހުންގެ ނިސަބަތުން ދައްކާ ތަފާސް ހިސާބުގެ ނަތީޖާއެވެ.
އެހެންނަމަވެސް، ދުނިޔޭގެ ސިއްހަތު ޖަމިއްޔާގެ ހިސާބުތައް ދައްކާގޮތުން، ފާއިތު ވެދިޔަ ހަފްތާގައި، މުޅި ދުނިޔޭގައި ކޯވިޑް19އަށް ޕޮޒިޓިވްވި މީހުންގެ %28 އަކީ އިންޑިއާގައި ކޯވިޑް19އަށް ޕޮޒިޓިވް ވެފައިވާ މީހުންނެވެ.
