ބޮލީވުޑްގެ ތަރިންގެ ތެރެއިން ސޯނޫ ސޫދް ކޯވިޑްގެ ޕްނެޑަމިކްގައި ފާހަގަވަނީ އެކިއެކި ބޭނުންޖެހިފައިވާ މީހުނަށް އެހީތެރިވުމުގައި ނަމޫނާ ތަރިއެއްގެ ގޮތުގައެވެ. އެގޮތުން ކޯވިޑްގެ ސަބަބުން ހާލުގައި ޖެހުނު އެތަކެއް ބަޔަކަށް ސޯނޫގެ އެހީތެރިކަން ވަނީ ލިބިފައެވެ.
މި ސަބަބުތަކާހުރެ ސޯނޫ ކޯވިޑަށް ޕޮޒިޓިވްވީ ޚަބަރަކީ ގިނަބަޔަކު މާޔޫސްކޮސްލި ޚަބަރެކެވެ. އޭނާ ކޯވިޑަށް ޕޮޒިޓިވް ވީކަން ސޯޝަލްމީޑިއާ މެދުވެރިކޮށް ހާމަކުރީ މީގެ ހަފްތާއެއްހާ ދުވަސް ކުރިންނެވެ.
އިންޑިއާގައި ކޯވިޑް 19 ފެތުރެން ފެށުމާއެކު ސޯނޫ ވަނީ ދަތިހާލުގައި ޖެހިފައި ތިބި ހިޖުރަކޮށްގެން އުޅޭ މަސައްކަތްތެރިން އެމީހުންގެ އަމިއްލަ ވަޒަނަށް ދިއުމަށް އެހީތެރިކަން ފޯރުކޮށްދީ އެފަދަ މީހުންގެ ކެއިން ބުއިމުގެ ކަންކަން ބަލަހައްޓާފައެވެ. އަދި ކާބޯތަކެރި ބެހުމުގައި އަމަލީގޮތުންވެސް ހަރަކާތްތެރިވެފައި ވެއެވެ.
މިފަދަ ސަބަބުތަކާހުރެ ސޯނޫ ސޫދް ވަނީ ވަރަށް ގިނަ ބައެއްގެ ހިތުން ޖާގަ ހޯދާފައެވެ. އެހެންކަމުން އޭނާ ކޯވިޑަށް ޕޮޒިޓިވް ވުމާއެކު ގިނަބަޔަކު އޭނާއަށް އަވަސް ޝިފާއަކަށް އެދި ކޮމެންޓުތައް ކޮށްފައިވެ އެވެ.
ސޯނޫ ކޯވިޑް 19 އިން ރަނަގަޅުވީކަން އޭނާ ހާމަކުރީ ހުކުރުދުވަހު ކުރި ޓްވީޓެއްގައެވެ. މި ޓްވީޓްގައި ނެގެޓިވް ވީކަމުގެ ނިޝާން އަތުންގެ އިޝާރާތުން ދައްކާފައިވެއެވެ.
Tested: COVID-19 Negative. pic.twitter.com/wF61zXVJ6m
— sonu sood (@SonuSood) April 23, 2021
އިންޑިއާގައި ކޯވިޑްގެ ހާލަތު މިހާރުވަނީ މިވީހާތަނަށް ގޯސްނުވާ މިންވަރަށް ގޯސްވެފައެވެ. އެގޮތުން ފާއިތުވީ ހަފްތާއެއްގެ ތެރޭ އެވްރެޖްކޮށް ދުވާލަކު 3 ލައްކައާ ގާތްކުރާވަރަށް އިންޑިއާގައި މިބައްޔަށް މީހުން ޕޮޒިޓިވްވެފައިވެ އެވެ. މިއީ މިދިޔަ އަހަރު ކޯވިޑްގެ ހާލަތު މުޅި ދުނިޔޭގައި ގޯސްވީއިރުވެސް އިންޑިއާގައި ކޯވިޑް ފެތުރުނު ނިސްބަތައްވުރެ 3 ގުނަ އިތުރު އަދަދެކެވެ.
