ސުޕަސްޓަރ ޝާހްރުކް ޚާނާއި ދީޕިކާ ޕަޑްކޯން ގެ ފިލްމު "ޕަތަން" އިން ޖޯން އަބްރަހަމް ފެނިގެންދާނެ ކަން ކަށަވަރު ވެއްޖެއެވެ.
މި ފިލްމުގައި ޖޯން ފެންނާނީ ވިލަން (ނުބައި މީހެއްގެ) ރޯލުންނެވެ. ފިލްމުގައި ޖޯން ފެނިގެންދާނެ ބައިތަކުގެ ޝޫޓިންގ މިހާރު ފަށާފައި ވާކަމަށް ރިޕޯޓްތައް ބުނެއެވެ.
"ޕަތަން" އަކީ ގިނަ ދުވަސްތަކަށްފަހު ޝާރުކްގެ ފެނިގެންދާ ފިލްމަކަށްވުމާ އެކުގައި، މި ފިލްމަށް ވަރަށް ގިނަ ބެލުންތެރިންދަނީ އިންތިޒަރު ކުރަމުންނެވެ.
ޔަޝް ރާޖްގެ މި ފިލްމް ޑައިރެކްޓްކުރަނީ ސިދާންތް އާނަންދެވެ. މި ފިލްމުން ފެނިގެންދާ ތަރިންނަކީ މަޝްހޫރު ތަރިންނަށް ވުމާއި އެކުގައި މި ފިލްމު ވަރަށް ކާމިޔާބު ވާނެ ކަމަށް ގިނަ ބެލުންތެރިން ދެކެއެވެ.
މި ފިލްމާއި ބެހޭ ގޮތުން އިތުރު ތަފްސީލު ފިލްމުގެ އުފެއްދުންތެރިން ދީފައެއް ނުވެއެވެ. ފިލްމުގެ ޕްރޮޑަކްޝަން ޓީމުން މަޑުކުރަމުންދަނީ މި މަޢުލޫމާތު ހިއްސާކުރާނެ ރަނގަޅު ވަގުތެއް ލިބޭނެ ދުވަހަކަށް ކަމަށް ވަނީ ބުނެފަ އެވެ.
މީގެ ކުރިން އާންމުކޮށްފައި ވާ މި ފިލްމުގެ އެކިއެކި މަޢުލޫމާތު ތަކަށް ބަލާލާއިރު ފިލްމުން ދީޕިކާ އާއި ޝާހްރުކް ފެނިގެންދާނީ އޭޖެންޓުންގެ ގޮތުގައެވެ. އަދި ފިލްމުގައި ދީޕިކާ ފެނިގެންދާނީ ވަރަށްވެސް ތަފާތުކޮށެވެ. ތަފާތު އެކި ގޮތްގޮތަށް ބެލުންތެރިންނަށް ދީޕިކާ ފެނިގެންދާނެ މި ފިލްމުގައި އެންމެ ފަހުން އޭނާ ފެނިގެންދާނީ އިސްތަށިގަނޑު ކުރުކޮށް ކޮށާލާފައި ހުއްޓައެވެ. "ބޯއީ ކަޓް" އަކުންނެވެ.
މި ފިލްމުގައި ޝާހްރުކާއި ސަލްމާން ޚާން އެކުގައި ފެންނަ މަންޒަރުތަކުގެ ޝޫޓިންގ މިދިޔަ ފެބްރުވަރީ މަހު ވަނީ ކުރިއަށް ގެންގޮސްފަ އެވެ.
