އައްޑޫގެ އިތުރުން ދެކުނުގެ ޓޫރިޒަމަށް ދިރުން ގެނެވޭނެ އެންމެ މުހިއްމު ވަސީލަތަކީ ގަން އިންޓަނެޝަނަލް އެއާޕޯޓް ކަމަށް ވިދާޅުވެ ޓުވަރިޒަމް މިނިސްޓަރ ޑރ.އަބްދުﷲ މައުސޫމް ދެއްކެވި ވާހަތަކަށް ރައްޔިތުންގެ މަޖިލީހުގެ ތިނަދޫ ދެކުނު ދާއިރާގެ މެމްބަރު އަބްދުﷲ ސަނީފު ހޫނު ރައްދެއް ދެއްވައިފިއެވެ.
އައްޑޫގެ ޓޫރިޒަމް ޒޯންތަކުން ބިން ކާމިޔާބު ފަރާތްތަކަށް އެކަމުގެ ލިޔުން ހަވާލުކުރަން ފޭދޫ ހިއްކި ބިމުން ކަނޑައަޅާފައިވާ ޓޫރިޒަމް ޒޯންގައި ބޭއްވި ރަސްމިއްޔާތުގައި މިނިސްޓަރ މައުސޫމް ވިދާޅުވީ ދެކުނުގެ ޓޫރިޒަމަށް ދިރުން ގެނެވޭނެ އެންމެ މުހިއްމު ވަސީލަތަކީ ގަން އިންޓަނެޝަނަލް އެއާޕޯޓް މިހާރަށް ވުރެ ރަނގަޅަށް ހިންގުން ކަމަށާއި އެގޮތުން އިންޓަނޭޝަނަލް ފްލައިޓްތަކާއެކު ރާއްޖޭގެ އެހެން ޑޮމެސްޓިކް އެއާޕޯޓްތަކަށް ފަސޭހައިން ދަތުރުކުރެވޭނެ އިންތިޒާމުތަކެއް ހުރުމަކީ ޓޫރިޒަމް ދާއިރާގެ ކުރިމަގަށް ވަރަށް މުހިއްމު ކަމެއްކަމަށެވެ. އަދި އައްޑޫ ސިޓީގައި އެދުތައް އިތުރު ވުމަކީ ހުވަދޫއަށް ލިބިގެންދާނެ އިތުރު ކުރިއެރުމެއްކަމަށެވެ.
މިނިސްޓަރ މައުސޫމްގެ މިވާހަތަކާއި ގުޅިގެން ސަނީފް ވިދާޅުވީ އައްޑޫ ސިޓީގެ ތަރައްޤީއަށް ކުރެވޭ ކަންކަމުގައި ހުވަދޫ ރައްޔިތުން އޭގައި ހިމަނައިގެން ވާހަކަ ދައްކަން ނުޖެހޭކަމަށެވެ. މިގޮތަށް ކުރެވޭ ކޮންމެ ކަމެއްގައި ހުވަދު އަތޮޅުގެ ރައްޔިތުންގެ ނަން ބޭނުންކޮށް، ގުރުބާން ކަންބަޅިތަކަކަށް ހުވަދޫ ރައްޔިތުން ނެހެދުމަށް ސަނީފް ވަނީ މިނިސްޓަރ މައުސޫމަށް ގޮވާލާފައެވެ.
މިނިސްޓަރ ކޮންމެވެސް އެހެން ކަމަކާއި އުޅޭ، ހުވަދޫ އާއި ގުޅުވައިގެން ތި ގޮތަށް ވާހަކަ ނުދެއްކެވުން އެދެން. ހުވަދޫއަކީ ކަންބަޅިއެއްނޫން ޤުރުބާން ކުރަން ހުވަދޫ ރައްޔިތުންތިބީ ތޮގިތަކަށްނޫން.
– ސަނީފް ވިދާޅުވިއެވެ.
އައްޑޫ ސިޓީގެ ތަރައްޤީއަަށާއި، ފަތުރުވެރިކަން ކުރިއެރުވުމަށް ގިނަ މަސައްކަތެއް ސަރުކާރުން ކުރަމުންދާއިރު، ހުވަދު އަތޮޅަކީ ރާއްޖޭގެ އެންމެ ބޮޑު އަދި ފަތުރުވެރިކަމަށް ތައްޔާރު ކޮށްލެވޭނެ ގިނަ ރައްތަކެއް ހުރި އަތޮޅަކަށްވާއިރުވެސް ސަރުކާރުން ހުވަދު އަތޮޅުގައި ފަތުރުވެެރިކަން ކުރިއެރުވުމަށް މާބޮޑު މަަސައްކަތްތަކެއް ނުކުރެއެވެ.
ޚާއްސަކޮށް ހުވަދު އަތޮޅަކީ މިހާރުވެސް އޮޕަރޭޓްކުރާ 3 އެއާޕޯޓް އޮތް އަތޮޅަކަށްވާއިރު، ހުވަދޫ އެއާޕޯޓްތައް ތަރައްޤީ ކުރުމަށާއި ހުވަދު އަތޮޅުގެ ތަރައްޤީއަށް އެންމެ އެކަށީގެންވާ މަސައްކަތް ނުކުރެވޭކަމުގެ ޝަކުވާ އެއަތޮޅުގެ ގިނަ ރައްޔިތުން ދަނީ ކަންބޮޑުވުމާއިއެކު ފާޅު ކުރަމުންނެވެ.
ކޮމެންޓު ފޮނުވާ