ކޯވިޑުން ރައްކާތެރިވުމަށް މުމްބާއީގައި އަޅާފައިވާ ފިޔަވަޅުތަކާ ހިލާފުވުމުން، ގައުހަރް ޚާނަށް 60 ދުވަސް ވަންދެން ފިލްމީ މަސައްކަތްތައް ނުކުރެވޭނެކަމަށް އިންޑިއާގެ ފިލްމު އިންޑަސްޓްރީ ޔޫނިއަނުން ނޯޓިސް ދީފިއެވެ.
ރިޕޯޓުތަށް ބުނާގޮތުގައި މި ފިޔަވަޅު އަޅާފައި ވަނީ އޭނާ ކޯވިޑް19 އާއި ދުޅިގެން ކަމާގުޅޭ އިދާރާތަކުން އަޅާފައި ވާ ރައްކާތެރިވުމުގެ ފިޔަވަޅުތަކުގެ ތެރެއިން ކަރަންޓީނު ވުމުގެ އުސޫލާ ހިލާފުވުމުންނެވެ.
މުންބާއީގެ މުނިސިޕަލް ކޯޕްރޭޝަން، ބީއެމްސީން ވަނީ ފިލްމީ ތަރި ގައުހަރާ ދެކޮޅަށް މި މައްސަލާގައި އެފްއައިއާރް ވެސް ފައިލް ކޮށްފައެވެ. މިގޮތަށް މައްސަލަ ހުށަހަޅާފައިވަނީ ކޯވިޑް 19 އަށް ޕޮޒިޓިވްވުމަށް ފަހުގައިވެސް އަޅަންޖެހޭ ފިޔަވަޅުތައް ނޭޅުމުގެ ސަބަބުން ކަމަށް ބީއެމްސީން ވަނީ ބުނެފައެވެ.
މި މައްސަލަ ބީއެމްސީން ޖައްސާފައިވަނީ މިދިޔަ ހޯމަ ދުވަހު އެވެ. އެގޮތުން ޓައިމްސް އިންޑިއާއިން ނެރުނު ރިޕޯޓެއްގައިވާ ގޮތުން ގައުހަރް ވަނީ ކޮވިޑް 19 އަށް ޕޮޒިޓިވްވެ ހުރެ ފިލްމެއްގެ ޝޫޓިންއަށް ބޭރަށް ނުކުމެފަ އެވެ.
ނަމަވެސް ގައުހަރްގެ ޓީމުން އެކަން ދޮގުކުރެއެވެ. އެކަން ދޮގުކޮށް ގައުހާރްގެ ޓީމުން ނެރުނު ބަޔާނުގައި ބުނެފައިވާ ގޮތުގައި ގައުހާރްގެ އެންމެ ފަހުގެ ކޮވިޑް ޓެސްޓުތަކުން ނެގެޓިވް އެވެ. އަދި އޭނާއެއްވެސް ގޮތަކަށް ގާނޫނާއި ޚިލާފް ނުވާކަމަށް ބަޔާނުގައި ބުނެފައި ވެއެވެ.
މީގެ އިތުރުން ގައުހަރް ގެންދަނީ އަބަދުވެސް ކޯވިޑް ޓެސްޓު ކުރަމުން ކަމަށާއި ފަހުގެ ހުރިހާ ޓެސްޓެއް ނެގަޓިވް ކަމަށް މި ބަޔާނުގައި ބުނެފައިއެވެ. އަދި މި ބަޔާނާއި އެކު އޭނާގެ އެންމެ ފަހުގެ ކޮވިޑު ޓެސްޓުގެ ނަތީޖާވެސް ވަނީ އާންމުކޮށްފަ އެވެ.
View this post on Instagram
މީގެ ދިހަ ދުވަސް ކުރިން ގައުހަރް ޚާންގެ ބައްޕަ ވަނީ ނިޔާވެފައެވެ. އެހްނެކަމުން މިފަދަ ދަނޑިވަޅެއްގައި އޭނާ އާ ބެހޭގޮތުން މިކަހަލަ ވާހަކަތަށް ނުފެތުރުމަށާއި ހާލަތަށް އެންމެންވެސް އިހްތިރާމް ކުރުމަށް ގައުހަރްގެ ޓީމުން ނެރުނު ބަޔާނުގައި އެދިފައި ވެއެވެ.
ގައުހަރް އަކީ ބިގްބޮސްގެ 7 ވަނަ ސީޒަން ކާމިޔާބު ކުރި ތަރިއެވެ.
