އެކްޓަރ ފަރުހާން އަޚްތަރުގެ ކުރިއަށް އޮތް ފިލްމު "ތޫފާން"ގެ ޓީޒާ ދައްކާލައިފި އެވެ.
މެއި މަހުގެ 12 ވަނަ ދުވަހު އޮންލައިން ޕްލެޓްފޯމް، އެމެޒޯން ޕްރައިމް ވީޑިއޯ އިން ޕްރިމިއާކުރަން ހަމަޖެހިފައިވާ "ތޫފާން" އަކީ ބޮކްސިންތެޅުންތެރިއެއްގެ ވާހަކަ ގެނެސްދޭ ސްޕޯޓްސް ޑްރާމާއެކެވެ.
އޯމް ޕްރަކާޝް މެހެރާ ޑައިރެކްޓްކޮށްފައިވާ މި ފިލްމަކީ 2013 ވަނަ އަހަރުގެ "ބާގް މިލްކާ ބާގް" އަށް ފަހު މެހެރާ އާއި ފަރުހާން އެކުގައި މަސައްކަތްކުރި ފުރަތަމަ ފަހަރެވެ.
"ތޫފާން" އިން ފަރްހާންގެ އިތުރުން މުރްނާލް ޓާކޫރާއި ޕަރޭޝް ރާވަލް ވެސް ފެނިގެންދާނެވެ. މިއީ މިދިޔަ އަހަރުގެ އޮކްޓޯބަރު މަހު ބެލުންތެރިންނާހަމައަށް ގެނައުމަށް މަސައްކަތްކުރި ފިލްމެކެވެ.
ފަރްހާންގެ "ބާގް މިލްކާ ބާގް" ކަހަލަ މޮޅު އަދި ޝައުގުވެރި ފިލްމަކަށް މި ފިލްމުވެސް ވެގެންދާނެ ކަމަށް ގިނަ ބަޔަކު އުންމީދުކުރެއެވެ. "ތޫފާން" އަކީ މި އަހަރުގެ އެންމެ އުންމީދީ އެއް ފިލްމު ވެސް މެ އެވެ.
މި އަހަރުގެ އެންމެ އުންމީދީ ފިލްމުތަކުގެ ތެރޭގައި މި ފިލްމު ހިމެނުނު ނަމަވެސް ފިލްމު ރިލީޒްކުރާ ތާރީހާއި ސަލްމާނުގެ "ރާދޭ" ސިނަމާތަކުގައި އަޅުވާ ތާރީހު ފުށުއަރާތީ ފިލްމަށް ވާނޭގޮތެއް އަދި އަންދާޒާކޮށްލަން ވެސް ނޭނގެއެވެ. ނަމަވެސް 2 ފިލްމުވެސް އަންނަނީ ތަފާތު 2 ޕްލެޓްފޯމަކަށް ކަމަށް ވުމުން ފިލްމުގެ ވިޔަފާރިއަށް މާބޮޑު އަސަރެއް ކުރާނެ ކަމަކަށް ނުބެލެއެވެ.
