އެއް އަހަރުވަންދެން ކޯޓުގައި މައްސަލަ ކުރިއަށްގެންދިއުމަށްފަހު ވަރިވާން ބޭނުން ނުވާ ކަމަށް ބޮލީވުޑްގެ ތަރި ނަވާޒުއްދީން ސިއްދީގީީގެ އަންހެނުން އާލިޔާ ބުނެފި އެވެ.
އާލިޔާ ބުނެފައިވަނީ އޭނާ ބޭނުންވަނީ އަލުން އާ ފެށުމަކުން ފެށުމަށް ކަމަށެވެ. އަދި މިގޮތަށް ޚިޔާލު ބަދަލުވެފައިވަނީ ނަވާޒުއްދީންގެ އަޅާލުމާއި ލޯބި މި ވޭތުވެ 10 ވަރަކަށް ދުވަހުގެތެރޭގައި އޭނާއަށް ފެނުމުން ކަމަށްވެސް އާލިޔާ ވަނީ ބުނެފަ އެވެ.
އާލިއާ ނުވަތަ އަންޖަނާ ކިޝޯރް ޕާންޑޭ 2020 ވަނަ އަހަރު ވަނީ ނަވާޒުއްދީނާ ދެކޮޅަށް ގެވެށި އަނިޔާގެ މައްސަލަ ޖައްސާފައެވެ. އަދި މި މައްސަލައާއެކު ވަރިވުމަށް ވެސް މައްސަލަ ކޯޓަށް ވައްދާފައި ވެއެވެ. އެހެންނަމަވެސް މިކަމުގެ ޖަވާބެއްގެ ގޮތުން ނަވާޒުއްދީން ބުނެފައިވަނީ އޭނާ ދުވަހަކުވެސް އޭނާގެ އަންހެނުންގެ ގައިގައި ޖަހާފައި ނުވާނެ ކަމަށެވެ.
މިވަގުތު އާލިޔާ ހުރީ ކޮވިޑް 19 ޖެހިގެން މުމްބާއީގައި އޭނާގެ ގޭގައި އައިސޮލޭޝަންގައެވެ. އަދި ނަވާޒުއްދީން ހުރީ ލަކްނައުގައި ފިލްމެއްގެ ޝޫޓިންގގަ އެވެ. ނަމަވެސް އެ ދެމީހުންގެ ދެދަރިންގެ ކަންތައްތައް ވަރަށް ފުރުހަމައަށް ނަވާޒް ބަލަހައްޓަމުން ގެންދާކަމަށް އާލިޔާ ވަނީ ބުނެފައެވެ. އަދި މިކަމާއި ގުޅިގެން އޭނާއަށް ދުވަހަކުވެސް ނަވާޒްގެ ފަރާތުން ނުފެންނަ އަޅާލުމާއި އޯގާތެރިކަން ފެނިފައި ވާކަމަށް އާލިޔާ ބުންޏެވެ.
އާލިއާ ބުނެފައިވާ ގޮތުގައި މާޒީގައި ވެދިޔަ ކަންތައް ދޫކޮށްލުމަށްފަހު ދެމީހުންވެސް އަލުން އާ ފެށުމަކުން ދިރިއުޅުން ފެށުމަށް ތައްޔާރުވަމުން ދާކަމަށެވެ. މީގެ ކުރިން 2020 ވަނަ ވަނަ އަހަރު ކޯޓަށް މައްސަލަ ހުށަހެޅި އިރު އާލިޔާ ބުނެފައި ވަނީ އެދެމީހުންގެ މެދުގައި މައްސަލަ އުފެދެން ފެށާފައިވަނީ އެމީހުންގެ ކައިވެންޏަށް އެއް އަހަރު ވީފަހުން 2010 ވަނަ އަހަރުން ފެށިގެން ކަމަށެވެ.
