ރާއްޖޭގެ ދަނޑުވެރިކަމުގެ ސިނާއަތް އަލުން ކޮޅަށްޖަހައި ދަނޑުވެރިކަން ކުރައްވާ ފަރާތްތަކަށް ރައީސުލްޖުމްހޫރިއްޔާ މިއަދު ދެއްވި ލުއިތަކުގެ ސަބަބުން އެސިނާއަތުގައި ހަރަކާތްތެރިވާ ފަރާތްތަކަށް އިތުރު ހިތްވަރެއް ލިބިގެން ގޮސްފައިވާކަމުގައި ޓްރޭޑް ޔޫނިއަންގެ ނައިބު ރައީސް ސަޢުދުﷲ އަޙްމަދު ވިދާޅުވެއްޖެ އެވެ.
ރާއްޖޭގެ މީހުން ދިރިއުޅޭ ރަށްރަށުން ދަނޑުވެރިކަމަށް ދޫކޮށްފައިވާ ބިންތަކާއި، އަލަށް ދޫކުރާ ބިންތަކުން ކުރިއަށް އޮތް ތިން އަހަރުގެ ތެރޭގައި، އެއްވެސް ކުއްޔެއް ނުނެގުމަށް ނިންމަވާފައިވާ ކަމަށް ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް ނިންމެވުމާއި ގުޅިގެން އެކަމަށް މަރުހަބާ ވިދާޅުވެ ސައުދު ވިދާޅުވީ މިކަމުގެ ސަބަބުން އެސިނާއަތުގައި ހަރަކާތްތެރިވާ މީހުންނަށް އިތުރު ހިތްވަރެއް ލިބިގެންދާނެ ކަމަށެވެ.
ރައީސް ޞާލިހު މިއަދު ދަނޑުވެރިންނަށް ދެއްވި ލުއިތަކަކީ ކޯވިޑް-19 އާއިއެކު ކުރިމަތިވި ގޮންޖެހުންތަކުން އަރައިގެނެ ސިނާއަތް އަލުން ކޮޅަށް ޖެހުމަށް ލިބިގެންދިޔަ އިތުރު ހިއްވަރެއްކަމަށެވެ. މިކަމުގެ ސަބަބުން ދަނޑުވެރިކަން ކުރައްވާ ފަރާތްތަކަށް ބޭނުންވާ ސާމާނު ސަޕްލައި ކޮށްދޭ ފަރާތްތަކަށާއި، ދަނޑުވެރިކަން ކުރައްވާ ފަރާތްތަކަށްވެސް އިތުރު ލުއިތަކެއް ލިބިފގެންދާނެކަމަށް ސައުދު ވިދާޅުވި އެވެ.
ބަނަވެފައިވާ އިޤްތިޞާދީ ސިޔާސަތު ހެޔޮ މިސްރާބަކަށް ބަދަލު ވާން ފެށުމަކީ މުހިންމުކަމެއް. ރައީސް ޞާލިހު މިއަދު ދަނޑުވެރިކަން ކުރައްވާ ފަރާތްތަކަށް އެ ދެއްވި ލުއިތަކުން އެ ސިނާއަތަކުން މަސައްކަތްކުރާ އަދި އެ ސިނާއަތަށް ރޯ މެޓީރިއަލް ސަޕްލައި ކޮށްދޭ ފަރާތަކަށް ލިބިގެން ދިޔަ ހިއްވަރަކަށްވާނެ.
– ސަޢުދުﷲ އަޙްމަދު
ދަނޑުވެރިކަމުގެ ދުވަހާއި ގުޅިގެން ރައީސުލްޖުމްހޫރިއްޔާ ދެއްވި ޚިތާބުގައި ވިދާޅުވީ ދަނޑުވެރިކަމަށް ފަހި ފުރުޞަތުތައް ހޯދައިދިނުމުގެ ގޮތުން، މީހުން ދިރިއުޅޭ ރަށްރަށުން ދަނޑުވެރިކަމަށް ދޫކޮށްފައިވާ ބިންތަކާއި، އަލަށް ދޫކުރާ ބިންތަކުން ކުރިއަށް އޮތް ތިން އަހަރުގެ ތެރޭގައި، އެއްވެސް ކުއްޔެއް ނުނެގުމަށް ސަރުކާރުން މިހާރު ނިންމާފައިވާކަން ވަނީ ހާމަކުރައްވާފައެވެ. އަދި ދަނޑުވެރިކަން ފުޅާކުރުމަށް އެހީތެރިވެދިނުމުގެ ގޮތުން، އިތުރު 6 ފަޅުރަށެއް ކުއްޔަށް ދޫކުރުމަށް، މިދިޔަ ހަފުތާގައި އިޢުލާނުކޮށްފައިވާކަން އެމަނިކުފާނު ފާހަގަކުރެއްވިއެވެ.
ރައީސްގެ ވާހަތަކާއި ގުޅިގެން ސައުދު ވިދާޅުވީ މިހާލަތުގައި ރައްޖޭގެ އުފެއްދުންތެރިކަން އިތުރުކޮށް ޤައުމުގެ އިޤްތިޞާދު ކޮޅަށްޖެހުމަކީ ކުރަންޖެހޭ ވަރަށް މުހިންމުކަމެއްކަމަށެވެ. ޚާއްސަކޮށް މަސްވެރިކަމާއި ދަނޑުވެރިކަމުގެ ސިޔާސަތަށް މިއަދު ގެންނަވާ ބަދަލުތަކުގެ ސަބަބުން ހެޔޮ ނަތީޖަތަކެއް ފެނިގެންދާނެކަމަށް ސައުދު ވިދާޅުވި އެވެ.
ރާއްޖޭގެ އުފެއްދުން ތެރިކަން އިތުރު ކުރުމަކީ މުހިންމުކަމެއް. ޚާއްސަކޮށް މަސްވެރިކަމާއި، ދަނޑުވެރިކަން ކުރި އަރުވަން މިއަދުގެ ސަރުކާރުން ރައީސް އިބްރާހިމް މުހައްމަދު ޞާލިހު ކުރައްވަމުންދާ މަސައްކަތުން އިޤްތިޞާދަށް ހެޔޮ ބަދަލު ފެނިގެންދާނެ.
– ސަޢުދުﷲ އަޙްމަދު
ދަނޑުވެރިންނަށް ކުރިމަތިވާ އެންމެ ބޮޑު ގޮންޖެހުމަކީ، ދަނޑުވެރިން އުފައްދާ ތަކެތި، ރަނގަޅު އަގުގައި ތާޒާކަމާއެކީ، ބާޒާރަށް ނެރެވޭނެ ފަސޭހަ ގޮތްތަކެއް ނެތުންކަމަށްވާއިރު، އެ ދަތިކަން ޙައްލުކޮށްދިނުމަށް މި އަހަރުގެ އޭޕްރީލް މަހުގެ ތެރޭގައި އެގްރޯ ނޭޝަނަލް ކޯޕަރޭޝަންގެ ނަމުގައި، ސަރުކާރުގެ 100 އިންސައްތަ ޙިއްޞާވާ ކުންފުންޏެއް އުފައްދާފައިވާކަންވެސް ރައީސުލްޖުމްހޫރިއްޔާގެ ޚިޠާބުގައި ވަނީ ފާހަގަކުރައްވާފަ އެވެ.
ކޮމެންޓު ފޮނުވާ