ހާލަތުން އަރައިގަނެ މަންފާ ހާސިލްކުރުމަށް އެންމެންގެ ބައިވެރިވުން ބޮޑު: ޑރ.މައުސޫމް

ކޯވިޑް-19 ގެ ހާލަތުން އަރައިގެނެ ފަތުރުވެރިކަން އަލުން ކޮޅަށް ޖެހުމަށް ސަރުކާރުން ކުރަމުންދާ މަސައްކަތުގައި ހުރިހާ ރައްޔިތުންގެ އެބާރުލުން ބޭނުންވާ ކަމުގައި ޓުވަރިޒަމް މިނިސްޓަރ ޑރ.އަބްދުﷲ މައުސޫމް ވިދާޅުވެއްޖެ އެވެ.

ކޯވިޑް-19 އާއި ގުޅިގެން ގިނަ ދުވަސްތަކެއްގެ މެދުކެނޑުމަކަށްފަހު އަތޮޅުތެރޭގައި ހުރި ގެސްޓްހައުސްތައް ހުޅުވާލުމަށްޓަކައި މިއަދު މާފުށީގައި ބޭއްވި ރަސްމިއްޔާތުގައި ވާހަކަފުޅު ދައްކަވަމުން ޓުވަރިޒަމް މިނިސްޓަރ ޑރ.އަބްދުﷲ މައުސޫމް ވިދާޅުވީ ދުވަސްތަކަކަށްފަހު މިއަދު އަލުން އަތޮޅުތެރޭގެ ގެސްޓްހައުސްތަކުގެ މަސައްކަތް ފެށި ކަމުގައިވީނަމަވެސް ކުރިމަތީގައި އޮތް ގޮންޖެހުން ކުޑަ ނޫންކަމަށެވެ. މި ގޮންޖެހުންތަކާއި ކުރިމަތިލައި ކާމިޔާބީ ހާސިލް ކުރެވޭނީ އެންމެން ގުޅިގެން ކުރެވޭ މަސައްކަތަކުން ކަމުގައި މިނިސްޓަރ މައުސޫމް ވިދާޅުވި އެވެ.

ރާއްޖޭގެ ފަތުރުވެރިކަމުން ލިބޭ މަންފާ އަތޮޅު ތެރޭގެ ރައްޔިތުންނަށް މީގެ ކުރިންވެސް ލިބުނުގޮތަށް ލިބިގެން ދިއުމަކީ ރައީސް ޞާލިހުގެ ވަރަށްބޮޑު އުންމީދެއްކަމަށް މައުސޫމް ވިދާޅުވިއެވެ. މިކަން ހާސިލް ކުރެވޭނީ އަތޮޅުތަކުގެ ރަށްތަކުގެ ރައްޔިތުންނާއި ކައުންސިލްތަކާއި މިވިޔަފާރީގައި ޝަމިލުވާ އެންމެން ގުޅިގެން ކުރެވޭ މަސައްކަތަކުން ކަމުގައި މިނިސްޓަރ މައުސޫމް ވިދާޅުވި އެވެ. އަދި އެޗްޕީއެގެ ގައިޑްލައިނާއި އެއްގޮތަށް ހުރިހާ ބޭފުޅުންވެސް އަމަލުތައް ބެހެއްޓެވުމަށް މައުސޫމް ވަނީ ގޮވާލައްވާފަ އެވެ.

އަޅުގަނޑުމެންނަށް މިކަމުގައި އެޗްޕީއޭއިން ދެއްވާފައިވާ ގައިޑްލައިންތަކަށް އަމަލުުކުރުމަކީ ވަރަށް މުހިންމުކަމެއް. މިކަމުން ލިބޭނެ މަންފާއާއި ނަފާ އިތުރުކުރުމަށްޓަކައި ހުރިހާ ރައްޔިތުން ގުޅިގެން މަސައްކަތް ކުރަންޖެހޭ. އިރާދަކުރެއްވިޔާ އެންމެން ގުޅިގެން ކުރާ މަސައްކަތުން އަޅުގަނޑުމެންނަށް ކާމިޔާބީއާއި ހަމައަށް ވާސިލްވެވޭނެ.

– ޑރ.އަބްދުﷲ މައުސޫމް

ރާއްޖޭގެ ކޯވިޑް-19ގެ ހާލަތަށް ބަލާ، މީހުން ދިރިއުޅޭ ރަށްރަށުގައި ހިންގާ ގެސްޓް ހައުސްތައް ބަންދުކޮށްފައިވަނީ މިދިޔަ މާރޗުމަހުގެ 17 ވަނަ ދުވަހުއެވެ. އޭގެ 212 ދުވަސްފަހުން އަލުން ގެސްޓް ހައުސްތައް ހުޅުވާލަން ފަށާއިރު، 9 ރަށަކުން 16 ތަނެއް މިހާރުވެސް ހުޅުވުމަށް ތައްޔާރުވެފައިވާކަމަށް ޓޫރިޒަމް މިނިސްޓްރީން ހާމަކުރެއެވެ.

ގެސްޓް ހައުސްތައް އަލުން ހުޅުވުމަށް ރަށު ފެންވަރުގައި އަޅަންޖެހޭ ރައްކާތެރިކަމުގެ ފިޔަވަޅުތައް ފުރިހަމަކޮށް، 9 ރަށަކުން 16 ތަނެއް މިހާރުވެސް ހުޅުވުމަށް ތައްޔާރުވެފައިވާކަމަށް ޓޫރިޒަމް މިނިސްޓްރީން ވަނީ ވިދާޅުވެފަ އެވެ. ޓުވަރިޒަމް މިނިސްޓްރީން ވިދާޅުވީ ގެސްޓް ހައުސް ވިޔަފާރިތައް އަލުން ހުޅުވާލުމުގައި ޢަމަލުކުރުމަށް ކަނޑައަޅާފައިވާ ގައިޑްލައިނާއި އެއްގޮތަށް ފުރިހަމަކުރަންޖެހޭ ކަންކަން ފުރިހަމަކުރުމަށްފަހު، 22 ގެސްޓް ހައުސްއަކުން ސްޓޭޑަޑް އޮޕަރޭޓިންގް ޕްރޮސިޖަރ، އެސް.އޯ.ޕީތައް މިނިސްޓްރީއަށް ހުށަހަޅާފައިވާކަމަށެވެ. އަދި އޭގެ ތެރެއިން 16 ތަނެއް ފަތުރުވެރިންނަށް ޚިދުމަތް ދިނުމަށް އަލުން ހުޅުވާލުމުގެ ހުއްދަ މިނިސްޓްރީން ވަނީ ދެއްވާފަ އެވެ.