ބޮލީވުޑްގެ ތަރި ކެޓްރީނާ ކައިފްގެ ކޮއްކޮ އިޒަބެލް ކައިފް ބޮލީވުޑަށް ތައާރަފުކުރާ ފިލްމު "ޓައިމް ޓު ޑާންސް" ގެ ޓްރެއިލާ ދައްކާލައިފި އެވެ.
އަންނަ މަހުގެ 12 ގައި ރިލީޒްކުރަން ހަމަޖެހިފައި ވާ މި ފިލްމަކީ 2017 ވަނަ އަހަރު ޝޫޓިންގ ފެށި ފިލްމެކެވެ. އިނގިރޭސިވިލާތުގައި ފިލްމުގެ ޝޫޓިން ކުރިއަށް ގެންގޮސް ފިލްމުގެ މަސައްކަތްތައް އެއްކޮށްހެން ނިންމާފައި އޮތް ނަމަވެސް އެކި ސަބަބުތަކާހުރެ ފިލްމު ސިނަމާއާ ހަމައަށް ނައިސް އޮންނަތާ ދުވަސްތަކެއް ވެއްޖެއެވެ.
މި ފިލްމަކީ ނެށުންތަކެއްގެ ތެރެއިން ލޯބީގެ ވާހަކައެއް ގެނެސްދީފައިވާ ފިލްމެކެވެ. އަލަށް ޑައިރެކްޝަނަށް ނުކުއިތް ސްޓޭންލީ ޑި ކޯސްޓާ ޑައިރެކްޓްކޮށްފައިވާ "ޓައިމް ޓު ޑާންސް" ގައި އިޒަބެލް ކައިފް އާއެކު ފެނިގެންދާނީ އަދިތިޔާ ޕަންޗޯލީގެ ދަރިފުޅު ސޫރަޖް ޕަންޗޯލީ އެވެ. މީގެ އިތުރު ސާގިބް ސަލީމް، ވަލޫޝާ ޑި ސޫޒާ އަދި ރާޖްޕަލް ޔާދަވް ވެސް ފިލްމުގެ މުހިންމު ބައިތަކުން ފެންނާނެއެވެ.
"ޓައިމް ޓު ޑާންސް" އަކީ ކޮރެއޯގްރާފާ އަދި ޑައިރެކްޓަރ ރެމޯ ޑި ސޫޒާ އާއި ޓީ ސީރީޒް ގުޅިގެން ގެނެސްދޭ ފިލްމެކެވެ.
އިޒަބެލް ބޮލީވުޑަށް ތަޢާރަފްވާ ފިލްމަކީ މިފިލްމު ނަމަވެސް، ކުރިއަށް އަދިވެސް އޭނާގެ އިތުރު 2 ފިލްމެއް އެބައޮތެވެ. އެއީ "ކުވާތާ" އާއި "ސަސްވަގަތަމް ޚުޝާމަދީދު" އެވެ.
