ކޮރޯނާ ވައިރަސްގެ ސަބަބުން ދުނިޔޭގެ އެކި ކަންކޮޅުތަކުގައި ފިލްމުތަކުގެ ޝޫޓިންގ ޝެޑިއުލަށާއި ފިލްމުތައް އަޅުވާ ދުވަހަށް އެތަަށް ބަދަލެއް ގެންނަން ޖެހުނެވެ. ނަތީޖާއެއްގެ ގޮތުން ފިލްމުތަކަށް ސަޕޯޓްކުރާ މީހުންގެ މެދުގައި ހިތް ނުތަނަވަސްކަންވަނީ އުފެދިފައެވެ.
ބޮލީވުޑްގައި ސަލްމާން ޚާންގެ ފޭނުންނަށް ވެސް މިފަދަ ހިތްނުތަނަވަސް ކަމެއް ކުރިމަތި ލާން ޖެހުނެވެ. އެގޮތުން 2009 ވަނަ އަހަރުން ފެށިގެން ކޮންމެ އަހަރަކު (2013 ނުހިމަނާ) ސަލްމާނުގެ އާ ފިލްމެއް ވަނީ ބެލުންތެރިންނާ ހަމައަށް ގެނެސްދީފަ އެވެ. ނަމަވެސް 2020 ވަނަ އަހަރު އެންމެން ބަލާލާހިތުން ތިބި ސަލްމާންގެ ފިލްމު އެ އަހަރު ފެންނަވަރު ނުވިއެވެ.
ކޮރޯނާގެ ސަބަބުން ހާލަތު ތަންނުދިނުމުން ސަލްމާނުގެ ފިލްމު "ރާދޭ: ދަ މޯސްޓް ވޯންޓެޑް ބާއީ" ވަނީ ފަސްކޮށްލާފައެވެ. ނަމަވެސް ސަލްމާން މިހާރު ވަނީ އެފިލްމު މިއަހަރުގެ ޢީދުގައި ބެލުންތެރިންނަށް ފެންނާނެ ކަމުގެ ޔަގީންކަން ދީފައެވެ.
ކޮންމެ ގޮތެއްވިޔަސް މިއީ ބެލުންތެރިން ކެތްތެރިކަމާއި އެކުގައި އިންތިޒާރު ކުރަމުންދާ އެއް ފިލްމެވެ.
ސަލްމާންގެ މި ފިލްމުން މަޝްހޫރު އެތަށް ތަރިންނާއި ފަންނާނުންގެ މަސައްކަތް ފެނިގެން ދާނެއެވެ. އެގޮތުން ދިޝާ ޕަޓާނީ، ޖެކީ ޝްރޮފް އަދި ރަންދީޕް ހޫޑާ ފަދަ ތަރިންގެ ހުނަރު މި ފިލްމުން ފެނިގެންދާނެއެވެ. މި ފިލްމުގެ ޑައިލޮގްތައް ލިޔެދީފައި ވަނީ ވިޖޭ މައުރިޔާ އެވެ. އޭނާ "ގަލީ ބޯއީ" ގައި ކުރި މަސައްކަތަށް ވަނީ ގިނަ ބައެއްގެ ތަރުހީބު ލިބިފައެވެ.
ޚަބަރު ލިބިފައިވާ ގޮތުގައި ސަލްމާނު ޚާން ވަނީ ފުރަތަމަ ފަހަރަށް ޝާހްރުކް ޚާންގެ މަޝްހޫރު ވީ އެފް އެކްސް ކުންފުންޏާއި އެކު މި ފިލްމުގެ މަސައްކަތްކޮށްފަ އެވެ. ޝާހުގެ ރެޑް ޗިލީ ޕްރޮޑަކްޝަނުގެ ދަށުން ހިންގާ މި ވީއެފްއެކްސް ސްޓޫޑިއޯ އަކީ އެމީހުންގެ މަސައްކަތުގައި ކާމިޔާބު އަދި ގިނަ ބަޔެއްގެ ތަރުހީބު ލިބިފައިވާ ކުންފުންޏެކެވެ. އަދި އެ ކުންފުންޏަކީ ވަރަށް ހާއްސަ ވަކި ސްޓޭންޑަޑެއްގެ މަސައްކަތްތައް ނޫނީ މިވީހާތަނަށް ނުނަގާ ބައެކެވެ.
އެހެން ކަމުން މި ފިލްމުގެ ވިޝުއަލް އިފެކްޓްގެ މަސައްކަތް ޝާހުގެ ކުންފުނިން ކުރީ ސަލްމާނާއި ޝާހުރުކްގެ މެދުގައިވާ ރަހުމަތްތެރި ކަމުގެ ސަބަބުން ކަމަށް ބައެއް މީޑިއާތަކުން ވަނީ ބުނެފައެވެ.
މީގެ އިތުރުން "ރާދޭ: ދަ މޯސްޓް ވޯންޓެޑް ބާއީ" މި ފިލްމާ އަޖޭ ދޭވްގަން އާވެސް ގުޅުންތަކެއް އެބައޮތެވެ. އެގޮތުން އަޖޭގެ އެންވައި ވީއެފްއެކްސް ވާލާއިން ވަނީ މި ފިލްމުގެ ވަރަށް ގިނަ މަސައްކަތްކޮށްފަ އެވެ. ހާއްސަކޮށް ފިލްމުގެ ކަލާ ކަރެކްޝަން މަސައްކަތްތައް ފާހަގަކޮށްލެވެ އެވެ. އާންމުކޮށް އަޖޭގެ ފިލްމު ތަކާއި އަޖޭގެ ވަރަށް ގާތް މީހުންގެ މަސައްކަތްތައް ނޫނީ ނުކުރާ މި ކުންފުނިން ރާދޭގެ މަސައްކަތްތައް ކޮށްފައި މި ވަނީ ހަމަ ޔަގީނުންވެސް ސަލްމާނާއި އަޖޭގެ ގާތް ރަހުމަތްތެރި ކަމުގެ ސަބަބުންނެވެ.
ސަލްމާނާއި އަޖޭ ވަނީ އެކުގައި ތަފާތު މަސައްކަތްތަކެއް ކޮށްފަ އެވެ. އެގޮތުން 2011 ވަނަ އަހަރުގެ ސަލްމާނުގެ ފިލްމު "ރެޑީ" އިން ހާއްސަ ފެނިލުމަކުން އަޖޭ ވަނީ ފެނިފައެވެ. އަދި ހަމަ އެހެންމެ، އަޖޭ ގެ ސަން އޮފް "ސަރްދާރް"ގެ ލަވައެއް ސަލްމާން ކުޅެދީފައި ވެއެވެ. މީގެ އިތުރުން 1999 ގެ ފިލްމި "ހަމް ދިލް ދޭޗުކޭ ސަނަމް" އަކީ ސަލްމާނާއި އަޖޭ އެކުގައި ފެނިގެންދިޔަ ފިލްމެކެވެ.
