ބޮލީވުޑްގެ ސުޕަރ ސްޓަރ އާމިރު ޚާންގެ އަންހެން ދަރިފުޅު އީރާ ޚާން، ބައްޕަގެ ފިޓްނެސް ކޯޗް ނުޕުރް ޝިކާރޭ އާ ލޯބީގެ ގޮތުން ގުޅިގެން އުޅޭ ޚަބަރު ތަކަކީ މިދިޔަ އަހަރު ފަހުކޮޅު އާންމުންގެ ސަމާލުކަން ހޯދި ޚަބަރު ތަކެކެވެ.
"ބޮލީވުޑް ލައިފް" އިން މިދިޔަ އަހަރު ނޮވެމްބަރު މަހު ރިޕޯޓުކޮށްފައިވާ ގޮތުގައި، އީރާ ރައްޓެހިވެގެން އުޅެނީ ބައްޕަ އާމިރު ޚާންގެ ފިޓްނެސް ކޯޗް ނުޕުރް ޝިކާރޭ އާއެވެ. އަދި އެދެމީހުންގެ ގުޅުން ބަދަހިވެފައި ވަނީ ލޮކްޑައުން ތެރޭގައި އީރާ ހަށިގަނޑަށް ބަދަލުތަކެއް ގެންނަންވެގެން ނުޕުރްގެ އެހީ ހޯދުމުގެ ތެރެއިންނެވެ. އަދި މިހާރު އެދެމީހުން ލޯބީގެ ގޮތުން ގުޅިގެން އުޅޭތާ ދުވަސްތަކެއް ވެފައިވާ ކަމަށާއި، އީރާ އޭނާގެ މަންމަ ރީނާ ދައްތާއަށް ވެސް ނުޕުރް ތަޢާރަފް ކޮށްދީފައިވާ ކަމަށް އެ ނޫހުން އޭރު ރިޕޯޓްކޮށްފައި ވެއެވެ.
ނަމަވެސް އެ ދެމީހުންގެ މެދުގައި އޮތީ ސީދާ ކޮން ގުޅުމެއްކަމެއް ދެމީހުންކުރެ އެކަކުވެސް އޭރު ހާމައެއް ނުކުރެއެވެ.
އިއްޔެ ފާހަގަކުރި " ޕްރޮމިސް ޑޭ" އާ ގުޅުވައިގެން އީރާ ސޯޝަލް މީޑިއާއަށް ދޫކޮށްލި ޕޯސްޓާ ގުޅިގެން އަނެއްކާވެސް އެ ދެމީހުންގެ ވާހަކަތައް މިވަނީ މީޑިއާގައި އަޑު ހިއްޕާލާފައެވެ. ދެމީހުންގެ ވަރަށް ރޮމޭންޓިކް ފޮޓޯތަކަކާއެކު އީރާ ކޮށްފައިވާ އިންސްޓަގްރާމް ޕޯސްޓުގައި އީރާ ވަނީ އެދެމީހުންގެ ލޯބީގެ ގުޅުން އެންމެ ފުރަތަމަ ފަހަރަށް ހާމަކޮށްފައެވެ.
"ކަލާއަށް އަދި ކަލާ އާއެކު ވެވޭ ވަޢުދުތަކަކީ ޝަރަފާއި ފަހުރެއް" ކަމަށް ބުނެ ކޮށްފައިވާ މި ޕޯސްޓްގައި ވަނީ "މައި ވެލެންޓައިން" ހޭޝްޓެގްވެސް ބޭނުންކޮށްފައެވެ. އާންމު ގޮތެއްގައި ސޯޝަލް މީޑިއާގައި އެކްޓިވް ނަމަވެސް ޒާތީ ދިރިއުޅުން ސޯޝަލް މީޑިއާގައި ހިއްސާ ނުކުރާ އީރާ ފަހަކަށް އައިސް ނުޕުރް އާއެކު ސޯޝަލް މީޑިއާގެ ގިނަ ޕޯސްޓް ތަކަކުން ވަނީ ފެނިގެން ގޮސްފައެވެ. ނަމަވެސް އިއްޔެ އާއި ހަމައަށް އެދެމީހުންގެ ގުޅުން އެކަކުވެސް ޔަގީން ކޮށްދީފައެއް ނުވެއެވެ.
View this post on Instagram
އީރާގެ މި ޕޯސްޓަށް މުނިފޫހި ފިލުވުމުގެ ދާއިރާގެ ގިނަ ބައެއް ގެންދަނީ ރިއެކްޓްކޮށް ކޮމެންޓް ކުރަމުންނެވެ.
އެކްޓިންގެ ދާއިރާއިން ބޮލީވުޑްގައި އެންމެ މަތީގައި ފިޔަޖަހާ އާމިރް ޚާންގެ ދަރިއަކަށް ވީނަމަވެސް، އީރާ އަދި މިހާތަނަށް އެކްޓް ކުރުމަށް އެއްވެސް ޝައުގުވެރިކަމެއް ނުގެންގުޅެއެވެ. ނަމަވެސް ޑައިރެކްޓަރެއްގެ ގޮތުގައި ފިލްމު އިންޑަސްޓްރީގައި ކުރިއަށްދިއުމުގެ ޝައުގުވެރިކަން އީރާ މީގެކުރިންވެސް ވަނީ ފާޅުކޮށްފަ އެވެ.
އުމުރުން 24 އަހަރުގެ އީރާ އަކީ އާމިރުގެ ފުރަތަމަ ކައިވެންޏަށް ލިބުނު ދެވަނަ ދަރިފުޅެވެ. އަދި އާމިރުގެ ހަމައެކަނި އަންހެން ދަރިފުޅުވެސް މެއެވެ. އީރާގެ އިތުރުން ދެން ތިބި އާމިރުގެ ދަރިން ނަކީ އީރާ އާއި އެއްބަނޑު އެއްބަފާ ބޭބެ ޖުނައިދް ޚާން އާއި އެއްބަފާ ކޮއްކޮ އަޒަދް ރާއޯ ޚާން އެވެ.
