އެޕަލްގެ ފުރަތަމަ 5ޖީ ފޯނު އައިފޯން-12 ތަޢާރަފް ކޮށްފިއެވެ.

އެޕަލްގެ އުފެއްދުން ތަކަށް ލޯބިކުރާ ފަރާތްތަކަށް ރެއަކީ ވަރަށް ޙާއްސަ ރެއެކެވެ. އެ ކުންފުނިން ރޭ ވަނީ އައިޕޯން-12 ގެ 4 މޮޑެލެއް ދައްކާލާފަ އެވެ. އެއީ އައިފޯން-12، އާއި އައިފޯން-12 މިނީ، އަދި އައިފޯން-12 ޕްރޯއާއި، އައިފޯން-12 ޕްރޯ މެކްސް އެވެ.

އައިފޯން-12 އަކީ، އެޕަލް އިން އެންމެ ފަހުން ނެރުނު އައިފޯން-11 އާއި އަޅާބަލާއިރު 11 އިންސައްތަ ތުނި 15 އިންސައްތަ ކުޑަ އަދި 16 އިންސައްތަ ލުއި ފޯނެއް ކަމަށް އެކުންފުނިންބުނެ އެވެ. މިއީ އެޕަލްގެ ފުރަތަމަ އަލްޓްރާ ފާސްޓް ވަޔަރލެސް ނެޓްވޯކް، 5ޖީ ފޯނެވެ.

ފޮޓޯ ނަގަން ލޯބިކުރާ ފަރާތްތަކާއި މޯބައިލް ގޭމަށް ޝައުގުވެރިވާ ފަރާތްތަކަށް އައިފޯން-12 މީ "ހަމަ މަރެއް" ކަމަށް އެކުންފުނިންބުނެ އެވެ. އެގޮތުން އެ ކުންފުނިން ތަރައްގީކޮށް މިފޯނުގައި ބޭނުންކޮށްފައިވާ އޭ-14 ބަޔޮނިކް ޗިޕަކީ 5 ނެނޯމީޓަރ ޕްރޮސެސަރ އަކާއިއެކު، ސްމާޓްފޯނު އިންޑަސްޓްރީގައި މިހާތަނަށް އުފައްދާފައި ނުވާހާ އަވަސް ޗިޕެއް ކަމަށް އެޕަލް ކުންފުނިންބުނެ އެވެ. އެހެން ކަމުން ފޯނުން ގޭމުކުޅޭ ފަރާތްތަކަށް މިއީ ހަމަ އެންމެ އެކަށޭނެ ފޯނު ކަމަށް އެކުންފުނިން ބުނެފައިވެ އެވެ.

12 މެގަޕިކްސެލްގެ ވައިޑް ކެމެރާއަކާއި އަލްޓްރާ ވައިޑް ކެމެރާގެ ސަބަބުން އައިފޯން-12 އިން ނަގާ ފޮޓޯތައް އިތުރަށް ފުރިހަމަ ވެގެންދާނެއެވެ. އަދި މިއީ ލޯލައިޓް ކެމެރާ ތަކަކަށް ވުމުން އަނދިރީގައި ނުވަތަ ރޭގަނޑު ގަޑީގައި މި ފޯނުން ނަގާ ފޮޓޯތައް އިތުރަށް ފުރިހަމަ ވެގެންދާނެއެވެ.

އައިފޯން-12 ގައި ދެން އެންމެ ފާހަގަ ކޮށްލެވޭ ކަންކަމުގެ ތެރޭގައި ވަޔަލެސްކޮށް ޗާޖް ކުރުމާއި 6 މީޓަރާއި ހަމައަށް ފެނުއަޑީގައި 30 މިނިޓް ވަންދެން ފޯނު ގެންގުޅެވުމާއި، ސެރެމިކް ޝީލްޑް ގުލާސް ބޭނުން ކޮށްގެން ހަދާފައިވާ، ފަސޭހައިން ތަޅައިގެން ނުދާނެ ޑިސްޕްލޭ ހިމެނެއެވެ. ފަސޭހައިން ސްކްރީން ތަޅައިގެން ދިއުމަކީ އައިފޯނަށް ލޯބިކުރާ ފަރާތްތަކަށް މީގެކުރިން އޮތް އެންމެ ބޮޑު ކަންބަޮޑުވުމެވެ.

އައިފޯން-12 ފަސް ކުލައަކުން ބާޒާށް ނެރޭނެ އެވެ. އެއީ ނޫ، ފެހި، ކަޅު، ހުދު، ގެ އިތުރުން ޕްރޮޑަކްޓް ރެޑްގެ ނަމުގައި ނެރޭ ރަތްކުލައިގެ ފޯނެވެ. ރަތް ކުލައިގެ ފޯނު ވިއްކައިގެން ލިބޭ ފައިސާގެ ވަކި މިންވަރެއް ދާނީ ދުނިޔޭގެ، އެއިޑްސް އާ ދެކޮޅަށް މަސައްކަތްކުރާ ފަންޑަށެވެ. ނަމަވެސް މިއަހަރުގެ ޑިސެމްބަރުގެ ނިޔަލަށް މިބައިން ލިބޭ ފައިސާ ދިނުމަށް ހަމަޖެހިފައިވަނީ ކޯވިޑް-19 އާއި ދެކޮޅަށް ކުރާ މަސައްކަތަށް އެކުލަވާލާފައިވާ ފަންޑަށް ކަމަށް އެޕަލް ކުންފުނިން ބުނެއެވެ.

އައިފޯން-12 ގައި ހިމެނޭ މައިގަނޑު ހުރިހާ ސިފަތަކެއް ހިމެނޭ އައިފޯން-12 މިނީވެސް ރޭ ދައްކާލި އިރު އެފޯނުގެ އެންމެ ބޮޑު ތަފާތަކީ އައިފޯން-12 އަށްވުރެ ސައިޒުން ކުޑަ ވުމެވެ. އެގޮތުން އައިފޯން-12ގެ ބޮޑުމިނަކީ 6.1 އިންޗިއެވެ. އަދި މިނީގެ ބޮޑުމިނަކި 5.4 އިންޗިއެވެ.

އައިފޯން-12 ވިއްކުމަށް އެޕަލް ކުންފުނިން ކަނޑައަޅައިފައިވާ އަގަކީ 799 ޑޮލަރެވެ. އަދި މިނީ ވިއްކުމަށް ކަނޑައަޅާފައިވާ އަގަކީ 699 ޑޮލަރެވެ.

ރޭ ދައްކާލި އައިފޯން-12 ޕްރޯ އާއި ޕްރޯ މެކްސްގެ މައިގަނޑު ތަފާތަކީ ފޯނުގެ ސައިޒާއި ކެމެރާއެވެ. ޕްރޯގެ ބޮޑުމިނަކީ 6.1 އިންޗި އެވެ. މެކްސްގެ ބޮޑުމިނަކީ 6.7 އިންޗި އެވެ. ޕްރޯގެ ދެފޯނުގެ ވެސް ފަހަތުގައި 3 ކެމެރާއިންދެއެވެ. އެއީ 12 މެގަޕިކްސެލްގެ ވައިޑް ކެމެރާއަކާއި އަލްޓްރާ ވައިޑް ކެމެރާއެއްގެ އިތުރުން ޓެލެފޮޓޯ ކެމެރާއެކެވެ. މީގެ ސަބަބުން ޕްރޯގެ 2 ފޯނުން ނަގާ ފޮޓޯއާއި ވީޑިއޯ އެހެން ސްމާޓް ފޯނު ތަކަށް ވުރެ ކޮލިޓީ މާބޮޑުތަން ރަނގަޅު ވާނެކަމަށް އެޕަލް ކުންފުނިން ބުނެއެވެ.

ޕްރޯ މޮޑެލްގެ 2 ފޯނުގެ ހަތަރު ކުލައެއް އެޕަލް އިން ބާޒާރަށް ނެރޭނެއެވެ. އެއީ ގްރެފިޓް( ގަދަ އަޅި) ކުލައަކާއި، ރިހި ކުލައާއި، ރަން ކުލައިގެ އިތުރުން، ޕެސިފިކް ބްލޫ ( ނޫ ކުލައެއް) ގެ ފޯނެވެ. އައިފޯން-12 ޕްރޯގެ އަގަކީ 999 އެމެރިކާ ޑޮލަރެވެ. ރޭ ދައްކާލި ފޯނު ތަކުގެ ތެރެއިން އެންމެ އަގުބޮޑު ފޯނު އައިފޯން-12 ޕްރޯ މެކްސް ވިއްކަން ހަމަޖެހިފައި ވަނީ 1099 އެމެރިކާ ޑޮލަރަށެވެ.

އައިފޯން-12 އާއި 12 ޕްރޯ އަށް ޕްރީއޯޑަރު ކުރެވޭނީ އަންނަ ހުކުރު ދުވަހުން ފެށިގެންނެވެ. އަދި ފޯނު ބާޒާރުން ލިބޭނީ މިމަހުގެ 23 ވާ ހުކުރު ދުވަހުން ފެށިގެންނެވެ. އައިފޯން-12 މިނީ އާއި ޕްރޯ މެކްސްއަށް ޕްރީ އޯޑަރު ކުރެވޭނީ ނޮވެމްބަރު 06 ވަނަ ދުވަހުން ފެށިގެންނެވެ. އަދި މި ދެ ފޯނު ބާޒާރަށް ނެރޭނީ ނޮވެމްބަރު 13 އިން ފެށިގެންނެވެ.