ދިވެހިރައްޔިތުންގެ ޑިމޮކްރެޓިކް ޕާޓީ (އެމްޑީޕީ)ގެ މެންބަރުން ޕާޓީގެ ސިޔާސަތާ ދެކޮޅަށް އާންމު މީޑިއާގައި ވާހަކަ ދެއްކުން މަނާކުރުމަށް، ޕާޓީގެ އަސާސީ ޤަވާޢިދަށް ބަދަލު ހުށަހަޅައިފިއެވެ. ހުށަހަޅާފައިވާ ބަދަލުތަކުގެ ތެރެއިން، ޕާޓީގެ ސިޔާސަތަކާ ޚިލާފުވާ މެންބަރުން އެކަން ރަސްމީ ގޮތުން ހުށަހަޅަން ޖެހޭނެ ކަމަށާއި، އާންމު މީޑިއާގައި އެ ސިޔާސަތާ ދެކޮޅަށް ވާހަކަ ނުދެއްކޭނެ ކަމަށް ބަޔާންކޮށްފައިވެއެވެ. ބަދަލުތައް ހިމެނޭ ޤަވާޢިދު ފާސްކުރުމަށް ހުށަހަޅާނީ ކުރިއަށް އޮތް ޕާޓީގެ ކޮންގްރެހަށެވެ.
މީޑިއާގައި ދެކޮޅަށް ވާހަކަ ދެއްކުން މަނާކުރުމަށް ހުށަހަޅާފައިވީނަމަވެސް، ނޭޝަނަލް ކައުންސިލާއި ކޮމިޓީތަކުގެ ބައްދަލުވުންތަކަށް ހާޒިރުވުމާއި، ޕާޓީ ތެރޭގައި ޚިޔާލަކަށް ކެމްޕެއިން ކުރުމުގެ ޙައްޤު މެންބަރުންނަށް ދީފައިވެއެވެ. އަދި ޕާޓީގެ އިންތިޚާބުތަކުގައި ވޯޓުލެވޭނީ، އިންތިޚާބު އިޢުލާންކުރުމުގެ 60 ދުވަސް ކުރިން ރަޖިސްޓަރީ ވެފައިވާ މެންބަރުންނަށް ކަމަށްވެސް ހުށަހަޅާފައިވެއެވެ.
މެންބަރުންނާ ބެހޭ މި ބަދަލުތަކާއެކު، ޕާޓީގެ ލީޑަރޝިޕަށް ވެސް ބޮޑު ބަދަލެއް ހުށަހަޅާފައިވެއެވެ. އެގޮތުން، ޕާޓީގެ ރައީސްގެ މަޤާމު އުވާލައި، ޕާޓީގެ ހުރިހާ މެންބަރުން ވޯޓުލައިގެން ފަސް އަހަރަށް އިންތިޚާބުކުރާ ޗެއާޕާސަން، ޕާޓީގެ އެންމެ މަތީ ވެރިޔާ ކަމުގައި ހެދުމަށް ހުށަހަޅާފައިވެއެވެ. މިހާރު ޢަމަލުކުރާ 2022 ވަނަ އަހަރުގެ ޤަވާޢިދުގައި، ސިޔާސީ ކަންކަން ބަލަހައްޓަނީ ރައީސް ކަމަށާއި، ޕާޓީގެ އެތެރޭގެ އަދި އިދާރީ ކަންކަން ބަލަހައްޓަނީ ޗެއާޕާސަން ކަމަށެވެ. އާ ޤަވާޢިދުގައި ޗެއާޕާސަނަށް ސަރުކާރުގެ މުސާރަ ލިބޭ އެއްވެސް މަޤާމެއް ފުރިހަމަ ނުކުރެވޭނެ ކަމަށާއި، ޕާޓީ ވެރިކަމުގައި ހުންނަ ދުވަސްވަރު ޗެއާޕާސަން ވާނީ ރައީސުލްޖުމްހޫރިއްޔާގެ ސީނިއަރ އެޑްވައިޒަރަކަށް ކަމަށް ބަޔާންކޮށްފައިވެއެވެ. ޗެއާޕާސަންގެ ނައިބުންގެ އަދަދު ދޭއިން ތިނަކަށް އިތުރުކޮށް، އޭގެ ތެރޭގައި މަދުވެގެން އެކަކު އަންހެނަކަށް ވާން ޖެހޭނެ ކަމަށްވެސް ހުށަހަޅާފައިވެއެވެ.
އިންތިޤާލީ މާއްދާތަކުގެ ދަށުން، އާ ޤަވާޢިދު ޢަމަލުކުރަން ފަށާތާ ދެ މަސް ދުވަހުގެ ތެރޭގައި، ޤަވާޢިދުގެ ދަށުން އިންތިޚާބުކުރާ ހުރިހާ މަޤާމަކަށް އިންތިޚާބު ބާއްވަން ޖެހޭނެއެވެ. އެހެނަސް، އާ ޤަވާޢިދު ޢަމަލުކުރަން ފެށުމުގެ އެއް އަހަރު ތެރޭގައި އިންތިޚާބުވި މީހުންނަށް، އެމީހުންގެ މުއްދަތު ހަމަވާންދެން މަޤާމުގައި ތިބެވޭނެއެވެ. މިހާރުގެ ޤަވާޢިދުގައި ބުނެފައިވަނީ، ޤަވާޢިދު ޢަމަލުކުރަން ފަށާއިރު މަޤާމުގައި ހުރި ހުރިހާ މީހަކަށް މުއްދަތު ހަމަވާންދެން ތިބެނޭވެ ކަމަށެވެ.
ޕާޓީގެ ގުނަވަންތަކުގެ ބާރުތަކަށް ހުށަހަޅާފައިވާ ބަދަލުތަކުގެ ތެރޭގައި، ކޮންގްރެހުގެ ކޯރަމް، މިހާރުގެ ހަތަރު ބައިކުޅަ އެއް ބައި އާއި އެއްގެ ބަދަލުގައި، ބައިވެރިވާން ޙައްޤު ޑެލިގޭޓުންގެ 50 އިންސައްތައަށް ބޮޑުކޮށް، ކޮންގްރެހުގެ ބައްދަލުވުންތައް އާންމުކޮށް ބޭއްވުން ހިމެނެއެވެ. ނޭޝަނަލް ކައުންސިލަށް، ދާއިރާތަކުން 100 މެންބަރަކަށް އެއް މެންބަރުގެ ނިސްބަތުން މެންބަރުން އިންތިޚާބުކުރުމާއި، ކައުންސިލަށް މެންބަރުންގެ ރިފަރެންޑަމެއް ކުރުމާއި، ޕާލަމެންޓްގައި ޕީޖީ ޢަމަލުކުރާނެ ގޮތް ކަނޑައެޅުމުގެ ބާރު ދިނުމަށް ހުށަހަޅާފައިވެއެވެ. މިހާރު ވަރުގަދަ ނޭޝަނަލް އެކްޒެކެޓިވް ކޮމިޓީ، ޗެއާޕާސަނަށް ލަފާދޭ ކޮމިޓީއަކަށް ބަދަލުކުރުމަށްވެސް ހުށަހަޅާފައިވެއެވެ.
ޕާޓީގެ އުސޫލުތަކުގައި، އިސްލާމީ ޝަރީޢަތް ޕާޓީގެ ސިޔާސަތުތަކުގެ އެންމެ މައިގަނޑު ބިންގާ ކަމުގައި ހަދައި، ތަފާތު ނުކުރުމުގެ ލިސްޓު ފުޅާކޮށް، އިޖްތިމާޢީ އަދި އިޤްތިޞާދީ ޢަދުލުވެރިކަމާއި، ނިކަމެތި ބައިތަކަށް ރައްކާތެރިކަން ދިނުމާއި، ވިޔަފާރި ކުރިއެރުވުމާ ބެހޭ ބައިތަކާއި، ނޮން-އެލައިންޑް ބޭރުގެ ސިޔާސަތެއް ވެސް އިތުރުކޮށްފައިވެއެވެ.
މާލީ ޝަފާފިއްޔަތު ބޮޑުކުރުމުގެ ގޮތުން، ޕާޓީގެ އޮޑިޓް ރިޕޯޓާއި، ކޮންގްރެހުގެ ޑެލިގޭޓުންގެ އަދަދާއި ނަންތައް ޕާޓީގެ ވެބްސައިޓުގައި ޝާއިޢުކުރަން ޖެހޭނެ ކަމަށްވެސް ހުށަހަޅާފައިވެއެވެ.
ކޮމެންޓު ފޮނުވާ