ސެޕްޓެމްބަރު 24 ގެ ނިޔަލަށް ޓެކުހުގެ ގޮތުގައި ދައުލަތަށް 23.3 ބިލިޔަން ރުފިޔާ ލިބިފައިވާ ކަމަށް ފިނޭންސް މިނިސްޓްރީގެ އެންމެ ފަހުގެ ވީކްލީ ފިސްކަލް ޑިވެލޮޕްމަންޓްސް ރިޕޯޓުން ދައްކައެވެ. މިއީ ވޭތުވެދިޔަ އަހަރުގެ މި މުއްދަތުގައި ލިބުނު 21.3 ބިލިޔަން ރުފިޔާއާ އަޅާބަލާއިރު 9.4 އިންސައްތައިގެ އިތުރުވުމެކެވެ.
ރިޕޯޓުގައިވާ ގޮތުން، މި މުއްދަތުގައި އާމްދަނީއާއި ހިލޭ އެހީގެ ގޮތުގައި ދައުލަތަށް ޖުމްލަ 30.2 ބިލިޔަން ރުފިޔާ ލިބިފައިވާއިރު، އެއީ ކުރީ އަހަރަށްވުރެ 5 އިންސައްތަ އިތުރެވެ. ޓެކްސް އާމްދަނީ އިތުރުވުމަށް ބޮޑަށް ހިއްސާކޮށްފައިވަނީ ޖީއެސްޓީ 10.7 އިންސައްތަ އިތުރުވެ 4.1 ބިލިޔަން ރުފިޔާއަށް އެރުމާއި، އިމްޕޯޓް ޑިއުޓީ 13 އިންސައްތަ އިތުރުވެ 2.4 ބިލިޔަން ރުފިޔާއަށް އެރުމެވެ. ޓީޖީއެސްޓީގެ އާމްދަނީ ވެސް 2.7 އިންސައްތަ އިތުރުވެ 7.8 ބިލިޔަން ރުފިޔާއަށް އަރާފައިވެއެވެ.
ނަމަވެސް ޓެކްސް ނޫން އާމްދަނީ 11.5 އިންސައްތަ ދަށްވެ، 7.1 ބިލިޔަން ރުފިޔާއިން 6.3 ބިލިޔަން ރުފިޔާއަށް ވެއްޓިފައިވެއެވެ.
އާމްދަނީ އިތުރުވި ނަމަވެސް، ދައުލަތުގެ ޚަރަދު ވަނީ އެއަށްވުރެ ބޮޑު މިންވަރަކަށް އިތުރުވެފައެވެ. މި މުއްދަތުގައި ޖުމްލަ ޚަރަދު 18.8 އިންސައްތަ އިތުރުވެ 33.5 ބިލިޔަން ރުފިޔާއަށް އަރާފައިވާއިރު، ރިކަރަންޓް ޚަރަދު 28.8 ބިލިޔަން ރުފިޔާއަށާއި ކެޕިޓަލް ޚަރަދު 4.6 ބިލިޔަން ރުފިޔާއަށް އުފުލިފައިވެއެވެ.
ކޮމެންޓު ފޮނުވާ