އޯޓިޒަމާއި އޭޑީއެޗްޑީ ހުންނަ މުހައްމަދު ފައްޔާހް ހަސަން (ދޮންކަލޯ) އާއި އޭނާގެ ބައްޕަ ހަސަން ފަޔާޒަށް ގެއެއް އަޅައިދިނުމަށް ބޭއްވި ޓިކްޓޮކް ލައިވަކުން 1.2 މިލިއަން ރުފިޔާއަށްވުރެ ގިނަ ފައިސާ އެއްވެއްޖެ އެވެ.
"ހިޔާ ފޯ ދޮންކަލޯ" ނަމުގައި ރޭ 9:00 ން ފެށިގެން ދަންވަރު 1:00 އާ ހަމައަށް ކުރިއަށް ގެންދިޔަ މި ލައިވް ބޭއްވީ ފަޔާޒުގެ ޓިކްޓޮކް އެކައުންޓުންނެވެ. މި ހަރަކާތުގައި އިސްނަގައި މަސައްކަތްކުރީ ދިވެހި ޓިކްޓޮކްގައި މަޝްހޫރު އެމްޓީޕީ އާއި މަރިޔަމް ސަމާ އެވެ. އަދި އެތައް ޓިކްޓޮކް ހޯސްޓުން ވެސް ބައިވެރިވެ އެހީތެރިވި އެވެ. ލައިވް ފެށިތާ ގަޑިއިރު ދެބައިކުޅަ އެއްބައިވާއިރު 14,000 އަށްވުރެ ގިނަ މީހުން ބަލަމުން ދިޔަ އިރު، ލައިވް ނިމުނުއިރު ވެސް 12,000 މީހުން ބަލަމުން ދިޔަ އެވެ. ޓިކްޓޮކް ލައިވަކުން އެންމެ ގިނަ ފައިސާ އެއްކުރެވުނު ފަހަރަކީ މިއީ ކަމަށް ބެލެވެ އެވެ.
ބ. ހިތާދޫގައި ދިރިއުޅޭ 19 އަހަރުގެ ދޮންކަލޯ، 13 އަހަރުވަންދެން ބެލެހެއްޓީ މަންމަ އެވެ. އޭގެ ފަހުން ދަރިފުޅާ ހަވާލުވި ފަޔާޒު، ކަސްޓަމްސްގެ ވަޒީފާ ދޫކޮށް އުފަން ރަށަށް ބަދަލުވީ ދަރިފުޅަށް ވަގުތު ހުސްކުރުމަށެވެ. މިހާރު އޭނާ ހަރަދުތައް ހަމަޖައްސަނީ ރުއް ކެނޑުން ފަދަ މަސައްކަތްތަކުންނާއި ސަރުކާރުން ދޭ އެލަވަންސުންނެވެ. ކޮވިޑަށްފަހު އަތްމަތި ދަތިވުމާއެކު ދޮންކަލޯގެ ތެރަޕީ ވެސް ހުއްޓާލަން ޖެހުނެވެ.
ގިނަ އަހަރުތަކެއްވަންދެން މަސައްކަތް ހުއްޓިފައިވާ ގެ ނިންމައި ދަރިފުޅު އެތަނަށް ގެންދިއުމަކީ ފަޔާޒުގެ އެންމެ ބޮޑު އުންމީދެވެ. މި ވަރުގެ ފައިސާއެއް ލިބޭނެ ކަމަށް އުންމީދު ނުކުރި ކަމަށް ބުނި ފަޔާޒު، ލައިވް އިންތިޒާމުކުރި މީހުންނާއި އެހީތެރިވި އެންމެންނަށް ޝުކުރު އަދާކުރި އެވެ. ލައިވްގައި ބައެއް މީހުން ވަނީ ގެއަށް ބޭނުންވާ ފަރުނީޗަރާއި އެހެނިހެން ތަކެތި ހަދިޔާކުރާނެ ކަމަށް ވެސް ބުނެފަ އެވެ.
ކޮމެންޓު ފޮނުވާ