ކުރިއަށް އޮތް ދުވަސްތަކުގައި ވެސް ދިވެހިންނަށް ހެޔޮ ވެރިކަމެއް ފޯރުކޮށްދެވޭނީ އެމްޑީޕީއަށް ކަމަށް އެ ޕާޓީގެ ޗެއާޕާސަން، ކުރީގެ ރައީސް މުހައްމަދު ނަޝީދު ވިދާޅުވެއްޖެއެވެ. ނަޝީދު މިހެން ވިދާޅުވީ ބުރާސްފަތި ރޭ އެމްޑީޕީގެ ފަސް ވަނަ ކޮންގްރެސް ފެށުމުގެ ރަސްމިއްޔާތުގައި ވާހަކަފުޅު ދައްކަވަމުންނެވެ.
ޓެކްސް ނިޒާމު ތައާރަފްކުރުމުން ދައުލަތުގެ އާމްދަނީ ހަތް ބިލިއަން ރުފިޔާއިން 40 ބިލިއަން ރުފިޔާއަށް އިތުރުވި ކަމަށާއި، އޭގެ ސަބަބުން ޕެންޝަނާއި ޔަތީމު ކުދިންނަށް އިނާޔަތް، މިނިމަމް ވޭޖް އަދި ޑިގްރީ ފެންވަރަށް ހިލޭ ތައުލީމު ފަދަ ފައިދާތައް ރައްޔިތުންނަށް ލިބުނު ކަމަށް ނަޝީދު ވިދާޅުވި އެވެ. ދަތުރުފަތުރުގެ ނިޒާމުން ރަށްތައް ގުޅުވާލުމާއި ކޮވިޑް ވަބާއިން ގައުމު ސަލާމަތްކުރުމަކީ ވެސް އެމްޑީޕީގެ ކާމިޔާބީތަކެއް ކަމުގައި އެ މަނިކުފާނު ފާހަގަކުރެއްވި އެވެ.
ސަރުކާރަށް ފާޑުކިޔުއްވަމުން ނަޝީދު ވިދާޅުވީ ރާއްޖެ ދަނީ ގޮތެއް ނޭނގި ވެއްޓެމުން ކަމަށާއި ސަރުކާރު ބަދަލުކުރަން ޖެހޭ ކަމަށެވެ. ރާއްޖޭގެ ރައްކާތެރިކަން ކަށަވަރުވާނީ އަވަށްޓެރި ގައުމުތަކާ ގުޅިގެން ކަމަށާއި، އިންޑިއާ އިސްކުރުމަކީ ދިވެހިންނަށް ނިކަމެތިކަމެއް ނޫން ކަމަށް ވެސް ނަޝީދު ވިދާޅުވި އެވެ. ރާއްޖޭގެ ހާރިޖީ ސިޔާސަތު ކަނޑައަޅަނީ ރާއްޖޭގެ ޖޯގްރަފީ ކަމަށާއި، މި ވާހަކަތަކަކީ އެއްވެސް އެކުވެރި ގައުމަކާ ދެކޮޅަށް ދައްކާ ވާހަކައެއް ނޫން ކަމަށް ވެސް އެ މަނިކުފާނު ވިދާޅުވި އެވެ.
ޗައިނާގެ ސަފީރު ހިމެނޭ ގޮތަށް ބޭރުގެ ސަފީރުން ބައިވެރިވި މި ރަސްމިއްޔާތު ބޭއްވީ މާލެ ސިޓީ ކައުންސިލްގެ އާއްމު އިޖުތިމާއީ ހިދުމަތްތަކާ ބެހޭ އިމާރާތުގައެވެ. ހޮނިހިރު ދުވަހާ ހަމައަށް ކުރިއަށްދާ ކޮންގްރެސްގައި ޕާޓީގެ އަސާސީ ގަވާއިދަށް އިސްލާހުތަކެއް ހުށަހަޅާނެ އިރު، ކައުންސިލްތަކަށް ޚާއްޞަ އިންވެސްޓްމަންޓް ފޯރަމެއް ވެސް ބާއްވާނެ އެވެ.
ކޮމެންޓު ފޮނުވާ