ރައްޔިތުންގެ މަޖިލީހުގެ ތިންވަނަ ދައުރު ހޯމަ ދުވަހު ފެށޭނެ

ރައްޔިތުންގެ މަޖިލީހުގެ މި އަހަރުގެ ތިންވަނަ ދައުރުގެ މަސައްކަތްތައް އަންނަ ހޯމަ ދުވަހު ފެށޭނެ ކަމަށް މަޖިލިސް އިދާރާއިން ހާމަކޮށްފިއެވެ.

މަޖިލިސް އިދާރާއިން ބުނީ ދައުރުގެ ފުރަތަމަ ޖަލްސާ ބާއްވާނީ ހޯމަ ދުވަހުގެ ހެނދުނު 9:00 ގައި ކަމަށެވެ. އެ ޖަލްސާގެ އެޖެންޑާގައި ތިން ކަމެއް ހިމަނާފައިވާއިރު، އޭގެ ތެރޭގައި އޯ.އައި.ސީގެ މެމްބަރު ގައުމުތަކުގެ ކޮރަޕްޝަން ދެކޮޅު ގާނޫން ތަންފީޒުކުރާ މުއައްސަސާތަކުގެ އެއްބާރުލުމާ ބެހޭ މައްކާ ކޮންވެންޝަނުގައި ރާއްޖެ ބައިވެރިވުމަށް މަޖިލީހުގެ ރުހުން ހޯދުން ހިމެނެއެވެ. އަދި ކޮމިޝަނަރ ޖެނެރަލް އޮފް ޓެކްސޭޝަންގެ މަގާމަށް ފަރާތެއް އައްޔަންކުރުމާއި، ކުށްކޮށްގެން ހޯދާ މުދަލާ ބެހޭ ބިލުގެ ބަހުސް ވެސް އެ ޖަލްސާގައި ކުރިއަށް ގެންދެވޭނެއެވެ.

މި ދައުރު ފެށޭއިރު، ރަސްމާލޭގައި ހިންގަން ނިންމާފައިވާ 20 ބިލިއަން ޑޮލަރުގެ ވޯޓަރފްރަންޓް އެންޑް މެރީނާ މަޝްރޫއު ކުރިއަށް ގެންދިއުމަށް ގާނޫނުތަކަށް ގެންނަން ޖެހޭ ބަދަލުތައް އަވަސް އަވަހަށް މަޖިލީހަށް ހުށަހަޅަން ސަރުކާރުން މަސައްކަތް ކުރަމުން ދެއެވެ.