ފްލައި ދުބާއި ފްލައިޓްގެ ހާދިސާ: ސައޫދީގެ އެންޓީއެސްސީން ތަހުގީގު ފަށައިފި

ދުބާއީން ތެލް އަވީވަށް ދަތުރުކުރަމުން ދިޔަ ފްލައިދުބާއީގެ ފްލައިޓް އެފްޒެޑް1073، ބޯޓުގެ ދެ ޕައިލެޓުންގެ މެދުގައި ހިނގި ހަމަނުޖެހުމަކާ ގުޅިގެން ސައޫދީ އަރަބިއްޔާގެ ތަބޫކަށް ކުއްލި ހާލަތުގައި ޖެއްސި މައްސަލަ، އެ ގައުމުގެ ނޭޝަނަލް ޓްރާންސްޕޯޓް ސޭފްޓީ ސެންޓަރު (އެންޓީއެސްސީ) އިން ތަހުގީގުކުރަން ފަށައިފި އެވެ.

ބުދަ ދުވަހު ހިނގި މި ހާދިސާގައި ބޯޓު ޖައްސާފައި ވަނީ ތަބޫކްގެ އަމީރު ސުލްތާން ބިން އަބްދުލްއަޒީޒް އިންޓަނޭޝަނަލް އެއާޕޯޓަށެވެ. އެއާޕޯޓުން ބުނީ ބޯޓުން ޑިސްޓްރެސް ކޯލެއް ލިބުނީ ސައޫދީ ގަޑިން ހެނދުނު 8:44 ގައި ކަމަށާއި، އަނިޔާވެފައިވާ ކެޕްޓަނާއި ފަސްޓް އޮފިސަރު ފަރުވާއަށް ހޮސްޕިޓަލަށް ގެންގޮސްފައިވާ ކަމަށެވެ.

ރިޕޯޓުތަކުން ދައްކާ ގޮތުގައި ބޯޓުން ފުރަތަމަ ކުއްލި ހާލަތުގެ ކޯޑު '7700′ ފޮނުވި އިރު، އޭގެ ފަހުން ބޯޓަށް ގާނޫނާ ޚިލާފަށް ނުފޫޒު ފޯރުވާކަން އަންގައިދޭ '7500′ ކޯޑު ވެސް ފޮނުވައިފައިވެ އެވެ.

ފްލައިދުބާއީން ބުނީ ކޮކްޕިޓުގައި ހަމަނުޖެހުމެއް ހިނގުމުން ފަޅުވެރިން ރައްކާތެރިކަމާއެކު ބޯޓުގެ މިސްރާބު ބަދަލުކުރި ކަމަށާއި، ބޯޓުގައި ތިބި ހުރިހާ މީހުން ސަލާމަތުން ތިބި ކަމަށެވެ. ބޯޓުގައި ދަތުރުކުރި 174 ފަސިންޖަރުން ވަނީ ފްލައިދުބާއީގެ އެހެން ބޯޓެއްގައި ތެލް އަވީވަށް ފޮނުވާލާފަ އެވެ.

މަސްދަރު: އަނަދޮލު އޭޖެންސީ