ބޯޓު ސަލާމަތް ކުރުމުގައި ބޮޑު ދައުރެއް އަދާކުރީ އިންޑިއާގެ ކެޕްޓަނެއް

ދުބާއީން ތެލް އަވީވަށް ދަތުރުކުރަމުން ދިޔަ ފްލައިދުބާއީގެ ފްލައިޓް FZ1073 ވެއްޓުމުގެ ނުރައްކަލުން ސަލާމަތް ކުރުމުގައި މުހިންމު ދައުރެއް އަދާކުރީ އިންޑިއާގެ ރައްޔިތެއް ކަމަށްވާ ކެޕްޓަން ސްމިތު މައްޗަރު ކަމަށް ރިޕޯޓުތަކުގައި ބުނެފިއެވެ.

އިސްރާއީލުގެ އިސް ވެރިން ބުނާ ގޮތުގައި، ފްލައިޓުގެ ކޯ-ޕައިލެޓް ކެޕްޓަން މައްޗަރަށް ވަޅިން ހަމަލާދީފައި ބޯޓު ވައްޓާލަން މަސައްކަތް ކުރިއެވެ. އެ ވަގުތު 30 ސިކުންތު ނުވަނީސް ބޯޓު ގާތްގަނޑަކަށް 14,000 ފޫޓު ތިރިއަށް ދިޔައެވެ.

ރޮއިޓަރޒްގެ ރިޕޯޓެއްގައި ބުނާ ގޮތުގައި، ޒަޚަމްވެ ކޮކްޕިޓަށް ވެއްޓިފައި އޮވެ މައްޗަރު ކޮކްޕިޓުގެ ދޮރު ހުޅުވާލިއެވެ. އޭގެ ސަބަބުން ފަސިންޖަރުންނަށް ކޮކްޕިޓަށް ވަދެ ކޯ-ޕައިލެޓް ހިފަހައްޓައި ކޮންޓްރޯލް ކުރެވުނެވެ. އޭގެ ފަހުން ބޯޓުގައި ތިބި ފްލައިދުބާއީގެ އެހެން މުވައްޒަފަކު ބޯޓު ކޮންޓްރޯލްކޮށް، ސައުދީ އަރަބިއްޔާގެ ތަބޫކުގައި ރައްކާތެރިކޮށް ޖައްސާލިއެވެ.

ހަމަލާގައި ޒަޚަމްވި މައްޗަރަށް ތަބޫކުގެ ހޮސްޕިޓަލެއްގައި އޮޕަރޭޝަންކޮށް، މިހާރު އޭނާގެ ހާލު ސްޓޭބަލް ކަމަށް ރިޕޯޓުތަކުގައި ވެއެވެ. އޭނާގެ އާއިލާއާ ފްލައިދުބާއީ އާއި އިންޑިއާގެ އިދާރާތަކުން ގުޅުން ބާއްވަމުން ދާއިރު، ސައުދީ އަރަބިއްޔާ އާއި އެމިރޭޓްސްގެ އިދާރާތަކާ ގުޅިގެން އޭނާއަށް އެހީތެރިވެދެމުން އަންނަ ކަމަށް އިންޑިއާ ސަރުކާރުން ބުނެފައިވެއެވެ.

މައްޗަރު 2022 ވަނަ އަހަރުން ފެށިގެން ފްލައިދުބާއީގައި ކެޕްޓަނެއްގެ ގޮތުގައި ޚިދުމަތްކުރަމުން އަންނައިރު، އޭގެ ކުރިން ސްޕައިސްޖެޓްގައި ގާތްގަނޑަކަށް 11 އަހަރު ސީނިއަރ ކޮމާންޑަރެއްގެ ގޮތުގައި އަދި ޕައިލެޓުން ތަމްރީނު ކުރާ ކެޕްޓަނެއްގެ ގޮތުގައި މަސައްކަތްކޮށްފައިވެއެވެ. އޭނާގެ ކިބައިގައި ބޯއިންގ 737 ބޯޓުގައި ގާތްގަނޑަކަށް 9,750 ގަޑިއިރުގެ ފްލައިން ތަޖުރިބާ ހުރެއެވެ.

ކޯ-ޕައިލެޓް ސައުދީގެ އިދާރާތަކުން ބަންދު ކޮށްފައިވާއިރު، ހަމަލާގެ ސަބަބު ހޯދުމަށް ދަނީ ތަޙުޤީޤު ކުރަމުންނެވެ. ހާދިސާ ހިނގި ގޮތުގެ ފުރިހަމަ ތަފްސީލު އަދި ތަޙުޤީޤު ކުރަމުން ދާއިރު، ކޮކްޕިޓް ވޮއިސް ރެކޯޑަރު ބެލުމަށް ފަހު އިތުރު މަޢުލޫމާތު ހާމަކުރާނެ ކަމަށް ފްލައިދުބާއީން ބުނެފައިވެއެވެ.