ދިވެހި ވަޠަނީ ޚިދުމަތުގެ ކުރިމަގު ވަރަށް އުޖާލާކޮށް ފެންނަކަމަށް ރައީސުލްޖުމްހޫރިއްޔާ ވިދާޅުވެއްޖެއެވެ. ރައީސުލްޖުމްހޫރިއްޔާ މިހެން ވިދާޅުވެފައިވަނީ، ދިވެހި ޒުވާނުންގެ ކުރިމަގު ބައްޓަންކޮށް، އެމީހުންނަށް އާ ފުރުޞަތުތައް ހުޅުވާލުމުގެ އަމާޒުގައި 01 އޮކްޓޫބަރު 2025 ގައި ސަރުކާރުން ފެށި ދިވެހި ވަޠަނީ ޚިދުމަތަށް މިއަދު އެއް އަހަރު ފުރުމުގެ މުނާސަބާގައި ނެރުއްވި މެސެޖެއްގައެވެ.
ރައީސުލްޖުމްހޫރިއްޔާ ވިދާޅުވީ، ކޮންމެ އަހަރަކު އެއްހާސް ޒުވާނުން ތަމްރީނުކުރުމަށް ސަރުކާރުން ކަނޑައެޅި ލަނޑުދަނޑި ފުރަތަމަ އަހަރުވެސް ޙާޞިލްކުރެވިފައިވާ ކަމަށެވެ. ފާއިތުވި އަހަރަކީ ޒުވާނުންނަށްޓަކައި ދިވެހި ވަޠަނީ ޚިދުމަތުގެ ތެރެއިން ކާމިޔާބު އަދި އުފެއްދުންތެރި މަސައްކަތްތަކެއް ކޮށްދެވުނު އަހަރެއްކަމަށްވެސް ރައީސުލްޖުމްހޫރިއްޔާ ވިދާޅުވިއެވެ.
ރައީސުލްޖުމްހޫރިއްޔާ ހާމަކުރެއްވި ތަފްޞީލުތަކުން ދައްކާގޮތުގައި، ނޭޝަނަލް ސަރވިސް އިނީޝަލް ޓްރޭނިންގގެ ތެރެއިން 1،028 ދިވެހި ޒުވާނުން ތަމްރީނުކުރެވުނުއިރު، ނޭޝަނަލް ސަރވިސް ސްކިލް ޓްރޭނިންގ ޕްރޮގްރާމުގެ ތެރެއިން 136 ޒުވާނުން ތަމްރީނުކުރެވިފައިވެއެވެ. މިގޮތުން، ފުރަތަމަ އަހަރު ޖުމްލަ 1،164 ޒުވާނުންނަށް ދިވެހި ވަޠަނީ ޚިދުމަތުގެ ފައިދާ ކުރެވިފައިވެއެވެ.
މި މުނާސަބާގައި، ދިވެހި ވަޠަނީ ޚިދުމަތުގެ ތަމްރީނުތައް ފުރިހަމަކުރި ޒުވާނުންނަށާއި އެމީހުންގެ ޢާއިލާތަކަށް ރައީސުލްޖުމްހޫރިއްޔާ ތަހުނިޔާ ވިދާޅުވިއެވެ. އަދި، ޕްރޮގްރާމުގެ ކާމިޔާބު ޙަރަކާތް ކުރިއަށް ގެންދިއުމުގައި ޝާމިލުވާ ހުރިހާ ފަރާތްތަކަށް ރައީސުލްޖުމްހޫރިއްޔާ ޝުކުރު އަދާކުރެއްވިއެވެ.
ކުރިއަށް އޮތް މަރުޙަލާގައި، ނޭޝަނަލް ސަރވިސްގެ ތެރެއަށް ފަންނީ އިތުރު ދާއިރާތައް ތަޢާރަފްކޮށް، ނޭޝަނަލް ސަރވިސްގެ އިންޓަރންޝިޕް ޕްރޮގްރާމުތައްވެސް ތަޢާރަފްކުރެވޭނެކަމަށް ރައީސުލްޖުމްހޫރިއްޔާ ވިދާޅުވިއެވެ. އަދި، ނޭޝަނަލް ސަރވިސްގެ ތަމްރީނުތައް ފުރިހަމަކުރާ ޒުވާނުންނަށް ވަޒީފާގެ ފުރުޞަތުތައް ފަހިކޮށްދިނުމަށް ކުރާ މަސައްކަތުގައި، ނޭޝަނަލް ކެރިއަރ ސަރވިސްގެ ދައުރު ފުޅާކުރުމަކީވެސް ސަރުކާރުގެ އަމާޒެއްކަމަށް ރައީސުލްޖުމްހޫރިއްޔާ ވިދާޅުވިއެވެ.
ދިވެހި ވަޠަނީ ޚިދުމަތަކީ ޒުވާނުންގެ ހުނަރާއި ޤާބިލުކަން ތަރައްޤީކޮށް، ޤައުމީ ޒިންމާދާރުކަމުގެ ރޫޙު އާލާކޮށް، މުސްތަޤްބަލުގައި ވަޒީފާގެ ބާޒާރަށް ތައްޔާރުކޮށްދިނުމުގެ މަޤްޞަދުގައި ތަޢާރަފްކުރި ޕްރޮގްރާމެކެވެ.
ކޮމެންޓު ފޮނުވާ