ވިޔަފާރި ބަނދަރު ތިލަފުއްޓަށް ބަދަލުކުރުމަކީ މިހާރުގެ އެންމެ މުހިންމު މަޝްރޫޢު: ރައީސް

މާލޭ ވިޔަފާރި ބަނދަރު ތިލަފުއްޓަށް ބަދަލުކުރުމަކީ ރާއްޖޭގެ އިޤްތިޞާދު ފުޅާކޮށް، އުފެއްދުންތެރިކަން އިތުރުކޮށް، ވިޔަފާރިތައް ކުރިއަރުވާލުމަށް މިހާރު އެންމެ މުހިންމު މަޝްރޫޢު ކަމަށް ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު ވިދާޅުވެއްޖެއެވެ.

ބަނދަރު ބަދަލުކުރުމުގެ މަސައްކަތް ބައްލަވާލެއްވުމަށް މިއަދު ތިލަފުއްޓަށް ވަޑައިގެން، މީޑިއާއާ ވާހަކަފުޅު ދައްކަވަމުން ރައީސް ވިދާޅުވީ، ސަރުކާރުގެ ފަރާތްތަކާއި ބޭރުގެ އެހީތެރިންނާއެކު މި މަސައްކަތް ކާމިޔާބުކަމާއެކު ކުރިއަށްދާ ކަމަށެވެ. ރެޔާއި ދުވާލު ބުރަކޮށް މަސައްކަތްކުރާ މިނިސްޓްރީތަކާއި ކުންފުނިތަކުގެ މުވައްޒަފުންނަށް ރައީސް ޝުކުރު ދެންނެވިއެވެ. ރައީސަށް މަރުޙަބާ ދެންނެވީ މޯލްޑިވްސް ޕޯޓްސް ލިމިޓެޑް (އެމްޕީއެލް)ގެ ސީއީއޯ ކެޕްޓަން ޙުސައިން ޝަފީޤެވެ.

މި މަޝްރޫޢުގެ ދަށުން އެތެރޭގެ އުޅަނދުފަހަރަށް ޚާއްޞަ ކީ-ވޯލްގެ ފުރަތަމަ 100 މީޓަރު ނިމި، ހިއްކި ސަރަޙައްދު ބެކްފިލްކުރުމުގެ 40 އިންސައްތަ ހާއްސަ މަސައްކަތް ނިމިފައިވާއިރު، ޓާމިނަލް ޢިމާރާތްތައް އަޅާނެ ކޮންޓްރެކްޓަރަކު ހޮވުމުގެ މަސައްކަތް ވެސް ކުރިއަށްދެއެވެ. އަންނަ އަހަރުގެ ނޮވެންބަރުގައި ތިލަފުށީގައި ބަނދަރުގެ އޮޕަރޭޝަން ފަށާނެ ކަމުގެ ޔަޤީންކަން ރައީސް މީގެކުރިން ދެއްވާފައިވެއެވެ.

60 ހެކްޓަރުގެ ބިމުގައި ގާއިމުކުރާ ބަނދަރު ހުޅުވާއިރު އަހަރަކު 390،000 ޓީއީޔޫގެ ކޮންޓެއިނަރު ހިފެހެއްޓޭނެއެވެ. މުޅި މަޝްރޫޢު ނިމުމުން މި ކެޕޭސިޓީ 1.8 މިލިއަން ޓީއީޔޫއަށް އިތުރުވާނެއެވެ. ބައިނަލްއަޤްވާމީ ކޮންޓެއިނަރު ބޯޓުތަކަށް 14.6 މީޓަރުގެ ފުންމިނާއެކު 375 މީޓަރު ދިގު ކީ-ވޯލެއް ހެދޭއިރު، ދެން އެ ކީ-ވޯލް 1.4 ކިލޯމީޓަރަށް ދިގުކުރެވޭނެއެވެ. ރާއްޖޭގެ އުޅަނދުފަހަރަށް 2 ކިލޯމީޓަރަށްވުރެ ދިގު ކީ-ވޯލެއް ވެސް ހެދޭނެއެވެ.

މިހާރު މާލޭ ބަނދަރުގައި މުދާ ބަރުކޮށް ބާލުމަށް 7 އިން 14 ދުވަސް ނަގާއިރު، އައު ބަނދަރާއެކު އެ މުއްދަތު ގާތްގަނޑަކަށް 2 ދުވަހަށް ކުރުވާނެ ކަމަށް ލަފާކުރެވެއެވެ. ބަނދަރު ހުޅުވާއިރު ޝިޕް-ޓު-ޝޯ ކެރޭން 2 އާއި މޮބައިލް ހާބަރ ކެރޭނެއް ގާއިމުކުރެވޭނެއެވެ.