މާލޭ ވިޔަފާރި ބަނދަރާއި އެކުއެކީ ކ. ތިލަފުށީގައި ވެސް މި މަހުގެ 27 އިން ފެށިގެން ބަނދަރުގެ އޮޕަރޭޝަން ފަށާނެ ކަމަށް މޯލްޑިވްސް ޕޯޓްސް ލިމިޓެޑް (އެމްޕީއެލް) އިން ހާމަކޮށްފި އެވެ.
ބަނދަރު ބަދަލުކުރުމުގެ މަސައްކަތް ބައްލަވައިލެއްވުމަށް ރައީސް ޑރ. މުހައްމަދު މުއިއްޒު އިއްޔެ ތިލަފުއްޓަށް ވަޑައިގެންނެވިއިރު، އެމްޕީއެލްގެ ސީއީއޯ ހުސައިން ޝަރީފް ވިދާޅުވީ، މާލޭ ބަނދަރުގައި ފުދޭ ވަރަށް ވަސީލަތް ނެތުމުން މުދާ ބޭލުން ލަސްވާތީ، އެ ދަތިތައް ކުޑަކުރުމަށް ތިލަފުށީގައި ވަގުތީގޮތުން އޮޕަރޭޝަން ފަށަން ނިންމި ކަމަށެވެ. އަންނަ އަހަރު ބަނދަރު ހުޅުވުމަށް ކުރިއަށް އޮތް ދުވަސްތަކުގައި މަސައްކަތުގެ ބާރު ދެގުނަ ކުރާނެ ކަމަށް ވެސް އޭނާ ވިދާޅުވި އެވެ.
ރައީސް މުއިއްޒު ވިދާޅުވީ، މިއީ މިވަގުތު ރާއްޖޭގައި ހިންގާ އެންމެ ބޮޑު އިގްތިސާދީ މަޝްރޫއު ކަމަށާއި، ފުރަތަމަ ފިޔަވަޅު ނިންމައި އަންނަ އަހަރުގެ ނޮވެމްބަރު 11 ގައި ބަނދަރު ހުޅުވާނެ ކަމަށެވެ. އަލަށް ހުޅުވާ ބަނދަރަކީ މާލޭ ބަނދަރަށް ވުރެ ހަތަރު ގުނަ ބޮޑު ތަނެއް ކަމަށް ވެސް ރައީސް ވިދާޅުވި އެވެ.
60 ހެކްޓަރުގެ ބިމުގައި ގާއިމުކުރާ ބަނދަރުގައި ފުރަތަމަ ފިޔަވަޅުގައި އަހަރަކު 390،000 ޓީއީޔޫ ކޮންޓެއިނަރު ގެންގުޅެވޭނެ އަދި ފަހުން އެ ކެޕޭސިޓީ 1.8 މިލިއަން ޓީއީޔޫއަށް އިތުރުކުރެވޭނެ އެވެ. ބޮޑެތި ކޮންޓެއިނަރު ބޯޓުތަކަށް 14.6 މީޓަރުގެ ފުނަށް 375 މީޓަރުގެ ކީ-ވޯލެއް ހަދާއިރު، ޑޮމެސްޓިކް އުޅަނދުފަހަރަށް ދެ ކިލޯމީޓަރަށް ވުރެ ދިގު ކީ-ވޯލެއް ހަދާނެ އެވެ. މިހާރު ހަތް ދުވަހުން 14 ދުވަހާ ދެމެދަށް ނަގާ މުދާ ބޭލުމުގެ މުއްދަތު ގާތްގަނޑަކަށް ދެ ދުވަހަށް ކުރުކުރެވޭނެ ކަމަށް އެމްޕީއެލް އިން ބުނެ އެވެ.
މިހާތަނަށް ޑޮމެސްޓިކް ކީ-ވޯލްގެ ފުރަތަމަ 100 މީޓަރު ނިމި، ބެކްފިލް ކުރުމުގެ 40 ޕަސެންޓު ވަނީ ނިމިފަ އެވެ. ކީ-ވޯލް ތަރައްގީކުރުމުގެ މަސައްކަތް ޗައިނާ ހާބަ އިންޖިނިއަރިންގ ކޮމްޕެނީ (ސީއެޗްއީސީ) އާ ވަނީ ޖުލައި 20 ގައި ހަވާލުކޮށްފަ އެވެ.
ކޮމެންޓު ފޮނުވާ