ރިޔާސީ އިންތިޚާބަށް ވާދަކުރާ ކެންޑިޑޭޓް ސަރުކާރު އެކުލަވާލުމާއި މުހިންމު ސިޔާސަތުތަކުގައި ޕާޓީއާ މަޝްވަރާކުރާނެ ކަމުގެ އެއްބަސްވުމެއްގައި ސޮއިކުރަން ޖެހޭނެ ގޮތަށް، މޯލްޑިވިއަން ޑިމޮކްރެޓިކް ޕާޓީ (އެމްޑީޕީ) ގެ އަސާސީ ގަވާއިދަށް ބަދަލު ހުށަހަޅައިފިއެވެ.
މި ބަދަލު ހިމެނޭ އާ އަސާސީ ގަވާއިދު ފާސްކުރުމަށް ހުށަހަޅާނީ ޕާޓީގެ ކުރިއަށް އޮތް ކޮންގްރެސްއަށެވެ. 2024 ވަނަ އަހަރުގެ 21 އޮގަސްޓުގައި އިސްލާހުކުރި، މިހާރު ޢަމަލުކުރާ 2022 ގެ އަސާސީގައި ރިޔާސީ ކެންޑިޑޭޓަށް މިފަދަ ޝަރުތެއް ނެތެވެ.
ހުށަހެޅިފައިވާ އަސާސީގައި ޕާޓީގެ ލީޑަރޝިޕް އޮނިގަނޑަށް ވެސް ބޮޑު ބަދަލުތަކެއް ގެނެސްފައިވެއެވެ. އެގޮތުން ޕާޓީގެ ރައީސްގެ މަޤާމު އުވާލައި، ޕާޓީގެ އެންމެ އިސް ވެރިއަކަށް ހަދާފައިވަނީ ޗެއާޕަރސަންއެވެ. ޗެއާޕަރސަން ހޮވާނީ ހުރިހާ މެމްބަރުން ވޯޓުލައިގެން، ފަސް އަހަރު ދުވަހަށެވެ. ޗެއާޕަރސަނަށް ސަރުކާރުގެ މުސާރަ ލިބޭ އެއްވެސް މަޤާމެއް ފުރުމުގެ ހުއްދަ ނުލިބޭނެއެވެ. ނަމަވެސް ޕާޓީ ސަރުކާރުގައި ހުންނައިރު، ޗެއާޕަރސަން ވާނީ ދިވެހިރާއްޖޭގެ ރައީސްގެ ސީނިއަރ އެޑްވައިޒަރަކަށެވެ.
އަދި ޕާޓީގެ ގައުމީ މަޖިލީހަށް ޕާލިމެންޓްގައި ޕާޓީގެ ޕީޖީ ޢަމަލުކުރާނެ ގޮތް ކަނޑައަޅައި މަޝްވަރާ ދިނުމުގެ ބާރު ވެސް އާ އަސާސީ ގަވާއިދުން ލިބިދޭނެއެވެ.
ކޮމެންޓު ފޮނުވާ