ބުރުކީނާ ފާސޯގެ ތާރީހުގައި ފުރަތަމަ ފަހަރަށް، ރަން ސާފުކުރާ ރިފައިނަރީއެއް ހުޅުވައިފިއެވެ. "ރަފިނޯ-ބީއެފް" ނަމުގައި ހުޅުވި މި ކާރުހާނާއަކީ ބޭރުގެ ގައުމުތަކަށް، ހާއްސަކޮށް ހުޅަނގުގެ ގައުމުތަކަށް ބަރޯސާވުން ކުޑަކުރުމަށް އަސްކަރީ ސަރުކާރުން ކުރާ މަސައްކަތުގެ ބައެކެވެ.
ހުޅުވުމުގެ ރަސްމިއްޔާތުގައި ރައީސް އިބްރާހީމް ޓްރައޮރޭ ވިދާޅުވީ، މިހާރު ފެށިގެން ރަން ސާފުކުރުމާއި، ފެންވަރު ބެލުމާއި، އަގު ކަނޑައެޅުމާއި، ސެޓިފިކެޓް ދިނުމުގެ މަސައްކަތް ކުރާނީ ގައުމުގެ ތެރޭގައި ކަމަށެވެ. އަދި ގުދުރަތީ ވަސީލަތްތަކަކީ ރައްޔިތުންނަށް ނިސްބަތްވާ އެއްޗެއް ކަމުން، އޭގެ ފައިދާ ރައްޔިތުންނަށް ލިބެންވާނެ ކަމަށް ވެސް ވިދާޅުވިއެވެ.
ވެރިރަށް އޮގަދޫގޫގައި ފަސް ހެކްޓަރުގެ ބިމެއްގައި ބިނާކުރި މި ރިފައިނަރީއަށް، އަހަރަކު 164 ޓަނުގެ ރަން ސާފުކުރެވޭނެއެވެ. ކުރިއަށް އޮތް ދުވަސްތަކުގައި އެ އަދަދު 515 ޓަނަށް އިތުރުކުރަން ރާވާފައިވެއެވެ. 19 މިލިއަން ޑޮލަރަށްވުރެ ގިނަ ފައިސާ ހޭދަކުރި މި މަޝްރޫއަށް ފައިސާ ހޭދަކުރީ ސަރުކާރުގެ ކުންފުނި ސޮނާސްޕާއި އަމިއްލަ ފަރާތްތަކުންނެވެ. ފާއިތުވި އަހަރު ބުރުކީނާ ފާސޯން 94 ޓަން ރަން އުފައްދާފައިވެއެވެ.
2022 ގެ ބަޣާވާތުން ވެރިކަމަށް އެރި ޓްރައޮރޭގެ ސަރުކާރުން، ގުދުރަތީ ވަސީލަތްތަކަކީ ގައުމީ ސިޔާދަތާ ގުޅިފައިވާ ކަމެއްގެ ގޮތުގައި ދެކެއެވެ. ސަރަހައްދުގެ އެހެން ގައުމުތަކުން ވެސް މިފަދަ ފިޔަވަޅުތައް އަޅަމުންދާއިރު، މާލީން ރަޝިޔާގެ ކުންފުންޏަކާ ގުޅިގެން ރިފައިނަރީއެއް ބިނާކުރަމުންދާއިރު، އައިވަރީ ކޯސްޓުން ވެސް އަންނަ އަހަރު މިފަދަ ތަނެއް ހުޅުވާނެއެވެ.
ސަރަހައްދުގައި އެންމެ ގިނައިން ރަން އެކްސްޕޯޓްކުރާ ގައުމުތަކުގެ ތެރޭގައި ހިމެނޭ ބުރުކީނާ ފާސޯއަށް، އަލްގައިދާ އާއި އައިއެސްއާ ގުޅުންހުރި ޖަމާއަތްތަކުގެ ހަމަލާތަކުގެ ސަބަބުން މި ދާއިރާގައި ވަނީ ބޮޑެތި ގޮންޖެހުންތަކާ ކުރިމަތިލާން ޖެހިފައެވެ.
ކޮމެންޓު ފޮނުވާ