މެލޭޝިއާގެ ކުރީގެ ބޮޑުވަޒީރު، ޑރ. މަހާތީރު މުހައްމަދު ހޮސްޕިޓަލުގައި އެޑްމިޓްކޮށްފިއެވެ. 101 އަހަރުގެ މަހާތީރު ނޭޝަނަލް ހާޓް އިންސްޓިޓިއުޓް (އައިޖޭއެން) ގައި އެޑްމިޓްކުރީ އިއްޔެ ރޭގައި ކަމަށް އެމަނިކުފާނުގެ އޮފީހުން ކަށަވަރުކޮށްދީފައިވެއެވެ.
ޑރ. މަހާތީރު އެޑްމިޓް ކޮށްފައިވަނީ، 70 އަހަރު ވަންދެން މަހާތީރާއެކު އުޅުއްވި އަނބިކަނބަލުން ސިއްތި ހަސްމާ، ހަމަ އެ ހޮސްޕިޓަލުގައި އަވަހާރަވުމުން ދުވަހަކު ފަހުންނެވެ.
އެޑްމިޓްކުރި ސަބަބު އަދި ހާމައެއް ނުކުރެއެވެ. މަހާތީރުގެ އެހީތެރިޔާ ސޫފީ ޔޫސުފް ވިދާޅުވީ ޑޮކްޓަރުންގެ ޑައިގްނޯސިސްއަށް އިންތިޒާރުކުރަމުންދާ ކަމަށެވެ. ނަމަވެސް، ދަރިކަލުން މޮޚްޒާނީ ބަނާމާ އަށް ވިދާޅުވީ، ފާއިތުވި ދެ ދުވަހަކީ ބައްޕައަށް ހިތާއި ހަށިގަނޑަށް ވަރަށް ބުރަ ދުވަސްތަކެއް ކަމުގައި ވިޔަސް، މިހާރު ހާލު ރަނގަޅު ކަމަށެވެ.
މަހާތީރަށް ވަނީ ފަހުގެ ދުވަސްތަކުގައި ތަކުރާރުކޮށް ހޮސްޕިޓަލުގައި ފަރުވާ ހޯއްދަވަން ޖެހިފައެވެ. މިއަހަރުގެ ޖެނުއަރީގައި ވެއްޓިގެން އުނަގަނޑުގެ ކަށިގަނޑެއް ބިނދުނު އިރު، މިހާރު ބޭނުންކުރައްވަނީ ފުރޮޅުލީ ގޮނޑިއެވެ. 2024 ގައި ފުއްޕާމޭގެ އިންފެކްޝަނަކަށް ފަރުވާ ހޯއްދެވި އިރު، ކުރިން ދެފަހަރު ހިތުގެ ބައިޕާސް ސާޖަރީ ހައްދަވާފައިވެއެވެ.
އަނބިކަނބަލުން ނިޔާވުމާ ގުޅިގެން ބޮޑުވަޒީރު އަންވަރު އިބްރާހީމާއި ސަރަހައްދުގެ ވެރިން ވަނީ ތައުޒިޔާ ފޮނުއްވާފައެވެ. މަހާތީރަކީ ދެ ދައުރެއްގައި ޖުމްލަ 24 އަހަރު މެލޭޝިއާގެ ބޮޑުވަޒީރުކަން ކުރެއްވި، ސަރަހައްދުގެ އެންމެ ނުފޫޒުގަދަ ލީޑަރުންގެ ތެރެއިން ބޭފުޅެކެވެ.
ކޮމެންޓު ފޮނުވާ