އީރާނާ ދެކޮޅަށް ކުރިއަށްދާ ހަނގުރާމަ ކައިރި މުއްދަތެއްގައި ނިމުމަކަށް އަންނާނެ ކަމަށް އެމެރިކާގެ ރައީސް ޑޮނަލްޑް ޓްރަމްޕް އަލުން ބުނެފިއެވެ. ނަމަވެސް އެކަން ވާނެ ގޮތެއް އޭނާ ބަޔާންކޮށްފައެއް ނުވެއެވެ. އަދި އީރާނަށް ނިއުކްލިއަރ ހަތިޔާރެއް ހޯދަން ދޫނުކުރާނެ ކަމަށްވެސް ޓްރަމްޕް ވަނީ ބުނެފައެވެ.
މިއަށް ރައްދުދެއްވަމުން އީރާނުގެ ސުޕްރީމް ނޭޝަނަލް ސެކިއުރިޓީ ކައުންސިލްގެ ސެކްރެޓަރީ މުޙުސިން ރެޒާއީ ވިދާޅުވީ، ސުލްޙައަށްވެސް ހަނގުރާމައަށްވެސް ކުރިއަށް ނުދެވޭ ނުރައްކާތެރި ހާލަތެއްގައި ޓްރަމްޕް ވަނީ ހައްޔަރުވެފައި ކަމަށެވެ. ނިއުޔޯކްގައި ދެ ޤައުމުގެ މަސްއޫލުވެރިން މަޝްވަރާކުރި ނަމަވެސް، އެއްބަސްވުމަކަށް އަދި ނާދެވެއެވެ. އީރާނުން އެދެނީ އެ ޤައުމާ ދެކޮޅަށް އަޅާފައިވާ އިޤްތިޞާދީ ފިޔަވަޅުތައް ނައްތާލުމަށް ކަމަށްވާއިރު، އެމެރިކާއިން ދަނީ ފިއްތުންތައް އިތުރަށް ގަދަކުރަމުންނެވެ.
އީރާނުގެ ޢަސްކަރިއްޔާއަށް އެހީވާ ކަމުގެ ތުހުމަތުގައި ޗައިނާ، ޕާކިސްތާން، ތުރުކީ، ސަޢޫދީ ޢަރަބިއްޔާ އަދި އީރާނަށް ނިސްބަތްވާ 10 ފަރުދަކާއި ކުންފުންޏެއް، އެމެރިކާއިން ވަނީ ދަތިކުރުމުގެ ފިޔަވަޅުތަކުގެ ލިސްޓަށް އިތުރުކޮށްފައެވެ.
މީގެ އިތުރުން، އައިއާރްޖީސީން ވަނީ އެމެރިކާގެ ވޯޓަރުންނަށް ހުޅުވާލެވިފައިވާ ސިޓީއެއް ފޮނުވައި، ކުރިއަށްއޮތް މިޑްޓަރމް އިންތިޚާބުގައި ޓްރަމްޕްގެ ސަރުކާރު ބަދަލުކުރުމަށް ގޮވާލާފައެވެ. ހަނގުރާމައިގެ ހަޤީޤަތާ ބެހޭގޮތުން ޓްރަމްޕް ރައްޔިތުންނަށް ދޮގުހަދަމުންދާ ކަމަށްވެސް އެ ސިޓީގައި ތުހުމަތުކޮށްފައިވެއެވެ.
ހަނގުރާމަ ކުރިއަށްދިޔަ ނަމަވެސް، ހުރުމުޒު ކަނޑުއޮޅިން ތެޔޮ އުފުލާ މިންވަރު ވަނީ ހަނގުރާމައިގެ ކުރީގެ ފެންވަރާ ގާތަށް އަރާފައެވެ. ކްޕްލަރގެ މަޢުލޫމާތުތަކުން ދައްކާގޮތުގައި، ފާއިތުވި ހަފްތާގައި ދުވާލަކު އެވްރެޖްކޮށް 13.2 މިލިއަން ފީފާ ތެޔޮ އެ މަގުން އުފުލާފައިވެއެވެ.
ކޮމެންޓު ފޮނުވާ