ކުޑަކުދިންނަށް ކުރާ ހުރިހާ ބާވަތެއްގެ އަނިޔާ ހުއްޓުވުމާއި، ކުދިންގެ ހައްގުތައް ހިމާޔަތްކުރުމުގެ ނިޒާމު ވަރުގަދަކުރުމަށް އެކުލަވާލާފައިވާ "ބޮގޯޓާ ކޯލް ޓު އެކްޝަން" ބައިނަލްއަގުވާމީ ގަރާރުގައި ދިވެހިރާއްޖެ ސޮއިކޮށްފި އެވެ.
ރާއްޖޭގެ ނަމުގައި މި ގަރާރުގައި ސޮއިކުރެއްވީ ހެލްތު، ފެމިލީ އެންޑް ވެލްފެއަރ މިނިސްޓަރު ގީލާ އަލީ އެވެ. ގަރާރުގެ މައިގަނޑު ބޭނުމަކީ ކުދިންނަށް އަނިޔާވާ މައްސަލަތަކަށް ގައުމީ އަދި ބައިނަލްއަގުވާމީ ފެންވަރުގައި ރައްދުދޭ ގޮތް ހަރުދަނާކުރުމެވެ.
ސޮއިކުރުމުގެ ރަސްމިއްޔާތުގައި ވާހަކަފުޅު ދައްކަވަމުން މިނިސްޓަރު ވިދާޅުވީ، މި ދާއިރާގައި ހަގީގީ ކުރިއެރުމެއް ހޯދޭނީ ދިގު މުއްދަތަށް ދެމިހުންނަ މަސައްކަތަކުން ކަމަށާއި، އެކަމުގައި ސަރުކާރުގެ އިދާރާތަކާއި، އާއިލާތަކާއި، މަދަނީ ޖަމުއިއްޔާތަކާއި، ތަރައްގީގެ ބައިވެރިންނާއި، ކުދިން ވެސް އެކުގައި ބައިވެރިވާން ޖެހޭ ކަމަށެވެ.
ކުޑަކުދިން ރައްކާތެރިކުރުމަށް ދެއްވާ ސަމާލުކަމަށްޓަކައި ރައީސް ޑރ. މުހައްމަދު މުއިއްޒަށާއި، ޔުނިސެފް ހިމެނޭ ގޮތަށް އެހީތެރިވެދެއްވާ ހުރިހާ ފަރާތްތަކަށް މިނިސްޓަރު ވަނީ ޝުކުރު ދަންނަވާފަ އެވެ.
މި ގަރާރުގެ ދަށުން ކުރާ މަސައްކަތްތައް ކުދިންގެ ދިރިއުޅުމަށް ދާއިމީ ހެޔޮ ބަދަލު ގެނެސްދޭ އަމަލީ ފިޔަވަޅުތަކަކަށް ހެދުމަށް، ގައުމީ އަދި ބައިނަލްއަގުވާމީ ފަރާތްތަކާ ގުޅިގެން މަސައްކަތްކުރާނެ ކަމުގެ ޔަގީންކަން ހެލްތު މިނިސްޓްރީން ދީފި އެވެ.
ކޮމެންޓު ފޮނުވާ