ރާއްޖޭގެ ފަތުރުވެރިކަމުގެ ސިނާއަތުގައި ސަލާމަތާއި ރައްކާތެރިކަން ގާއިމުވެފައި އޮތީ ހަމައެކަނި ނަސީބުން ނޫން ކަމަށާއި، އެއީ މި ދާއިރާގެ ހާސްތަކެއް މުވައްޒަފުން ދުވަހުން ދުވަހަށް ކުރާ ބުރަ މަސައްކަތުގެ ނަތީޖާ ކަމަށް ކުރީގެ ޕޮލިސް ކޮމިޝަނަރު އަދި ގޭޖު ޕްރައިވެޓް ލިމިޓެޑްގެ ބާނީ އަބްދުﷲ ރިޔާޒު ވިދާޅުވެއްޖެއެވެ.
ރިޔާޒު މިހެން ވިދާޅުވީ، މޯލްޑިވްސް އެސޯސިއޭޝަން އޮފް ފަޔާ އެންޑް ސޭފްޓީ ސާވިސް އިންޑަސްޓްރީ (މަފްސީ) އިން ބާސެލޯ ނަސަންދުރައިގައި ބާއްވާ ދެ ދުވަހުގެ ސޭފްޓީ އެންޑް ސެކިއުރިޓީ ކޮންފަރެންސް 2026 ގެ ފުރަތަމަ ދުވަހު މިއަދު ވާހަކަ ދައްކަވަމުންނެވެ.
ދުނިޔޭގެ ހިތްގައިމު މަންޒިލެއްގެ ގޮތުގައި ރާއްޖެ ބިނާވެފައިވަނީ ޖީލުތަކެއްގެ މަސައްކަތުން ކަމަށް ރިޔާޒު ވިދާޅުވިއެވެ. ރާއްޖެ އަންނަ ފަތުރުވެރިންނަށް އަމިއްލަ ރައްކާތެރިކަމާ މެދު ވިސްނާކަށް ނުޖެހެނީ ފަސްޓް ރެސްޕޮންޑަރުންނާއި، ރެގިއުލޭޓަރުންނާއި، މެނޭޖަރުންނާއި، ހިދުމަތްދޭ އެކި ފަރާތްތަކުގެ ވަރުބަލިކަމެއް ނެތް މަސައްކަތުގެ ސަބަބުން ކަމަށް އޭނާ ފާހަގަކުރެއްވިއެވެ.
އެއް މަގުސަދަކަށް މަސައްކަތް ކުރި ނަމަވެސް މި ފަރާތްތަކަށް އެއް ތަނެއްގައި ބައްދަލުވުމުގެ ފުރުސަތު މަދު ކަމަށާއި، މި ކޮންފަރެންސްގެ ބޭނުމަކީ އެ ހުރިހާ ފަރާތެއް ގުޅުވައި، ތަޖުރިބާ ހިއްސާކޮށް، މުސްތަގުބަލަށް ރޭވުމުގެ ފުރުސަތު ހޯދައިދިނުން ކަމަށް ރިޔާޒު ވިދާޅުވިއެވެ.
ކޮންފަރެންސަށް ހޯމްލޭންޑް ސެކިއުރިޓީ، ޓޫރިޒަމް އަދި ޑިފެންސް މިނިސްޓްރީގެ އިތުރުން މަޓީ އާއި އެންއެޗްޖީއޭއެމްގެ ތާއީދު ލިބިފައިވާއިރު، ބައިނަލްއަގުވާމީ އިދާރާތަކާއި އަމިއްލަ ކުންފުނިތަކުގެ އެހީތެރިކަން ވެސް ލިބިފައިވެއެވެ. ދެ ދުވަހުގެ ތެރޭގައި ދާއިރާގެ ތަޖުރިބާކާރުން ބައިވެރިވާ 10 ޕެނަލް ޑިސްކަޝަން ބޭއްވޭނެއެވެ.
ކޮމެންޓު ފޮނުވާ