ރަސްމާލެ ދެނީ ރިއަލް އެސްޓޭޓް ގާނޫނުގެ ދަށުން، ޓޫރިޒަމް ގާނޫނުން ނޫން: ބަންޑާރަނައިބު

ރަސްމާލޭގެ ބިން 99 އަހަރަށް ކުއްޔަށް ދިނުމަކީ އެ ބިން ދާއިމީކޮށް ވިއްކާލުމެއް ކަމަށް ކުރީގެ ރައީސް އަބްދުﷲ ޔާމީން ކުރެއްވި ފާޑުކިޔުމަށް ބަންޑާރަނައިބު އަހްމަދު އުޝާމް މިއަދު ރައްދު ދެއްވައިފި އެވެ. އުޝާމް ވިދާޅުވީ ރިސޯޓުތައް 99 އަހަރަށް ކުއްޔަށް ދެވޭ ގޮތަށް ގާނޫނު ބަދަލުކުރެވުނީ ޔާމީންގެ ވެރިކަމުގައި ކަމަށެވެ.

'އެކްސް’ގައި ކުރެއްވި ޕޯސްޓެއްގައި އުޝާމް ހާމަކުރެއްވި ގޮތުގައި، 1999ގައި ޓޫރިޒަމް ގާނޫނު ފާސްކުރިއިރު ރިސޯޓު ކުއްޔަށް ދެވުނީ އެންމެ ގިނަވެގެން 25 އަހަރަށެވެ. 2010ގައި ރައީސް ނަޝީދުގެ ވެރިކަމުގައި އެ މުއްދަތު 50 އަހަރަށް އިތުރުކުރި އިރު، 2015ގައި ޔާމީންގެ ވެރިކަމުގައި 99 އަހަރަށް އިތުރުކުރިއެވެ.

ނަމަވެސް ރަސްމާލެ މަޝްރޫއު ހިންގާނީ ޓޫރިޒަމް ގާނޫނުގެ ދަށުން ނޫން ކަމަށާއި، މިހާރު އެކުލަވާލަމުން ދާ ރިއަލް އެސްޓޭޓް ގާނޫނުގެ ދަށުން ކަމަށް އުޝާމް ވިދާޅުވި އެވެ. ޓޫރިޒަމް ގާނޫނުގެ 8 ވަނަ މާއްދާގައިވާ ގޮތުން، 99 އަހަރު ހަމަވުމުން އިންވެސްޓްމަންޓުގެ އަގުން ބަލަށް ކެނޑުމަށްފަހު ބާކީ އަގު ސަރުކާރުން އިންވެސްޓަރަށް ދައްކަން ޖެހެ އެވެ.

ޔޫއޭއީގެ އީގަލް ހިލްސްއަށް 500 ހެކްޓަރުގެ ބިމެއް 99 އަހަރަށް ދީގެން 20 ބިލިއަން ޑޮލަރުގެ ވޯޓަރފްރަންޓް މެރީނާއެއް ތަރައްގީކުރާ މި މަޝްރޫއާ ގުޅިގެން މިހާތަނަށް ސޮއިކޮށްފައިވަނީ ލެޓަރ އޮފް އިންޓެންޓެއްގައި އެކަނި ކަމަށް އުޝާމް ވިދާޅުވި އެވެ. މަޝްރޫއު ފެށުމުގެ ކުރިން ޑެފިނިޓިވް އެގްރީމަންޓުތަކުގައި ސޮއިކޮށް، ގުޅުންހުރި ގާނޫނުތައް މަޖިލީހުން ފާސްކުރަން ޖެހޭނެ ކަމަށާއި، ގާނޫނުއަސާސީއާ ހިލާފު އެއްވެސް ކަމެއް ސަރުކާރުން ނުކުރާނެ ކަމަށް ވެސް އޭނާ ވިދާޅުވި އެވެ.