ވ. އާރަށުގެ މައްސަލާގައި ކުރީގެ ރައީސް އަބްދުﷲ ޔާމީން ތަޙުޤީޤުގެ މަރުޙަލާގައި ހަނުހުންނެވި ކަމުން، މިހާރު ޝަރީޢަތުގައި ދިފާޢީ ހެކި ހުށަހެޅުމުގެ ފުރުޞަތު ނުދެވޭނެ ކަމަށް ދައުލަތުން މިއަދު ކްރިމިނަލް ކޯޓަށް ބުނެފިއެވެ.
މިއަދު ބޭއްވި އަޑުއެހުމުގައި ދައުލަތުން ދެކެވުނީ، ތަޙުޤީޤުގައި ހާމަނުކޮށް ބާއްވާފައިވާ ހެކިތައް ޝަރީޢަތުގެ މަރުޙަލާގައި ހުށަހެޅުމަށް ފުރުޞަތު ދިނުން ރަނގަޅެއް ނޫން ކަމަށެވެ. ޔާމީންގެ ފަރާތުން ދިފާޢީ ހެކިންގެ ގޮތުގައި ހުށަހަޅާފައިވަނީ މާލޭގެ ކުރީގެ ޑެޕިއުޓީ މޭޔަރު އަޙްމަދު ނަރީޝް، ވިލިމާލެ ދާއިރާގެ މެންބަރު މުޙައްމަދު އިސްމާޢީލް އަދި ހުޅުދޫ ދާއިރާގެ މެންބަރު މުޙައްމަދު ޝާހިދެވެ. އޭގެ އިތުރުން ޑޮލަރު ބަދަލުކުރިކަން ދައްކުވައިދޭ ލިޔުމެއް ވެސް ހެކީގެ ގޮތުގައި ހުށަހަޅާފައިވެއެވެ.
އާރަށް ކުއްޔަށް ދިނުމާ ގުޅިގެން އެއް މިލިއަން ޑޮލަރުގެ ރިޝްވަތު ޤަބޫލުކޮށް، އެ ފައިސާ ލޯންޑަރކުރި ކަމަށް ޔާމީންގެ މައްޗަށް ދައުވާކުރާއިރު، މި މައްސަލާގައި ފެލިދޫ ދާއިރާގެ ކުރީގެ މެންބަރު ޔޫސުފް ނަޢީމްގެ މައްޗަށް ވެސް ދައުވާކުރެއެވެ. މި މައްސަލާގައި ކުރިން ޔާމީންއަށް 11 އަހަރުގެ ޖަލު ޙުކުމެއް ކުރި ނަމަވެސް، ހައިކޯޓުން އެ ޙުކުމް ބާޠިލުކޮށް މައްސަލަ އަލުން ބަލަން ކްރިމިނަލް ކޯޓަށް ފޮނުވާލިއެވެ.
މީގެ އިތުރުން ރ. ފުއްގިރި ކުއްޔަށް ދިނުމާ ގުޅޭ ރިޝްވަތާއި މަނީ ލޯންޑަރިންގެ މައްސަލާގެ ޝަރީޢަތް ވެސް ކްރިމިނަލް ކޯޓުގައި ކުރިއަށް ދާއިރު، އެ މައްސަލާގެ ޖަލްސާއެއް މިދިޔަ ހަފުތާގައި ބޭއްވުމަށް ހަމަޖެހި ނަމަވެސް ކެންސަލްކުރިއެވެ.
ކޮމެންޓު ފޮނުވާ