ސަރުކާރުގެ ކުންފުނިތަކުގެ މުވައްޒަފުންގެ ޢަދަދު، މި އަހަރުގެ ނިޔަލަށް ކުންފުނިތަކަށް ހަޤީޤަތުގައި ބޭނުންވާ މިންވަރަށް ގެނެސް، ކުންފުނިތައް ހިންގާ ނިޒާމު ހަރުދަނާކުރާނެކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.
ރައީސް ވިދާޅުވީ، ވެރިކަމަށް ވަޑައިގަތުމަށްފަހު ދެ އަހަރު ވަންދެން ކުންފުނިތަކުން މީހުން ވަކިނުކުރާނެކަމަށް ދެއްވި ބަސްފުޅު ފުއްދަވާފައިވާ ކަމަށެވެ. ނަމަވެސް ސިޔާސީ ބޭނުންތަކަށްޓަކައި ބައެއް ކުންފުނިތަކަށް ބޭނުންވާ ވަރަށްވުރެ ގިނަ ގުނައެއްގެ މީހުން ނަގާފައިވާއިރު، އެއިން ގިނަ ބަޔަކަށް މަސައްކަތެއް ނެތި މުސާރަ ލިބެމުންދާތީ ކުންފުނިތައް ރަނގަޅުކުރުމަށް މި ފިޔަވަޅު އެޅުން ލާޒިމުވާ ކަމަށް ރައީސް ވިދާޅުވިއެވެ. މިސާލަކަށް ފެނަކައަށް ވަރަށް ގިނަ މީހުން ވައްދާފައިވާއިރު އެތައް ބަޔަކު ތިބީ ގޭގައި ކަމަށާއި، ކުންފުނީގެ ދަތިތައް އޮޑިޓަރ ޖެނެރަލްގެ ރިޕޯޓުންވެސް ފެންނަ ކަމަށް ރައީސް ވިދާޅުވިއެވެ.
ވަކިކުރާނީ ހާޒިރީއާއި ވަޒީފާގެ އަޚްލާޤާއި މަސައްކަތުގެ ފެންވަރަށް ބަލައިގެން ކަމަށާއި، ވަކިވާ މުވައްޒަފުންނަށް ރިޑަންޑެންސީ ޕެކޭޖުތަކާއި ލުއި ލޯނުގެ ފުރުސަތު ދީގެން އަމިއްލަ މަސައްކަތެއް ފެށޭނެ މަގު ތައްޔާރުކޮށްދެވޭނެ ކަމަށްވެސް ރައީސް ވިދާޅުވިއެވެ.
ޕީސީބީގެ ރައީސް މަޖިލީހުގެ ކޮމިޓީއަށް ދެއްވި މަޢުލޫމާތުން ދައްކާ ގޮތުން، ކުރީގެ ސަރުކާރުގެ ދައުރުގައި ސަރުކާރު ކުންފުނިތަކަށް 18,000 އަށްވުރެ ގިނަ މީހުން ވައްދާފައިވެއެވެ. ބައެއް ކުންފުނިތަކުގައި މުވައްޒަފުންގެ މަޢުލޫމާތާއި ވަޒީފާ ދިން ލިޔެކިޔުން ނެތުމުގެ ކަންބޮޑުވުން އޮތުމާއެކު، އެ ކުންފުނިތަކުގެ މާލީ ހާލަތުވެސް ދަށްވެފައިވެއެވެ.
ކޮމެންޓު ފޮނުވާ