ރަސްމާލޭގެ ބިޔަ ތަރައްޤީގެ މަޝްރޫޢު ދިވެހިން އެދޭ ގޮތަށް ކުރިއަށް ގެންދާނެ ކަމުގެ ޔަޤީންކަން އީގަލް ހިލްސްގެ ޗެއާމަން މުޙައްމަދު އަލައްބާރު ދެއްވައިފިއެވެ.
މަޝްރޫޢު ނިމުމުން ރަސްމާލެ ފެނިގެންދާނެ ގޮތް އޭއައި ބޭނުންކޮށް ތައްޔާރުކުރި ވީޑިއޯއެއް އިންސްޓަގްރާމްގައި ޝާއިޢުކުރައްވަމުން އަލައްބާރު ވިދާޅުވީ، ރާއްޖޭގެ ތާރީޚުގައި އެންމެ ބޮޑު އިންވެސްޓްމެންޓް ގެނައުމުގެ ފުރުޞަތު ލިބުމަކީ ކުންފުންޏަށް ފަޚުރެއް ކަމަށާއި، ދިވެހިން ކުރާ އިތުބާރު އެ ކުންފުނިން ޤަދަރުކުރާ ކަމަށެވެ.
އަލައްބާރު ވިދާޅުވި ގޮތުގައި ރަސްމާލޭގައި ބިނާކުރަނީ ހަމައެކަނި ޢިމާރާތްތަކެއް ނޫނެވެ. ގޮނޑުދޮށްތަކާއި ރެސްޓޯރެންޓްތަކާއި ހޮޓާތަކާއި ކުޅިވަރު ކުޅޭނެ ތަންތަނާއި ކުޑަކުދިންނަށް ހާއްސަ ސަރަހައްދުތައް ހިމެނޭ، ދިރިއުޅުމަށް ތައްޔާރުކުރާ ތަނެކެވެ. އެ ތަނުން ޕްރޮޕަޓީ ގަންނަ ފަރާތްތަކަށް ބޮޑު ފައިދާއެއް ލިބޭނެ ކަމަށްވެސް އޭނާ ވިދާޅުވިއެވެ.
"މޯލްޑިވްސް ވޯޓަރފްރޮންޓް އެންޑް މެރީނާ"ގެ ނަމުގައި ހިންގާ މި މަޝްރޫޢަށް 20 ބިލިއަން ޑޮލަރަށް ވުރެ ގިނަ ބޭރުގެ ސީދާ އިންވެސްޓްމެންޓް ލިބޭނެ ކަމަށް ކުންފުނިން ބުނެއެވެ. މި މަޝްރޫޢަށް ރަސްމާލޭގެ 500 ހެކްޓަރު ދޫކުރުމަށް ސަރުކާރުން ނިންމާފައިވާއިރު، އިދިކޮޅު ބައެއް ސިޔާސީ ފަރާތްތަކުން އެކަމަށް ފާޑުކިޔަމުން ދެއެވެ.
ނަމަވެސް ފިނޭންސް މިނިސްޓަރު ޙަސަން ޒަރީރު ވިދާޅުވެފައިވަނީ، މިސްރުގެ އިސްކަންދަރިއްޔާގައި އީގަލް ހިލްސްއާއި އިމާރު ގުޅިގެން ހިންގާ "މަރާސީ" ފަދަ މަޝްރޫޢުތަކުގެ ފެންވަރު ސީދާ ބެއްލެވުމަށްފަހު އެއްބަސްވުމުގައި ސޮއިކުރީ ކަމަށާއި، ރަސްމާލެ ވެގެންދާނީ ހުރިހާ ޚިދުމަތެއް ލިބޭ ޒަމާނީ ސިޓީއަކަށް ކަމަށެވެ.
If you’re republishing, remember to credit Voice as the source.
ކޮމެންޓު ފޮނުވާ