މެލޭޝިއާގެ ކުރީގެ ބޮޑުވަޒީރު މަހާތީރު މުހައްމަދުގެ އަނބިކަނބަލުން، ސިތީ ހަސްމާ މުހައްމަދު އަލީ، އުމުރުފުޅުން 100 އަހަރުގައޮ މިއަދު ނިޔާވެއްޖެއެވެ.
ސިތީ ހަސްމާ ނިޔާވީ ކުއާލަލަމްޕޫރުގައި ހުންނަ ނޭޝަނަލް ހާޓް އިންސްޓިޓިއުޓުގައި، ހެނދުނު ގާތްގަނޑަކަށް 9:25 ހާއިރުއެވެ.
ސިތީ ހަސްމާ ނިޔާވިކަން ކަށަވަރުކޮށްދީފައިވަނީ އޭނާގެ ދަރިކަލުން މޮކްޒާނީ މަހާތީރެވެ. އަދި ހެނދުނު ގާތްގަނޑަކަށް 10:50 ހާއިރު، މަހާތީރުވެސް އިންސްޓަގްރާމް މެދުވެރިކޮށް އަނބިކަނބަލުން ނިޔާވި ޚަބަރު ހިއްސާކުރައްވާފައިވެއެވެ.
މެލޭޝިއާގެ ރަސްގެފާނު (އަގޫންގ) ސުލްތާން އިބްރާހީމް ސުލްތާން އިސްކަންދަރު، ފޭސްބުކް މެދުވެރިކޮށް ހަސްމާގެ ޢާއިލާއަށް ތަޢުޒިޔާ ދަންނަވާފައިވެއެވެ.
1926 ވަނަ އަހަރު ސެލަންގޯރުގެ ކްލެންގްގައި އުފަންވި ހަސްމާއަކީ، 1950 ގެ އަހަރުތަކުގައި ސިންގަޕޫރުގެ ކިންގް އެޑްވާޑް ދަ ސެވަންތް ކޮލެޖް އޮފް މެޑިސިންގައި ބޭސްފަރުވާއާ ބެހޭ ދާއިރާއިން ކިޔަވާފައިވާ، މެލޭޝިއާގެ ފުރަތަމަ މެލޭ އަންހެން ޑޮކްޓަރުންގެ ތެރެއިން އެކަކެވެ. މިހާރު 101 އަހަރުގެ އުމުރުގައި ހުންނަވާ މަހާތީރާއި އޭނާ ފުރަތަމަ ދިމާވީވެސް އެ ކޮލެޖުގައެވެ.
1974 ވަނަ އަހަރު، މެލޭޝިއާގެ ސިއްޙީ ވުޒާރާގެ ދަށުން، ކެޑާ ސްޓޭޓުގެ މަންމައިންނާއި ކުޑަކުދިންގެ ސިއްޙަތާ ބެހޭ އޮފިސަރުކަމަށް އައްޔަނުކުރެވުނު ފުރަތަމަ އަންހެނާއަކީ ހަސްމާއެވެ.
ފަހުން ބޮޑުވަޒީރުގެ އަނބިކަނބަލެއްގެ ހައިސިއްޔަތުން، ޢާއިލީ ރޭވުން، ނަފްސާނީ ސިއްޙަތު، މަސްތުވާތަކެތީގެ ބޭނުންކުރުން ހުއްޓުވުން، އަދި އެހެނިހެން ކަންކަމަށް އޭނާ ހުއްޓުމެއްނެތި މަސައްކަތް ކުރައްވާފައިވެއެވެ.
މެލޭޝިއާގެ ޕާލިމެންޓުގައި ސިތީ ހަސްމާ ނިޔާވި ޚަބަރު އިޢުލާނު ކުރުމަށްފަހު، އެކަމަނާގެ ޝަރަފުގައި ކުރު ދުޢާއެއް ކިޔައިދެވުނެވެ.
ސިތީ ހަސްމާ ނިޔާވިއިރު ފިރިކަލުންނާއި ހަތް ދަރިން ދުނިޔޭގައި އެބަ ތިއްބެވިއެވެ.
ކޮމެންޓު ފޮނުވާ