ރައީސް ޑރ. މުޙައްމަދު މުއިއްޒުގެ ސަރުކާރަކީ ކުރާ ހުރިހާ ކަމެއް ރައްޔިތުންނާ ހިއްސާކުރަމުން، ފުރިހަމަ ހާމަކަމާއެކު ކުރިއަށްދާ ސަރުކާރެއް ކަމަށް ފިޝަރީޒް މިނިސްޓަރު އަޙްމަދު ޝިޔާމް ވިދާޅުވެއްޖެ އެވެ.
ރޭ ސުލްޠާން ޕާކުގައި ބޭއްވި "އަހާ" ފޯރަމްގައި ވާހަކަފުޅު ދައްކަވަމުން ޝިޔާމް ވިދާޅުވީ، ސަރުކާރާއި ވަޒީރުން ކުރަމުންދާ މަސައްކަތްތަކާއި، ވެރިކަމަށް އައުމަށް ހުށަހެޅި މެނިފެސްޓޯ ތަންފީޒުވަމުންދާ މިންވަރު ދެނެގަތުމަށް ރައްޔިތުން ބޭނުންވާ ކަމަށެވެ. އެހެންކަމުން، ވުޒާރާތަކުގެ މަސައްކަތްތަކާއި ހާމަކުރެވޭނެ މަޢުލޫމާތު ރައްޔިތުންނާ އެންމެ ފުރިހަމައަށް ހިއްސާކުރުމަށް ރައީސުލްޖުމްހޫރިއްޔާ ވަރަށް ބޮޑަށް ބާރުއަޅުއްވާ ކަމަށް ވެސް ޝިޔާމް ވިދާޅުވި އެވެ.
މަސްވެރިކަމުގެ ދާއިރާއާ ބެހޭގޮތުން ވާހަކަފުޅު ދައްކަވަމުން ޝިޔާމް ވިދާޅުވީ، މި ސަރުކާރު ވެރިކަމާ ހަވާލުވިއިރު ދާއިރާގެ އަމިއްލަ ކުންފުނިތައް ތިބީ ވަރަށް ބޮޑު ދަތިކަމެއްގައި ކަމަށެވެ. އޭގެ ސަބަބަކީ ކުންފުނިތަކުގެ ހާލަތު ނުބަލައި މަހުގެ އަގަށް ބަދަލު ގެނައުމާއި ސިޔާސަތުތައް ކަނޑައެޅި ގޮތް ކަމަށް ވިދާޅުވި އެވެ. ނަމަވެސް، އެންމެން ގުޅިގެން ކުރި މަސައްކަތުގެ ނަތީޖާއެއްގެ ގޮތުން މިހާރު މަސްވެރިކަމުގެ ސިނާޢަތު ވަރަށް ބޮޑަށް ރަނގަޅުވެފައިވާ ކަމަށް ޝިޔާމް ވިދާޅުވި އެވެ.
ކޮމެންޓު ފޮނުވާ